Cordelera Cantábrica
From Wikipedia, the free encyclopedia
La Cordelera Cantábrica ye ún de los principales sistemes montañosos de la Península Ibérica. Asítiase al norte d'ella, cuasi paralela al mar Cantábricu, y tien una llonxitú de 480 km, ente la llende occidental de los Pirineos y'l Macizu Galaicu-Lleonés, qu'enllaza col Sistema Ibéricu, y un anchor mediu en direición norte-sur de 100 km. Estos montes, que son la cadena montañosa más occidental d'Europa, formen una provincia fisiográfica estremada diento de la división fisiográfica nomada Cinturón Alpín.
Cordelera Cantábrica | |
---|---|
sistema montañoso (es) y cordal | |
Situación | |
País | España |
Autonomía | Cantabria |
Coordenaes | 43°11′51″N 4°51′06″W |
Datos | |
Altitú | 2648 m |
Materiales | caliar |
Fechos importantes | |
Orixe del nome | Mar Cantábricu |
Anchor | 65,000 m. |
Llargor | 480,000 m. |
Nos sos montes pueden practicase toa triba de deportes de monte: senderismu, escalada... y tamién esquí, nes estaciones d'Altu Campóo, Valgrande-Payares, Fontes d'Inviernu, San Isidro, Ḷḷeitariegos y Manzaneda. La cordelera ta ente les comunidaes autónomes del País Vascu, Cantabria, Asturies y Castiella y Lleón. Los cumales perpasen los 2.500 m nos tramos más altos, nos Picos d'Europa ente Cantabria, Asturies y Llión. El monte más altu d'esti sistema ye La Torre Cerréu, nos Picos d'Europa, con una altitú de 2.648 m y, yá fuera de los Picos d'Europa, Peña Prieta (2.536 m) en Llébana (Cantabria). La cavidá más fonda ye'l sistema cavernariu del Trave, la mayor torca d'España y sesta mayor del mundu.