Ciudá global
From Wikipedia, the free encyclopedia
Llámase ciudá global, ciudá mundial, ciudá alfa o centro, a una ciudá considerada como un nodu importante del sistema económicu global. El términu, que provién de los campos de la xeografía y los estudios urbanos, respuende a la idea de que la globalización puede ser entendida como un procesu creáu, facilitáu y desarrolláu nún conxuntu d'entidaes xeográfiques estratéxiques que pueden ordenase acordies cola so xerarquía d'importancia pal funcionamientu del sistema global de finances y comerciu.
La más complexa d'estes entidaes ye la ciudá global: una ciudá que tien un efeutu direutu y palpable nos asuntos mundiales al traviés d'una influyencia non solo económica, sinón tamién cultural o políticas[1]. L'usu d'esti conceptu, opuestu al de megaciudá, foi popularizáu pola socióloga Saskia Sassen nel so llibru de 1991 The Global City: New York, London, Tokyo[2], magar que'l usu de la espresión ciudá mundial, que fai referencia a ciudaes que mueven grandes volúmenes de negociu a nivel mundial, remóntase polo menos a la descripción fecha en mayu de 1886, pol The Illustrated London News, de la ciudá de Liverpool[3]. Patrick Geddes usó otra vuelta el términu de ciudá mundial en 1915[4]. Más recientemente esi términu tien sío descritu cenciellamente como sinónimu de ciudá con gran influyencia y capital financieros, dexando otros factores (culturales, políticos) nún llugar más secundariu[5][6].