Billingüismu
fluidez en dos llingües / From Wikipedia, the free encyclopedia
Con billingüismu referímonos a la capacidá d'una persona pa utilizar indistintamente dos llingües en cualquier situación comunicativa y cola mesma eficacia.[1] Esisten concepciones discrepantes sobre qué condiciones exactes tienen de dase por que un ser o un grupu humanu, una institución o una sociedá, pueda considerase billingüe. Anque claramente tien d'estremase ente:
- Billingüismu individual; esto ye, la capacidá d'un individuu pa procesar dos sistemes llingüísticos distintos. Esti tipu de billingüismu ye estudiáu pola adquisición del llinguaxe llingüística aplicada, la psicolingüística y la neurolingüística principalmente.
- Billingüismu social, esto ye, los efeutos de la esistencia de billingüismu nun grupu humanu. Esti asuntu ye d'especial interés pa la sociollingüística y la llingüística antropolóxica.
Na última década'l conceutu de billingüismu enmárcase dientro del multillingüismu, que ye la capacidá que tien tou ser humanu d'aprender más d'una llingua y cómo estes actúen ente sigo y sofítense unes a otres nos procesos d'adquisición y/o aprendizaxe de les mesmes.