Ana Germana Bernaldo de Quirós

Ana Germana Pía María de los Desamparaos Josefa Joaquina Bernaldo de Quirós y Muñoz (19 de marzu de 1866, Palencia – 11 de setiembre de 1934, Vitoria) foi una aristócrata española, I marquesa de Atarfe y grande d'España por derechu propiu y duquesa de Ánsola por matrimoniu, dama de les Reines Doña María Cristina y Doña Victoria Eugenia y de la Orde de María Lluisa.

Ana Germana Bernaldo de Quirós
Dama de la Reina (es)
Vida
Nacimientu	Palencia[1], 19 de marzu de 1866[1]
Nacionalidá	España
Muerte	Vitoria[1], 11 de setiembre de 1934[1] (68 años)
Sepultura	cementerio de San Isidro (es) [1]
Familia
Padre	José María Bernaldo de Quirós y González de Cienfuegos
Madre	María Cristina Muñoz y Borbón
Casada con	Luis de Jesús de Borbón (es) Manuel Méndez de Vigo y Méndez de Vigo (1890 – 1934)[1]
Fíos/es	Luis de Borbón y Bernaldo de Quirós, Duque de Ansola (es) [2] Manfredo de Borbón y Bernaldo de Quirós[2] Ofelia Méndez de Vigo y Bernaldo de Quirós (es) [2] Manuel Méndez de Vigo y Bernaldo de Quirós (es) [2] Mario Méndez de Vigo y Bernaldo de Quirós (es) [2] Raquel Méndez de Vigo y Bernaldo de Quirós (es) [2] Eliana Méndez de Vigo y Bernaldo de Quirós (es) [2] Cristino Méndez de Vigo y Bernaldo de Quirós (es) [2] Thais Méndez de Vigo y Bernaldo de Quirós (es) [2]
Hermanos/es	Jesús Bernaldo de Quirós

Llamada familiarmente Poulot, nació en Palencia el 19 de marzu de 1866, fía de José María Bernaldo de Quirós y González de Cienfuegos (1840-1911), VIII marqués de Campu Sagrao, embaxador en Constantinopla, Atenes y San Petersburgu, gentilhombre de Cámara de S.M. con exerciciu, caballeru de la Orde de Carlos III y maestrante de Granada, y de María Cristina Muñoz y de Borbón (1840-1921), la so muyer, I marquesa de la Sabelaa y vizcondesa de la Dehesilla, que yera hermana uterina de la Reina Sabela II. De los sos padres heredó Ana Germana'l Palaciu de Camposagráu del llugar y parroquia de Villoria, nel conceyu asturianu de Llaviana, onde morrió'l 11 de setiembre de 1934. Los Bernaldo de Quirós fueren señores del cotu de Villoria dende'l sieglu XIV.

Tuvo por güelos maternos a la Reina Gobernadora d'España Doña María Cristina de Borbón Dos Sicilies, vilba que foi de Fernando VII, y al teniente xeneral Agustín Fernando Muñoz y Sánchez, el so segundu home, I duque de Riánsares y marqués de San Agustín, grande d'España, I duque de Montmorot (títulu francés que portaba la dignidá de par de Francia), caballeru de la Orde del Toisón d'Oru, gran cruz de la de Carlos III, maestrante de Granada, etc.

Los sos güelos paternos fueron José María Bernaldo de Quirós y Llanes, VII marqués de Campu Sagrao, diputáu a Cortes, senador del Reinu y caballeru gran cruz de la Orde de Carlos III, y María Josefa Antonia González de Cienfuegos y Navia Osorio, la so muyer y prima segunda, fía de los condes de Marcel de Peñalba, señores d'Allande.

Matrimonios y descendencia

Ana Germana Bernaldo de Quirós casó en Madrid el 31 de mayu de 1886, con Real Llicencia del 17 anterior, con Lluis de Jesús de Borbón y Borbón (1864-1889), I duque de Ánsola, grande d'España, caballeru gran cruz de les Órdenes portugueses de Cristu y Avís y maestrante de Sevilla, fíu terceru de SS.AA.RR. los Infantes d'España Don Sebastián Gabriel de Borbón y Braganza, Infante tamién de Portugal, gran prior de San Xuan, y Doña María Cristina de Borbón, la so segunda muyer, hermana del Rei Don Franciscu d'Asís. Descendiente agnado d'una llinia menor de la Casa Real d'España aniciada pol Infante Don Gabriel (fíu de Don Carlos III) y na que tuvo venceyáu'l prioratu de Castiella y Lleón de la Orde de San Xuan de Xerusalén. D'esti matrimoniu nacieron dos fíos:

1. Lluis Alfonso de Borbón y Bernaldo de Quirós (9 de marzu 1887 - 21 de mayu 1942), II duque de Ánsola. Casó en Londres en 1914 con Beatrice Harrington, pero nun tuvo descendencia llexítima.
2. Manfredo Lluis de Borbón y Bernaldo de Quirós (3 de febreru 1889 - 6 de xineru 1979), I duque de Hernani y III de Ánsola, II marqués de Atarfe. Seique nun yera fíu del duque sinón adulterino, frutu de les rellaciones de la so madre con Manuel Méndez de Vigo, que dempués sería'l so segundu home.^[3] Contraxo matrimonio dos vegaes, pero nun tuvo fíos. A la so muerte, y por designación so, asocedió nel ducáu de Hernani la Infanta Doña Margarita, hermana menor del Rei Don Xuan Carlos.
   
   

Vilba del duque, volvió casar el 30 de payares de 1890, na ilesia de San Nicolás de Villoria, col diplomáticu Manuel Méndez de Vigo y Méndez de Vigo, embaxador d'España de carrera, diputáu a Cortes, gobernador civil de Guipúzcoa, caballeru gran cruz de la Orde de Carlos III, gentilhombre de Cámara de S.M. con exerciciu y servidume. Fíu de Felipe Méndez de Vigo y Osorio, de los condes de Santa Cruz de los Manueles, y de María de la Paz Méndez de Vigo y Oraá. D'esti matrimoniu nacieron siete fíos:

1. Ofelia Méndez de Vigo y Bernaldo de Quirós (15 de xunu de 1891 - 3 de payares de 1938).
2. Manuel Méndez de Vigo y Bernaldo de Quirós (24 de xunu de 1892 - 18 de mayu de 1938), casáu con María del Consuelo del Arco y Cubas, fía de los condes de Arcentales, con socesión.
3. Mario Méndez de Vigo y Bernaldo de Quirós (19 de xunu de 1893 - 19 de payares de 1936), casáu con Sabela Martínez de Monesteriu del Valle Rávago, con socesión.
4. Raquel Méndez de Vigo y Bernaldo de Quirós (22 d'avientu de 1900 -?).
5. Eliana Méndez de Vigo y Bernaldo de Quirós (21 d'avientu de 1902 - 22 de febreru de 1991), casada con Manuel Espinosa y Villapecellín, III conde de la Cabana de Silva, VII vizconde de Garci-Grande, maestrante de Ronda, con socesión.
6. Cristino Marco Aurelio Méndez de Vigo y Bernaldo de Quirós (1 de xineru de 1904 - 24 d'ochobre de 1980), casáu con Maria de les Mercedes de Berriatúa, con socesión.
7. Thais Méndez de Vigo y Bernaldo de Quirós (21 d'ochobre 1906 -?), casada con Xosé de Echenique y Osacar, con socesión.

Referencies y bibliografía

• Mateos Sáinz de Medrano, Ricardo. Los Desconocíos Infantes d'España. Thassalia, 1996. ISBN 9788482370545.
• Mateos Sáinz de Medrano, Ricardo. Nobleza Obliga. La Esfera de los Llibros, 2006.

1. URL de la referencia: http://web.archive.org/web/20190722033000/http://www.historicas.unam.mx/publicaciones/publicadigital/libros/577/577_01_04_06_Penalba.pdf. Data de consulta: 31 xunetu 2019. Páxina: 170.
2. Afirmao en: The Peerage. Llingua de la obra o nome: inglés. Autor: Darryl Lundy.
3. Paez que mientres l'ausencia del duque n'África, «doña Ana Germana, que siempres foi famosa poles sos requilencies amorosos, entró en rellación col que depués sería'l so segundu maríu, don Manuel Méndez de Vigo. Sicasí, un segundu embaranzu de la duquesa obligar a llegase a Arxel, onde vivía'l so maríu, pa dar a lluz ellí, anque a dicir de dalgunos de los sos parientes, faía cuasi dos años que los maríos nun se víen. Llegó poco primero de la muerte del duque, que se produció'l 24 de xineru de 1889. Díes dempués, el 3 de febreru, nació ellí'l so segundu fíu, Manfredo, sobre quien siempres s'acurrió la dulda de la ilegitimidad, anque foi en tou puntu aceptáu como fíu per don Lluis Jesús.» Ricardo Mateos, op. cit. 2006, p. 473.

• Datos: Q5673774
• Multimedia: Ana Germana Bernaldo de Quirós