políticu y economista español From Wikipedia, the free encyclopedia
Alberto Carlos Garzón Espinosa[3] (9 d'ochobre de 1985, Logroño) ye un políticu y economista español. Militante del PCE, y d'Izquierda Xunida dende 2003, dende les eleiciones xenerales de 2011 ye diputáu nel Congresu por dicha formación. Tamién ye miembru d'ATTAC (organización que promueve el control democráticu de los mercaos financieros).[4] Dende 2016 ye coordinador federal d'Izquierda Xunida y en 2015 foi escoyíu, por aciu primaries, candidatu a la presidencia del Gobiernu d'España por Unidá Popular nes eleiciones xenerales de 2015.[5]
Esta páxina o seición ta desactualizada. La información que tien ye vieya o insuficiente. |
Ye fíu del malagueñu Alberto Garzón Blanco, profesor de Xeografía y Historia, y de la rioxana Isabel Espinosa Casares nacida na llocalidá de Cenicero, farmacéutica, que se conocieren en selmana santa na llocalidá malagueña de Rincón de la Victoria. Los sos primeros años pasólos en Logroño, onde nació, hasta que con tres años, la familia treslladóse a la llocalidá sevillana de Marchena, onde'l so padre consiguiera plaza de profesor.[6]
En 1994 la familia volvió a Rincón de la Victoria. Estudió la primaria nel colexu Manuel Laza Palacios y la secundaria, nel institutu Ben Al Jatib onde'l so padre enseñaba. Gustába-y el fútbol ya intentó entrar, ensin ésitu, nel Club Deportivo Rincón.
Alberto Garzón matriculóse primeramente n'Alministración y Direición d'Empreses na Facultá de Ciencies Económiques y Empresariales de la Universidá de Málaga, pero al añu siguiente camudó a Economía. Con 18 años afilióse a Izquierda Xunida Los Verdes-Convocatoria per Andalucía.
Nel añu 2004 participó na fundación d'Estudiantes por una Economía Crítica, una asociación de la que foi presidente hasta 2008 y que taba en llinia col movimientu Postautismu nacíu en Francia años antes. El propósitu d'aquella asociación yera académicu-militante, pos se denunciaba "el pensamientu únicu y el vacíu intelectual que impera na enseñanza de la economía" al empar que se participaba en movimientos sociales como'l Foru Social Otra Málaga de 2004.[7] Dicha asociación integraríase primero en "Estudiantes d'Izquierdes", asociación universitaria de calter izquierdista y anticapitalista, y darréu na plataforma d'"Estudiantes Críticos", xunta de diversos coleutivos progresistes.[8] Economía Crítica Málaga presentóse tamién a les eleiciones estudiantiles, llogrando un 64% de los votos en 2008.[9]
Foi na llista d'IX a les eleiciones municipales de 2007, como númberu cinco.
Garzón estudió dempués na Facultá de Ciencies Económiques y Empresariales de la Universidá Complutense de Madrid, concretamente'l máster d'Economía Internacional y Desarrollu impartíu pol departamentu d'Economía Aplicada I. Dichu departamentu foi l'espaciu académicu onde impartió clases Sampedro, a quien Garzón estimó públicamente ser el fundador de la so escuela de pensamientu.[10] D'aquel departamentu salieron otros cargos políticos de la izquierda alternativa, ente ellos el que foi coordinador d'Izquierda Xunida-Madrid, Eddy Sánchez, pero tamién los economistes de referencia de Podemos, Nacho Álvarez y Bibiana Medialdea. Foi investigador na Universidá Pablo de Olavide de Sevilla, según miembru del coleutivu Economía crítica y crítica de la economía.
El 2 d'ochobre de 2011 foi escoyíu pa encabezar la llista d'IX per Málaga pa les eleiciones xenerales de 2011, resultando escoyíu diputáu.[11][12] Mientres la campaña eleutoral la so candidatura recibió'l sofitu de persones del mundu de la cultura como Juan Diego Botto, Carlos Bardem y Antonio de la Torre.[13][14] Foi'l diputáu más xoven del congresu nesa llexislatura.
La so activa participación nel Movimientu 15-M[15] traxo que darréu se -y considerara un voceru del 15-M nel Congresu.[16] En xineru de 2013 foi escoyíu miembru de la Comisión Executiva Federal d'Izquierda Xunida, máximu órganu na direición de la formación, asumiendo la responsabilidá d'Economía Política Global.[17]
El 29 de payares de 2011, día en qu'allegaron al Congresu p'acreditase como miembros del Parllamentu resultante de les eleiciones xenerales del mesmu mes, Garzón y el coordinador de IX Cayo Lara arrenunciaron al sistema de pensiones priváu que se-yos concede a cada unu de los miembros del Congresu.[18]
El 7 de febreru de 2013, fixo pública la so nómina oficial nel Congresu y apurrió otros datos sobre los sos ingresos y patrimoniu n'ares, según esplicó na so web, de la tresparencia y l'ética.[19] D'esta forma tamién ye unu de los primeros diputaos al faelo, yá que el Congresu de los Diputaos nun fai públiques les nómines.[20]
El 11 de marzu de 2013, desmarcóse de la política de parte de la so organización al pidir «sanciones xudiciales pa los conseyeros d'IX que comulgaron col caciquismu de les caxes d'aforru» al entender que «da igual nes sigles nes que s'acovezan aquelles persones qu'aprovechen la política pa usu priváu».[21]
El 21 de febreru de 2015, foi escoyíu candidatu d'Izquierda Xunida a la presidencia del gobiernu nes eleiciones xenerales, col 75,8 % de los votos del Conseyu Políticu Federal, yá que el so rival nes primaries abiertes, Nicolás García, nun consiguió axuntar los avales necesarios p'allegar al procesu.[22][23]
En 2016 celebráronse unes primaries n'IX. A pesar de tener una participación del 40,2 %, Alberto Garzón, foi escoyíu coordinador federal, con un 74,4 % de los votos, frente a la eurodiputada Paloma López Bermejo, sofitada por Cayo Lara, que llogró un 20,8 %, ente que Tasio Oliver, sofitáu por Gaspar Llamazares ya Izquierda Abierta, llogró un 4,6 %.[24][5]
Alberto Garzón tuvo afiliáu a la Unión de Mocedaes Comunistes d'España na so mocedá y dempués, hasta l'actualidá, pasó a engrosar les files del Partíu Comunista d'España. Sicasí, Garzón foi tacháu munches vegaes de socialdemócrata por plantegar en numberoses ocasiones midíes reformistes que nun busquen acabar col capitalismu.[25] Según los sos propios críticos, esto pue ser debíu al fechu de trabayar y publicar dellos llibros conxuntos– con dos economistes de referencia dientro de la socialdemocracia como son Vicenç Navarro y Juan Torres López.[26] Lo cierto ye que los sos trabayos académicos traten sobre les interpretaciones heterodoxes a la crisis, ensin que quede claro a qué escuela ta él adscritu.[27] Na so páxina web asegura que ye debedor del pensamientu heterodoxu marxista y poskeynesiano, con toque especial d'ecoloxía política. Coles mesmes, cita ente les sos referencies a economistes como Michal Kalecki, Marx, Paul Sweezy, Antonio Gramsci y Lenin.[4]
N'entrevistes posteriores a la so eleición como diputáu Garzón destacó la imposibilidá de la socialdemocracia, vista ésta en términos teóricos:
El BCE persigue un modelu de sociedá bien determináu: el mesmu Draghi faló de rebaxa de costos salariales para llograr una situación competitiva. Añadió que'l nuesu país tenía que buscar les sos ventayes comparatives, lo que quier dicir que nos ta mandando a un mercáu mundial a competir contra tol mundu y a ver quién viende los sos productos más baratos. Nesi espaciu institucional la socialdemocracia nun puede sobrevivir porque para poder competir y vender más baratu que los tos competidores precises tener trabayadores más baratos y precises tomar midíes económiques que faen invidable caltener l'Estáu del bienestar. Nun capitalismu tan flexibilizáu, tan desregularizáu y tan competitivu la socialdemocracia pierde los espacios.Alberto Garzón.[28]
Tamién defendió la incompatibilidá de la democracia col sistema económicu capitalista y la imposibilidá de que'l planeta aguante la presión del so modelu de producción y consumu:
El capitalismu ye incompatible cola democracia porque nesti sistema económicu los votos determínense en función del dineru, de manera qu'aquellos que más tienen son los que más manden. Si los recursos nun tán xestionaos pola sociedá, si nun son recursos públicos democráticamente xestionaos, evidentemente'l poder y la capacidá de decidir qué se produz y pa ónde vamos va tar nun espaciu privao y alloñao de la ciudadanía. Tenemos de tener claro que les grandes empreses y los grandes sectores estratéxicos tienen que ser públicos para decidilo tou democráticamente y que efeutivamente esista una democracia. Pero sobremanera hai otru imperativu, que ye l'ecolóxicu: el nuesu planeta nun aguanta un sistema competitivu como l'actual modelu de producción y consumu que representa'l capitalismu.Alberto Garzón.[28]
Alberto Garzón collaboró na ellaboración de los siguientes documentos:
Alberto Garzón ye autor de les siguientes publicaciones:
Alberto Garzón empezó a salir con Anna Ruiz, médicu de familia del hospital La Princesa. El día 24 d'agostu de 2016 anunciaron la so próxima boda.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.