Alberto Contador
ciclista español / From Wikipedia, the free encyclopedia
Alberto Contador Velasco (6 d'avientu de 1982, Madrid)[3] ye un ex-ciclista de ruta español, profesional dende 2003 hasta 2017, y anguaño comentarista deportivu. Mientres la so carrera profesional, Alberto corrió nos equipos ONCE/Liberty Seguros, Discovery Channel, Astana, Saxo Bank Sungard/Tinkoff y Trek-Segafredo.
Catalogáu de lleenda,[4] Contador ye consideráu como unu de los grandes vueltómanos de la historia del ciclismu.[5] Destacaba como escalador, terrenal onde yera un especialista, y como contrarrelojista, qu'ensin ser un especialista, demostró defendese abondo bien, consiguiendo victories d'etapa, un cuartu puestu na contrarreló de los Xuegos Olímpicos de Beixín 2008 y el Campeonatu d'España de Ciclismu en Ruta de Contrarreló de 2009.
Nel so palmarés, Contador tien un total de 69 victories como profesional;[6] amás, ye ganador del UCI Word Ranking 2009.[7] Ente les sos victories más importantes atópense 7 Grandes Vueltes (Giro d'Italia 2008 y 2015, Tour de Francia 2007 y 2009 y Vuelta España 2008, 2012 y 2014) y 8 victories d'etapa nes mesmes (3 etapes nel Tour de Francia y 6 etapes na Vuelta a España), la París-Niza 2007 y 2010, la Vuelta al País Vascu 2008, 2009, 2014 y 2016, la Milán-Turín 2012, la Tirrenu-Adriáticu 2014 y la Vuelta a Burgos 2016. Ye unu de los siete ciclistes que consiguió ganar les tres Grandes Vueltes per etapes (Giro d'Italia, Tour de Francia y Vuelta a España), y ye el segundu ciclista en llograr múltiples victories en toes elles.
El 6 de febreru de 2012, el Tribunal d'Arbitraxe Deportivu (TAS) impúnxo-y una sanción de 2 años pol positivu de 50 picogramos por milillitru (0,00000000005 gramos/ml) de clembuterol na muestra d'orina llograda'l 21 de xunetu de 2010,[8] mientres la segunda xornada de descansu del Tour de Francia, nun pudiendo volver competir hasta'l 6 d'agostu de 2012. Contador, ente otres victories, foi quitáu del Tour de Francia 2010, la Volta a Cataluña 2011, el Giro d'Italia 2011, la medaya de bronce nel Campeonatu d'España de Ciclismu en Ruta de Contrarreló de 2011 y la medaya de plata nel Campeonatu d'España de Ciclismu en Ruta 2011. En cumpliendo la so sanción y tando seis meses ensin poder competir, Contador participaría nel Eneco Tour 2012,[9] onde quedaría en cuartu llugar a seis segundos del podiu.[10]
En 2007, 2008, 2009 y 2014 foi gallardoniáu cola Bicicleta d'Oru como'l meyor ciclista del añu.[11][12][13][14]