![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/e/e2/Goya_-_Caprichos_%252868%2529.jpg/640px-Goya_-_Caprichos_%252868%2529.jpg&w=640&q=50)
السحر (ويتشكرافت)
From Wikipedia, the free encyclopedia
السحر بمفهوم الويتشكرافت Witchcraft هو حاله اوروبيه انتشرت فى اوروبا فى العصور الوسطى و وصلت لذروتها فى القرنين الستاشر و السبعتاشر بعد عصر النهضه.
![Thumb image](http://upload.wikimedia.org/wikipedia/commons/thumb/e/e2/Goya_-_Caprichos_%2868%29.jpg/640px-Goya_-_Caprichos_%2868%29.jpg)
الإعتقاد فى السحر و السحارين ظاهره بشريه موجوده تقريباً فى كل حته فى العالم و فى ثقافات كتيره بتمتد من افريقيا لجزر الباسيفيك و من اسيا لامريكا.[1] الانثروبولجيين و السوسيولوچيين ميزوا ما بين السحر بمفهوم " الويتشكرافت " و الانواع التانيه من السحر ، و وضح الانثروبولجى الكبير ايفانز-بريتشارد Evans-Pritchard فى دراسه عن قبيلة الأزاندى .[2] إن السحارين " الويتش " ليهم قدرات ذاتيه مولودين بيها بتمكنهم من اذية الناس. السحار الويتش مش محتاج يعمل طقوس معينه أو يردد كلمات محدده و ما بيستعملش مواد سحريه. عملية السحر ( ويتشكرافت ) عند الازاندى عمليه نفسيه [3]
العناصر المهمه اللى بتميز السحر بمفهوم " الويتشكرافت " ( Witchcraft ) الاوروبى عن السحر بوجه سنة ( " Magic " و " Sorcery " ) هو ان اللى اتهموا بالسحر كانوا أغلبهم ستات ، و السحاره كانت ليها قدراتها الشريره الذاتيه اللى ما بتحتاجش ادوات خاصه لسحر الناس و اذيتهم. السحاره كانت بتطير بالليل على مقشه و بتروح تحضر اجتماعات مع السحارات التانيين فى مناسبات بتتسمى " السبت Sabbat " ، و كان عندها قدرات ميتامورفوزيه تمكنها من تحويل جسمها لأشكال كتيره. عدو السحارات كان راجل متخصص فى التعرف عليهم عن طريق " اختبارات " و كان بيتسمى " صياد السحارات " Witch-hunter. كرسى التغطيس كان من الالات اللى بتستخدم فى الإختبارات. الست اللى كان بيتثبت عليها انها سحاره كانت عقوبتها القتل بالحرق أو الشنق. لعبت محاكم التفتيش بتاعة الكنيسه الكاتوليكيه دور كبير فى الترويج لخرافة السحارات. عدد الضحايا من الستات اللى اتقتلوا فى اوروبا و امريكا بسبب اتهامهم بالسحر فى الفتره من حوالى نص القرن الخمستاشر للقرن السبعتاشر كان عدد ضخم حوالى 200.000 [4]، كان من ضمنهم جان دارك اللى اتعدمت بالحرق فى فرنسا سنة 1431 و كان من ضمن تهمها انها سحاره. أخر محاكمه للسحارات فى اوروبا حصلت فى القرن التمنتاشر ، و قانونياً انتهت المحاكمات فى بريطانيا بصدور قانون 1735 اللى وقف المحاكمات لكن فى المانيا استمرت المحاكمات القانونيه لغاية اواخر القرن التمنتاشر. استمرت محاكمات السحارات و حرقهم فى اوروبا لحد فى وقت الثوره الفرنسيه ، أخر مره معروفه اتحاكمت فيها ست و اتحرقت بتهمة السحر كان فى سويسرا سنة 1782.[1] محاكمات السحر فى سالم Salem witch trials " اللى حصلت فى 1692 - 1693 بتعتبر من أشهر محاكمات السحارات فى امريكا و فى العالم بوجه عام.