From Wikipedia, the free encyclopedia
الملك المنصور صلاح الدين محمد ابن المظفر حاجى ابن محمد ابن قلاوون الألفى ، سلطان الدولة المملوكيه الواحد و عشرين [1] ابن الملك المظفر سيف الدين حاجى و حفيد الناصر محمد بن قلاوون. حكم مصر من سنة 1361 لسنة 1363.
_ar.png)
| صلاح الدين محمد هوه حاكم مصر رقم 420 |
|---|
| ||||
|---|---|---|---|---|
| معلومات شخصيه | ||||
| تاريخ الميلاد | العقد 1340 | |||
| الوفاة | سنة 1398 (57–58 سنة) | |||
| مكان الدفن | جزيرة الروضه | |||
| مواطنه |   | |||
| الاب | سيف الدين حاجى | |||
| عيله | المماليك البحريه | |||
تعديل مصدري - تعديل  | ||||
اتنصب سلطان على مصر بعد اختفاء عمه السلطان " ناصر الدين حسن " اللى فى الأغلب اتقتل و اتلقب بـ " الملك المنصور " فبقى اول احفاد الناصر محمد بن قلاوون اللى قعدو على عرش مصر. اختلف المؤرخين على سنه وقت تنصيبه فيهم قالو كان عنده اتناشر سنه و فيهم قالو كان عنده اربعتاششر و غيرهم قالو ستاشر.
بعد ما اختفى ناصر الدين حسن اجتمع الامرا بزعامة الامير يلبغا و اتفقو على تنصيبه ، و بعد ما ادوله الولاء عين الامير " يلبغا " اتابك على العسكر و الامير " قشتمر المنصورى " نايب للسلطنه.
فى عهده ما اتغيرتش حاجه و فضلت الاوضاع زى ما كانت فى عهد عمه الناصر حسن بإستثناء ان نفوذ الامرا زاد و اتدهورت الاوضاع الاقتصاديه و الاداريه ، و ده سمح لبروز الجراكسه و مطالبتهم بالمشاركه فى الثروه و السياسه و الاداره. فى السنه الاولى من حكمه خرج الامير " بيدمر " نايب السلطنه عن طاعة الدوله فى قلعة الجبل فى القاهره بعد ما سمع ان السلطان الناصر حسن اتقتل و شاركه فى التمرد عدد من النواب و الامرا كان منهم " منجك " و " استدمر " و اتحصنو فى قلعة دمشق قبل ما يوصل الجيش المصرى. و لما وصل السلطان صلاح الدين محمد و الأتابك يلبغا على راس الجيش خاف الامرا و اتخلو عن نايب الشام المتمرد و راحو بعساكرهم للسلطان و ادوه ولائهم ، و ما فضلش مع " بيدمر " فى قلعة دمشق غر منجك و استدمر و دخلت القوات القلعه و اتقبض على التلاته و اترحلو على السجن ، و اتعين الامير " على الماردينى " نايب للسلطان فى الشام.
وقت غياب السلطان فى الشام انتهزت جماعه من الطواشيه فى القاهره الفرصه و راحو مطلعين الامير حسين اخو الناصر حسن من سجنه وملكوه عليهم لكن دبت خلافات بينهم و اتخانقو و انتهى الموضوع بترجيع الامير حسين ع السجن.
صلاح الدين محمد ما بقاش مهتم بشئون الدوله و بقى يشرب خمره و يعمل حفلات فزعل منه الامير يلبغا و حس انه مش حاينفع فى الحكم فإتفق مع الامرا على عزله فعزلوه بحجة " اختلال عقله " و اتحددت اقامته فى جناح فى قلعة الجبل. بيقول ابن تغرى ان سبب عزله كان انه كان بيروح يتحشر بين ستات الامرا و يهذر معاهم و ده خلى الامير يلبغا يغضب عليه.
بعد عزل صلاح الدين صلاح و تحديد اقامته اتفق الامرا على تنصيب ابن عمه " ابو المفاخر شعبان ابن الامير حسين " اللى اتلقب بالملك الأشرف.
من ضمن اساميه و ألقابه اللى إتنقشت على عملاته : " السلطان الملك المنصور صلاح الدنيا و الدين محمد بن الملك المظفر حاجى بن الملك الناصر " ، و " السلطان الملك المنصور محمد" .[2]
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
