السينما المصريه From Wikipedia, the free encyclopedia
السينما المصريه ، هى اقدم و اعرق و اكبر سينما فى منطقة الشرق الاوسط و على مستوى العالم بتعتبر سينما رائده ظهرت افلامها بعد ظهور السينما فى الغرب بفتره قصيره.
اول عرض سينما تجارى فى العالم كان فى باريس فى ديسمبر 1895 ، و اول عرض فى مصر كان فى نوفمبر العام اللى بعد كده 1896 فى اسكندريه و بعدها فى القاهرة فى 28 يناير 1896 و بعدها كان العرض التالت فى بور سعيد سنة 1898. وفى سنه 1897 اتفتحت فى اسكندريه اول صالة سينما لـ الاخين لوميير. اول مناظر اتصورت بكاميرة سينما فى مصر كانت فى اسكندريه فى منطقه كان اسمها " ميدان القناصل " . كل الافلام اللى اتصورت فى مصر فى الفتره دى كانت افلام قصيره بتعرض مناظر. فى سنة 1917 انتجت شركة طليانيه - مصريه " فيلمين صامتين ، واحد اسمه " الشرف البدوى " و التانى كان اسمه " الأزهار القاتله " و ظهر محمد كريم فى الفيلمين و بكده بيعتبر اول ممثل سينما فى مصر.
بعد ثورة 1919 اتعرضت فى مصر افلام اوروبيه صامته. و فى سنة 1926 اسست عزيزة امير شركة " ايزيس فيلم" و انتجت سنة 1927 اول فيلم ليها كان اسمه " ليلى " ، و بعدين فى سنة 1928 انتجت فيلم " زينب " و ده كان فيلم مبنى على روايه بنفس الاسم للاديب محمد حسين هيكل كاول روايه مصريه تتحول لفيلم سينمائى ، و اشتركت فيه الموسيقيه بهيجة حافظ و اللى بدورها انشأت شركة " فنار فيلم " ، و بعدها اسست اسيا داغر شركة " لوتس فيلم " و قدمت فيلم " غادة الصحراء ". و بعدها اسس الاخوان لاما شركة " كندور فيلم ". مابين سنة 1927 و سنة 1930 انتج فى مصر حوالى حداشر فيلم انتجتها الشركات دى و شركات غيرها ، و كان من اهم الافلام اللى انتجت فى الفتره دى فيلم " تحت ضؤ القمر " و ده كان اول فيلم مصرى ناطق استعملت فيه طريقة تسجيل الصوت على اسطوانات. و ظهر يوسف وهبى و اسس اول ستوديو فى القاهرة سنة 1931 ، و انتج فيلم مصرى ناطق اسمه " اولاد الذوات " اتحضر فى باريس. بعد كده اتوالت الافلام و كلها اتحضرت فى باريس زى فيلم " الورده البيضا " اللى قام ببطولته محمد عبد الوهاب ، و بيعتبر فيلم " دنانير " اللى قامت ببطولته ام كلثوم اول فيلم مصرى ناطق يتصور و يتحضر فى القاهره. ستوديو مصر اللى اسسه طلعت حرب و اللى قامت عليه شركة مصر للتمثيل و السينما ( اتفتحت سنة 1927 ) انتج فيلم " وداد " ، و من ساعتها ابتدا ستوديو مصر يلعب دو ايجابى كبير فى الانتاج السينمائى المصرى الرفيع. و اتقدمت السينما المصريه و اتعملت الاستديوهات الحديثه و ظهرت اجيال من الممثلين و المخرجين و المنتجين.
و اتفتح معهد السينما فى مصر بأقسامه المتخصصه فى فروع السينما المختلفه ، و بقت القاهره منطقة جذب للفنانين اللى بيدوروا عن الشهره من كل منطقة الشرق الاوسط. فى فترة ستينات القرن العشرين اتأممت صناعة السينما فى مصر و بقت تابعه للدوله وانتجت السينما المصريه افلام مهمة كتير فى الفتره دى و حققت دخل قومى للبلد ، لكن مع بداية السبعينات انحسر دور الدوله و بقى الانتاج السينمائى بيعتمد على التمويل من القطاع الخاص وفضل الانتاج ضخم فى التمانينات لكن افلام مقاولات كتير ظهرت فى الفتره دى وقل شويه الانتاج فى التسعينيات. فى اول الالفينات رجعت السينما وزاد انتاجها و عدد الافلام اللى انتجتها السينما المصريه فى سنة 2008 كان 53 فيلم.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
