From Wikipedia, the free encyclopedia
الثوره الفرنساويه ( 1789–1799 ) تعتبر انقلاب سياسى و ثوره شعبيه ابتدت فى فرنسا سنة 1789 و كان ليها اثر كبير على العالم كله , تعتبر اول ثورة ليبراليه فى التاريخ. المؤرخين مش متفقين عن سبب قيامها,فى مؤرخين بيقولوا انها كانت حركه عقليه نشإت عن حركة التنوير فى القرن 18, و فيه مؤرخين بيقولوا انها كانت ثوره على الطغيان الاقطاعى و الظلم و الفساد و انتشار افكار التنوير.الثوره الفرنساويه مع انجازتها الكتيره للفرنسيين و للعالم كله, تعتبر من اكتر الثورات دمويه فى التاريخ و اطولهم. مصطلح الثوره الفرنساويه غالبا يقال على الثوره اللى حصلت فى فرنسا فى سنة 1789 لحد 1799 , مع ان المصطلح من الممكن أن يقال على اكتر من ثوره حصلت فى فرنسا فى القرن التسعتاشر
فلاسفه عصر التنوير و المفكريين اثروا تاثير واضح فى المجتمع الفرنسى و اوروبا . التنويريين طالبوا بحقوق الناس و حريتهم و المساواه, و التى ما كانتش موجوده فى فرنسا وقتها. مفكريين و فلاسفه فرانسيين الهموا الثوار و زعمائهم زى فولتير, الذى انتقد الظلم الطبقى و سيطره رجال الدين على عقول الناس وتدخلهم فى كل صغيره و كبيره فى المجتمع والسياسه, و مونتيسكيو, الذى طالب بفصل السلطات و الليبراليه, و جان جاك روسو اللى طالب بالحريه و المساوه. كل دى الافكارالهمت و شجعت الناس انها تعرف ان عندها حقوق ولازمان تقرر مصيرها بنفسها و تفكر و تشغل عقلها عشان تعرف الحقيقه و حالك دا كويس ولا لا؟..ولو مش كويس ازاى تغيره.الظلم و الفساد و الجهل اللى كانت فيه فرنسا وقتها و معرفه الناس حقوقهم شجعت على الثوره.
تسلسل الاحداث بالتفصيل اللى اتسببت فى قيام الثوره و ترتيب احداث الثوره بالتفصيل.
بسبب الظروف الاقتصادية الصعبة اللى تسبب فيها الملك لويس السادس عشر ومن معه حصلت اعتصامات واضرابات و مظاهرات. بسبب كل دى الازمات و غضب الناس عين جاك نيكر كوزير للماليه لكى يمتص غضب المؤيدين لنيكر المؤمن بافكار التنوير و اعلن اكثر من مره ان وظيفة الحكومه هى توفير الخبز و حماية حقوق الناس . النواب المنتخبين الاقليه اللى كانو بيعبروا عن اكتريه الشعب قدموا طلب بإصدار قانون يخلى النبلا ورجال الدين يدفعوا ضرايب زى الناس التانيه, الموضوع دا رفضه الملك و النبلا و اعضاء الاغلبيه المتعينين من الملك, و حاولوا انهم يسكتوا النواب الطبقه التالته, فاتحدى النواب الموضوع دا و اعلنوا نفسهم جمعيه وطنيه فى 20 يونيه 1789 وانهم الممثليين الحقيقين للشعب مش المجلس اللى بيتحكم فيه الارستقراطيين و الناس اللى الملك معينهم, و طالبوا ان النبلا و رجال الدين يدفعوا ضرايب زى الناس التانيه برضه و طالبوا بعمل دستور جديد. الناس نزلت فى مظاهرات بتئيد نواب الطبقه التالته و الجمعيه الوطنيه و اشتبكوا مع قوات الملك. فى وسط الظروف دى كلها الملك لويس الستاشر قرر انه يشيل جاك نيكر من منصبه, عشان متعاطف مع الناس و الجمعيه الوطنيه, القرار دا زود الغل.
فى يوم 14 يوليه 1789 بعد تالت ايام من طرد الملكلجاك نيكر, اللى الناس بتحبه, و الظروف الاجتماعيه و السياسيه و الاقتصاديه الصعبه اللى فرنسا فيها خلت الناس تثور و عملوا مظاهرات و ضربوا فى قوات الملك و سقط سجن الباستيل فى باريس اللى كان سقوطه رمز لسقوط السلطه المطلقه و دبحوا حراس و مدير السجن وقطعوا راسهم وعلقوها على عصيان و مثلوا بالجثث, الجمعيه الوطنيه معترضتش على اللى حصل , اتهمت بعد كدا انها لما اعترضتش العنف زاد, . فى نفس اليوم رجع الملك لويس الستاشر من رحله صيد و هو مش مهتم ولا عارف ايه اللى بيحصل فى البلد, الناس و الجمعيه الوطنيه تقريبا سيطروا على فرنسا و بدئوا يكسروا سجن الباستيل بايدهم, كرمز ان عصر الظلم خلص.
الجمعيه الوطنيه اعلنت و وقعوا اعلان حقوق الانسان والمواطن, اللى كان متأثر جامد بافكار التنوير و اعتبروه خطوه اولانيه فى طريق عمل دستور جديد لدوله مدنيه, و حولوا فرنسا لدوله ملكيه دستوريه واجبروا الملك انه يقسم السلطه مع الجمعيه الوطنيه, و اعلنوا فى 4 اغسطس لغى حقوق النبلا و رجال الدين الزياده عن بقيه الناس و انهم لازم يدفعوا ضرايب و يتعاملوا زى بقيه الناس. فى يوم 4 اكتوبر ظهرت اشاعات ان الملك و النبلا عملوا حفله و رموا علم الثوره و شتموا الثوره, و نشر الصحفى جان بول مارات الاخبار دى فى الجورنال بتاعه و هيج الناس عليهم. فى يوم 5 اكتوبر كانت فيه مظاهره للستات اللى كانو بيحتجوا على ان مفيش عيش موجود ووصلت ليهم الاخبار اللى جان بول مارات نشرها عن الحفله اللى حصلت دى,اكتر المصادر بتقول انها كانت اشاعه, و راحوا واخدين بعضهم و راحوا على قصر فرساى و فضلوا هناك محتجين يوم كامل و زادت اعددهم جامد و بقوا خطر جامد على العيله المالكه, و كالعاده الملك لويس الستاشر كان متردد و اتئخر كتير فى الرد على المتظاهريين و بعد ساعات اعلن انه وقع اعلان حقوق الانسان والمواطن وانه ادى للناس حقوقها رسمى, بس الكلام دا كان متأخر قوى, و اقتحمت مجموعه من الستات القصر و قتلوا الحراس و كانو حيقتلوا الملكه مارى انطوانيت و بعدين اجبروا الاسره المالكه انهم يروحوا على باريس, وفعلا حصل الكلام دا و بقى مقر الجمعيه الوطنيه ( اللى بقى البرلمان) الرسمى فى باريس. فى سنة 1791 الجمعيه الوطنيه اللى سمت نفسها فى الفتره دى " الجمعيه التأسيسيه " عملت دستور قيد السلطه التنفذيه , و اتدخلت النمسا و بروسيا عشان يقضوا على الثوره, و فعلا بدئوا يقربوا على باريس, دا خلى الثوار يثوروا اكتر و بتشجيع جان بول مارات و متطرفيين ثوريين تانيين راحوا هاجموا السجون اللى فيها الامرا و الاريستقراطيين و رجال الدين المحبوسيين و اقتلوا فيهم, قتلوا تقريبا 1600 واحد فى كام يوم. قرر الملك لويس انه يهرب هو و عيلته من الثوار على النمسا, اللى عيلة مراته كانت بتحكم هناك, عشان يكون جيش يرجع بيه و يرجع مملكته او على احسن الفروض انه يعيش فى امان, بس اتقبض عليهم على الحدود بين فرنسا و النمسا, و اتعلن رسمى خلع الملك عن العرش و تأسيس الجمهوريه الفرنسيه الاولى برياسة روبيسپيير. و ظهر شعار " الحريه و الاخوه و المساواه " (Liberté, égalité, fraternité).
فى سنة 1792 بدإت حروب الثوره الفرنساويه تكتر و مع الهزايم الاولانيه ظهرت اشاعات بمساعدة الملك لويس و مراته الملكه مارى انطوانيت للحلفا ضد فرنسا فاتعدموا بالمقصله سنة 1793 فى المكان اللى فيه دلوقتى ميدان الكونكورد اللى بتتوسطه المسله المصريه. و عملوا الجمهوريه الفرنسيه الاولانيه اللى فيها بقى روبيسپيير بيحكم وفيها حصل حكم الارهاب و الديكتاتوريه, و قبض الجاكوبين على المعتدلين الجيروندين و اعدموهم. و فى سنة 1794 اتقبض على روبيسپيير و اتعدم هو كمان بالمقصله و زاد فساد الحكومه فى عهد حكومة الاداره اللى حكمت ما بين 1795 و 1799 و انتهى الحكم الثورى بإنقلاب عمله نابوليون بونابارت سنة 1799 و انشأ حكومة القناصله فى الجمهوريه, و فى سنة 1803 عين نفسه قنصل مدى الحياه, و بعدين اتتوج نفسه امبراطور سنة 1804 و اسس الامبراطوريه الفرنسيه الاولى.
الثوره الفرنساويه فضلت عشر سنين
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
.svg)
