نور الدين على
From Wikipedia, the free encyclopedia
From Wikipedia, the free encyclopedia
الملك المنصور نور الدين على بن أيبك ( اتولد فى القاهرة سنة 1242 )، ابن السلطان عز الدين أيبك، و تانى سلاطين الدوله المملوكيه.[1] قعد على عرش مصر من سنة 1257 لسنة 1259 فى ايام حالكة ظهر فيها خطر المغول.
نور الدين على هوه حاكم مصر رقم 401 |
---|
| ||||
---|---|---|---|---|
معلومات شخصيه | ||||
الميلاد | سنة 1242 | |||
تاريخ الوفاة | العقد 1300 | |||
مواطنه | ![]() | |||
الاب | عز الدين أيبك | |||
عيله | المماليك البحريه | |||
تعديل مصدري - تعديل ![]() |
بعد ما اتقتل السلطان عز الدين أيبك، مماليكه ( المماليك المعزيه .[2] ) بزعامة الامير سيف الدين قطز خدوا صف ابنه نور الدين على اللى كان لسه عنده خمستاشر سنه، ونصبوه سلطان على مصر بلقب الملك المنصور، ومعاه قطز كنايب للسلطنة، و الامير فارس الدين أقطاى المستعرب [3] كأتابك [4]، و عينوا الامير بدر الدين يوسف وزير للسلطان بدل الامير شرف الدين الفائزى اللى كان وزير أيبك، وبعدين عزلوه هو كمان وحطوا مكانه الامير ابن بنت الأعز [5]
المماليك البحريه اللى كانو هربوا من أيبك على سلطنة الروم السلاجقة .[6] رجعوا مصر بعد ما عرفوا ان أيبك مات، بس لما رجعوا اتذهلوا لما لقوا السلطان الجديد مجرد عيل صغير مابيهتمش الا بتربية الحمام و خناق الديوك والخرفان و ركوب الحمير جوه قلعة الجبل.[7][8] من جهه تانيه، المماليك اللى كانو هربوا على سوريا، و كان منهم بيبرس البندقدارى و قلاوون الألفى، و اللى اضطروا يهربوا بعد كده من سوريا كمان على الكرك بعد ما السلطان أيبك عمل صلح مع الناصر يوسف امير سوريا الأيوبى، ما رضيوش يعترفوا بسلطنة المنصور على [9] وحاولوا يستولوا على مصر مع الملك المغيث ملك الكرك الأيوبى [10] فاتصدت لهم قوات قطز كذا مره على حدود مصر و قدر مماليك مصر فى معركه من المعارك اللى قامت انهم ياسروا قلاوون الألفى و بلبان الرشيدى [11]
والحاله على كده فى مصر، كان الجيش المغولى اللى قايده هولاكو عدا حدود بلاد الشرق وبيتقدم على بغداد مقر الخلافة العباسية . فى شهر فبراير سنة 1258 دخل المغول بغداد وارتكبوا جرايم ومدابح فظيعه وقتلوا الخليفه العباسى المستعصم بالله.
جايز بسبب قلة الفهم لأطماع هولاكو او لقلة حيلته، الناصر يوسف ملك دمشق بدل ما يجهز نفسه لمواجهة المغول، راح باعت ابنه العزيز لهولاكو ومعاه هدايا وجواب بيرجوه فيه انه يساعده على غزو مصر، فرد عليه هولاكو وطلب منه انه يبعت له عشرين الف فارس عشان يعزز بيهم الجيش المغولى. ولما عرف المماليك البحريه اللى كانو فى الكرك باللى بيجرى بين الناصر يوسف و هولاكو طلبوا من المغيث ملك الكرك مهاجمة مصر عشان ياخدوها قبل المغول، فوافق المغيث و بعت جيش للحدود المصريه وهناك اتلقى هزيمه منكره على ايد الجيش المصرى اللى كان بيقوده الامير قطز . بعد الملك المغيث ما نفد بجلده وهرب على الكرك، رجع قطز على قلعة الجبل و أعدم جماعه من المماليك والأمرا اكمنهم حاولوا يتآمروا عليه مع المماليك الهربانين والمعركه شغاله.[12]
فى سنة 1259، و المغول محاصرين ميفارقين، حاول الملك المغيث انه يستولى على دمشق لكنه اتهزم وعمل صلح مع الناصر يوسف واتفق معاه على ترحيل المماليك اللى قاعدين فى الكرك على سوريا، فلما اترحلوا سجنهم الناصر يوسف.[12]
شويه وراح الناصر يوسف مستلم جواب من هولاكو بيأمره فيه انه يستسلم بسرعه ويسلمه دمشق. ولما عرف الناصر يوسف ان الموضوع جد وان المغول عدوا الفرات ورايحين على سوريا انصاب بحالة ذعر وكتب جواب لمصر يستغيث بيها. وبدأ سكان الشام يسيبوا مدنهم و يفروا تجاه مصر .[13]
لما وصل جواب الناصر يوسف لمصر اجتمع الامرا فى بلاط الملك المنصور على فى قلعة الجبل. قطز اللى كان ساخط من لامبالاة المنصور على، و تحكم امه فيه و حشر نفسها فى شئون الدوله، قال للامرا أن الموقف دلوقتى بيحتاج سلطان قوى قادر على مواجهة العدو المغولى، وان الملك المنصور ده عيل صغير مايقدرش يحكم المملكه فى الظروف دى .[14] وعليه اعتقل قطز المنصور على و أخوه قاقان و أمهم فى برج فى القلعة. وبكده اتخلع المنصور على بعد ما قعد على عرش مصر حوالى سنتين ونص. و بقى قطز هو السلطان بعد ما وعد الامرا بانه حايستقيل بعد النصر على المغول [15]
المنصور على و أخوه و امهم اترحلوا على دمياط وبعدين اتنفوا على امبراطورية نيقيا فى عصر السلطان الظاهر بيبرس .[16][17][18]
فى 3 سبتمبر سنة 1260 انتصر المصريين بقيادة قطز على المغول فى معركة عين جالوت وحرروا الشام منهم.
اتسكت فلوس المنصور على سنة 1257 و اتنقش عليها الأسامى والألقاب دى : الملك المنصور نور الدين ، الملك المنصور نور الدنيا و الدين . و اتنقش عليها كمان اسم أبوه: الملك المعز. وكمان اتنقش اسم الخليفة العباسى : الامام المستعصم بالله امير المؤمنين ، امام المستعصم بالله ابو احمد عبد الله امير المؤمنين .[19]
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.