From Wikipedia, the free encyclopedia
المسيحيه نسبه للمسيح هى دين توحيدى متاسس على حياة و تعاليم يسوع اللى ذكرت فى كتاب العهد الجديد (الانجيل). المسيحيين (اتباع المسيحيه) بيؤمنوا بصفه عامه باربع اناجيل بس و فيه اناجيل ما بيعترفوش بيها زى انجيل يهوذا و انجيل توماس و انجيل برنابا ، و بيؤمنو بان يسوع هو الله المتجسد وانه هو المسيح اللى اتنبئت بيه التوراه (كتاب العهد القديم) لكن اليهود ما بيامنوش بيه.
المسيحيين بيؤمنوا بان يسوع المسيح هو الاستاذ و المثل الاعلى فى الحياه اللى بيسودها الخير. يسوع حسب اعتقادهم هو الله ظهر فى شكل انسان و هو الاقنوم التانى من التلات اقانيم اللى مع بعض يكونوا اله واحد وده بحسب اعتقادهم يخلى يسوع اله كامل (لاهوت) وفى نفس الوقت انسان كامل (ناسوت) ، وكمان بيؤمنوا ان يسوع اتولد من العذراء مريم بطريقة اعجازية. وفى حياته على الارض عمل معجزات وعجايب كتير و فى نفس الوقت بيعتبروه تجسيد للرب و انه المخلص اللى اتعذب و مات و بعدين قام من تانى فى تالت يوم عشان يخلص البشريه من الخطيئه الاولانىى (اكل ادم للتفاحه و عصيانه امر الله). المسيحيين بيعتقدو ان يسوع طلع لملكوت السما متحد مع الله الآب، لكنه بعت الروح القدس (تالت الاقانيم الالهية) عشان يساعد الناس انهم يمشوا فى الطريق الصحيح و انه حايرجع تانى للارض عشان يحاسب الناس (حيين و ميتين) و انه حايحاسب كل واحد على حسب اعماله فى الدنيا.
المسيحيه بتتصنف على انها ديانه ابراهيميه (زى الاسلام و اليهوديه) و دلوقتى عدد اتباعها اللى اغلبهم كاتوليك تابعين لبابا الفاتيكان وصل لاكتر من 2 بليون بنى ادم بيمثلو حوالى تلت عدد سكان العالم.
المسيحيه اول ما ابتدت كانت فى حدود طايفه يهوديه فى شرق البحر المتوسط و كان الحوض الشرقى للبحر الابيض المتوسط هو المكان الرئيسى للمسيحية فى القرون الاولانىى وفضلت القدس، انطاكية، الرها، والاسكندرية عواصم الثقافة المسيحية قبل ما تتنقل النفوذ والتاثير لروما والقسطنطينية فى القرون الوسطى. عانت المسيحية فى البدايات من اضطهاد الامبراطورية الرومانية لكن من القرن الرابع بقت هى دين الامبراطورية وكسبت ثقافة يونانية ورومانية اثرت فيها تاثير عميق؛ وزى اى ديانة تانية، ظهرت فى المسيحية طوايف كتير والكنائس بتتصنف فى ستة عيلات كبيرة: اتزامنت الانشقاقات الاولانيه مع القرن الرابع لما انفصلت الكنائس الارثوذكسية الشرقية عن الارثوذكسية القديمة، وبعدين فى سنه 1054 الانشقاق الكبير بين الكاثوليكية والارثوذكسية الشرقية وبعدين البروتستانتية فى القرن الستاشر اللى اتعرف باسم عصر الاصلاح وزى ما اتاثرت، اثرت المسيحية فى الديانات التانية ، وليها بصمة واضحة فى الحضارة الحديثة وتاريخ البشرية فى المجالات المختلفه.
عقيدة التثليث بتعتبر من اساسيات المسيحيه. وبتقول ان الله واحد ليه تلات اقانيم (صفات او صور). صورة الاب اللى ظهر فى كلامه مع ابراهيم وموسى وغيرهم من الانبياء اللى جم قبل يسوع. و صورة الابن اللى ظهر فى شخص يسوع المسيح. وصورة الروح القدس اللى ظهر فى شكل روح مرشد بيساعد الناس فى معرفة الحق وكمان كان بيساعد زمان فى التبشير بالمسيحيه عن طريق انه ساعد التلاميذ والرسل (اول ناس بشروا بالمسيحيه) فى انه اداهم موهبة التكلم بلغات مايعرفوهاش و انهم يعملوا معجزات زى شفاء المرضى. علشان كده المسيحيين دايما بيبتدوا وينهوا صلاتهم بجملة : " باسم الاب والابن والروح القدس، الاله الواحد. امين".
على مر التاريخ اتكونت تلت طوايف رئيسيه فى المسيحيه : الاورتودوكسيه و الكاتوليكيه و البروتيستانتيه و كمان ال انجيليه و غيرها، الكاتوليك هما اكتر عدد بين المسيحيين و رئيسهم بابا الفاتيكان. الطوايف و المذاهب دى بتتقسم داخلى لطوايف و مذاهب مختلفه. اتباع كل مذهب و طايفه بيعتقدوا انهم هما الصح. فى العاده كانت فيه مشاكل و صراعات كبيره بين الطوايف المسيحيه و عبر التاريخ حصلت عمليات قمع و قامت حروب اهليه بينها اتقتلت فيها ناس كتيره. محاكم التفتيش اتاسست اصل لمحاربة المسيحيين اللى الكنيسه الكاتوليكيه اعتبرتهم مهرطقين. من اشهر الصراعات الدمويه اللى حصلت فى العصر الحديث كانت الحرب الاهليه فى ايرلاندا ما بين الكاتوليك و البروتيستانت. على عكس الكاتوليك ، البروتيستانت ماعندهمش بابا و ما عندهمش قسسه و نظامهم الكنسى بيختلف فى حاجات كتيره عن النظام الكاتوليكى. بصفه عامه بيعتبر البروتيستانت متطوريين و متماشيين مع العصر الحديث اكتر من الطوايف التانيه لكن مذهبهم متقسم على كنايس و طوايف كتيره بتختلف عن بعضها فى المفاهيم و الطقوس. معظم الامريكان بينتموا لكنايس بروتيستانتيه. مكرم عبيد و بطرس بطرس غالى من المصريين البروتيستانت المشاهير.
اغلب المسيحيين المصريين بينتمو لكنيسه اسمها الكنيسه القبطيه الاورتودوكسيه المبنيه على تعاليم مارمرقس اللى دخل المسيحيه مصر فى القرن الاول الميلادى و دى كنيسه ليها بابا لكن غير بابا الكاتوليك. الطايفه دى اللى بتؤمن بالمونوفيزيه اعتبرتها الكنيسه الكاتوليكيه و البيزنطيه مهرطقه و خارجه عن المسيحيه بسبب خلافات عن طبيعة المسيح ادت لانفصالها. و بتواجه الكنيسه دى مشاكل كتيره بسبب مواضيع اجتماعيه زى الجواز و الطلاق و ظهرت حركات بتطالب بتطويرها عشان تتماشى مع العصر الحديث ، و فى سنة 2006 انشق عنها الانبا ماكسيموس و اسس كنيسه تانيه اسمها الكنيسه القبطيه الحقيقيه (طايفة القديس اثناسيوس الرسولى).
المقاله دى جزء من سلسله عن |
| العقائد |
| شخصيات اساسيه |
|
يسوع المسيح • الباراكليت |
| الكتاب المقدس |
|
العهد القديم · العهد الجديد |
| الطوايف المسيحية |
|
كاتوليكيه |
| الحضارة |
|
التقويم · التأثير العام · شخصيات بارزة · علماء مسيحيون |
| اماكن مقدسه |
|
القدس |
| المسيحيه فى العالم |
|
المسيحيه فى اوروبا |
| شوف كمان |
معظم البلاد اللى اغلبية سكانها مسيحيين نظام الدوله فيها سيكولارى لكن فيه بلاد نوع من انواع المسيحيه هو ديانة الدوله و من الدول دى :
المسيحيه الكاتوليكيه هى اكبر مذهب فى المسيحيه. الكاتوليك اكتر من نص المسيحيين اللى على مذاهب تانيه. عدد الكاتوليك فى العالم اكتر من مليار. اكتر الكاتوليك بيعيشوا فى جنوب امريكا و اوروبا. بابا الكاتوليك هو بابا الفاتيكان اللى فى نفس الوقت اسقف روما. الكاتوليكيه اتزعمت الحركات الصليبيه فى العصور الوسطى ضد المسلمين و اليهود و المسيحيين المنشقين.
المسيحيه البروتيستانتيه هى تانى اكبر المذاهب فى المسيحيه. الكنيسه البروتيستانتيه انشقت عن المسيحيه الكاتوليكيه بقيادة مارتن لوثر سنة 1517. البروتيستانت ما عندهمش بابا و لا قسسه و لا ايقونات. المسيحيه البروتيستانيه انفصلت عنها حركات و كنايس تانيه كتيره منها المسيحيه اللوثريه و الكالفينيه و البيرويتانيه و الادفنسنتيه و البينتيكوتالينيه و غيرها. معظم المسيحيين البروتيستانت بيعيشوا فى امريكا و اسكندنافيا. عبر التاريخ قامت نزاعات وصلت لحد نزاعات مسلحه و حروب ما بين المسيحيين البروتيستانت و المسيحيين الكاتوليك. رغم الانشقاق و التمرد اللى حصل ضد المسيحيه الكاتوليكيه شارك البروتستانت فى اضطهاد و تعذيب المفكرين و الستات فى العصور الوسطى.
بتنقسم المسيحيه الارتودوكسيه الشرقيه لعدد من الكنايس ، زى اليونانيه و الروسيه و المقدونيه و الرومانيه و الصيربيه و الاوكرانيه و الالبانيه و البلغاريه و الجورجيه. معظم المسيحيين الارتودوكس الشرقيين بيعيشوا فى اليونان و روسيا و نواحيها. فى النوع ده من المسيحيه الايقونات و الصلبان و الطقوس و القديسين بيلعبوا دور كبير. الكنايس الشرقيه ليها باباوات غير بابا الفاتيكان. الكنيسه الاشوريه بتعتبر نفسها بتنتمى للمسيحيه الارتودوكسيه الشرقيه لكن الكنايس التانيه ما بتعترفش بيها و بتعتبرها كنيسه مهرطقه. الكنيسه المصريه القبطيه اتهمت هى كمان بالهرطقه و اتفصلت و اتطهدت. دير سانت كاترين فى سينا فى مصر بينتمى للطايفه دى.
المسيحيه الاصوليه موجوده فى المسيحيه بكل طوايفها و مذاهبها ، فى العاده المسيحيين الاصوليين متشددين و بيحرموا حاجات اكتر من المسيحيين التانيين زى المزيكا او الفرجه على التلفزيون او العلاج الطبى و بينكروا نظرية التطور. الانجيل عندهم هو الكتاب الاساسى اللى بيعتمدوا عليه و يستمدوا منه عقيدتهم و بيامنوا جامد بتفسيرات النبؤات الانجيليه. امريكا فيها كنايس اصوليه كتيره. البيوريتانيين وطوايف من المعمدانيين من اشهر الاصوليين المسيحيين.
ظهرت برده حركات ومذاهب فيه كنايس اعتبرتها هرطقة و رفضت الاعتراف بانها مسيحيه. و اللى هى بتغير اساسيات العقيدة المسيحية زى ما بتشوفها الكنايس دى. زى الاريوسيه اللى كانت بترفض عقيدةالتثليث و شهود يهوه اللى بيقولوا ان المسيح مش هو الله وغيرهم. الكنيسه الكاتوليكيه اعتبرت الكنيسه القبطيه المصريه كنيسه منشقه و مع الكنيسه اليونانيه اعتبرت مذهب الكنيسه القبطيه اللى بيقول ان المسيح ليه طبيعتين هرطقه.
كلمه "مسيحيه" جايه من كلمة " مسيح " ، و بيختلف الاسم حسب اللغه، فى الانجليزى زى الكلمه هى " كريستيانيتى Christianity " من كلمة " كرايست Christ ".
المسيحيين بيؤمنوا بكتاب اسمه العهد الجديد بيتكون من اربع كتب بيسموها اناجيل و بيقروا معاها شوية اضافات زى الرؤى و رسايل بولس و كتاب العهد القديم اللى من ضمنه التوراه. الاناجيل الاربعه دول اسمهم انجيل متى، و انجيل مرقس، و انجيل لوقا، و انجيل يوحنا. فيه اناجيل تانيه مش متداوله بين المسيحيين و ما بيامنوش بيها منها انجيل يهوذا و انجيل توماس و انجيل برنابا و غيرها. المورمونيين اللى بيعتبروا طايفه مسيحيه عندهم انجيل اسمه " كتاب مورمون. " تفسير الاناجيل بيتم حسب المذهب و فيه مذاهب اصوليه زى البيوريتانيه و طوايف من المعمدانيين الانجيليين بيؤمنوا بس باللى جه فى العهد الجديد و القديم من غير اضافات خارجيه.
مكان العباده بتاع المسيحيين اسمه كنيسه لكن المسيحى ممكن يصلى فى البيت او فى اى مكان. معظم الكنايس ليها برج متعلق فيه جرس. الصلاه الرئيسيه عندهم فى العاده يوم الحد.
المسيحيين ما عندهمش مكان معين يحجوا ليه، القدس اللى بيسموها بيت المقدس او اورشليم هى مكان الحج الرئيسى بتاعهم لان فيها كنيسة القيامه و مزارات بيربطوها بالمسيح.المسيحيين الكاتوليك و الارتودوكس بيحجوا كمان لكنايس و اديره فيها ايقونات او بقايا للقديسين و اماكن تانيه بيعتبروها مقدسه لايمانهم بتجلى قديس فيها او رمز من رموز المسيحيه زى لوردس فى فرنسا.
المعجزات و تجليات القديسين و الشفاعات (الكرامات) و صلوات طرد الارواح الشريره جزء مهم عند المسيحيين الكاتوليك و الارتودوكس و كنايسهم بتعترف و تؤمن بيها.
المسيحيه فى العصر الحديث بقت بتواجه مشاكل و معضلات كتيره اهمها بطبيعة الحال التماشى مع التطورات الاجتماعيه و الثقافيه و العلميه. فى الغرب، اللى حل فيه التفكير العلمى و السيكولارى محل التفكير الغيبى، الكنايس ما بقتش بتسيطر على حياة الناس و المسيحيه هناك ما عادتش بتلعب دور فى تكوين مفاهيمهم ، الا فى مجتمعات محدوده جداً. فى الشرق الاوسط الكنايس لسه بتلعب دور كبير فى حياة المسيحيين.
فيه انتقادات كتيره اتوجهت للمسيحيه. اليهود على وجه العموم ما بيامنوش بان المسيح جه. فيه مفكرين قالوا ان المسيح ما اتوجدش اصلاً، و المؤرخ الالمانى برونو باور قال ان يسوع المسيح مجرد اسطورة تم اختراعها فى القرن التانى من اندماج وخلط اللاهوت اليهودى واليونانى والرومانى ، و فيه مفكرين زى فولتير و برتراند راسل اللى الف كتاب كامل اسمه " ليه انا مش مسيحى ؟ " (? Why I am not a Christian) و غيرهم شافوا المسيحيه على انها نظام لقهر الناس و تغفيل عقولهم و التحكم فى حياتهم و نهب فلوسهم. فى العصور الوسطى و عصور الظلام سيطرت الكنيسه على مقدرات الناس فى اوروبا و قام نظام قمعى رهيب استبد بالناس و اتحرقت ستات كتيره و مفكرين بتهمة السحر و الهرطقه و اتطورت ادوات تعذيب مرعبه و انشات الكنيسه محاكم التفتيش اللى اتسببت فى قتل الاف الناس بافظع الوسايل. انتقادات تانيه كتيره اتوجهت للحملات الصليبيه على الشرق فى العصور الوسطى و اللى اتسببت فى قتل حوالى 6 مليون و عملت مدابح مريعه ضد المسلمين و اليهود و الاوروبيين اللى سمتهم الكنيسه " مهرطقين " ، و مشاركة الكنيسه فى ابادة السكان المحليين فى جنوب امريكا و اللى اتخيروا ما بين انهم يبقوا مسيحيين او يتقتلوا. فى العصر الحديث اتهمت كنايس بالضلوع فى موضوع الاطفال المهجرين و انكشفت اعمال جنسيه مشينه و مخله بالاداب قام بيها قسسه ضد اطفال و اتسببت المواضيع دى فى مشاكل و انتقادات كتيره. لكن فيه ناس قالوا ان الحاجات دى كات ضد تعاليم المسيحيه.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
