الغزو العثمانى لمصر
From Wikipedia, the free encyclopedia
الغزو العثمانى لمصر هو هجوم جيوش الأتراك العثمانليه فى الاناضول على الأراضى المصريه سنة 1517 بزعامة سليم شاه ( سليم الاولانى ) فى عهد السلطان الغورى.
غزو الاتراك لمصر بيعتبر من اشد الغزوات و الاحتلالات الاجنبيه اللى اتعرضت ليها مصر عبر تاريخها و اتحكم العثمانيين ف مصر لأكتر من 3 قرون. قبل ما يقتحم العثمانيين حدود مصر هجمو على الشام اللى كانت من ضمن اراضى الامبراطوريه المملوكيه و لما طلع الجيش من مصر بقيادة السلطان الغورى و راح على الشام عشان يتصدى ليهم انهزم فى معركة مرج دابق جنب حلب فى 24 أغسطس 1516 و اتصاب السلطان الغورى بصدمه قضت عليه فوقع من على حصانه و من يوميها اختفى. و اتقدمت جيوش الغزاه العثمانليه و اقتحمت حدود مصر و حاول السلطان الأشرف طومان باى اللى خلف الغورى انه يتصدى ليهم لكن الجيش اللى اتبقى من معركة مرج دابق كان اتشتت فى الشام و ماعادش كافى للصمود فإنهزم فى معركة الريدانيه رغم ان السلطان الأشرف طومان باى حارب ببطوله ملحميه و رغم هزيمة الجيش مااستسلمش و فضل يحارب و يقاوم لأخر لحظه. دخل العثمانيين مصر و احتلو القاهره فى 26 يناير 1517 و نهبوها و خربوها و اتحولت مصر من دوله مستقله لولايه عثمانيه بيحكمها السطان العثمانى من استنبول عن طريق نايب ليه ساكن فى قلعة الجبل فى القاهره ، و دخلت مصر فى عصر مظلم و اختفى منها العلم و العلما بعد ما عزلها العثمانيين عن العالم و التطورات النهضويه اللى كانت بتحصل فيه فإتصابت مصر من يوميها برده حضاريه شنيعه. عدد ولاة العثمانيين اللى حكمو مصر لغاية الحمله الفرنساويه كان 136 ، أولهم خاير بك اللى عينه السلطان سليم الاولانى كمكافاءه ليه على خيانته للسلطان الغورى فى معركة مرج دابق و سماه " خاين بك " ، و أخرهم كان سيد باشا أبو بكر الطرابلسى ( بكير ) اللى عينه السلطان سليم خان التالت. الولاه كانو بيتعينو بفرمانات من السلطان العثمانى فى الأستانه و والى مصر كان بيتسمى " والى مصر " أو " باشا مصر ".
إكمن عصر الإحتلال التركى لمصر كان حالك لدرجة ان ماظهرش فيه مؤرخين لغاية ماظهر الجبرتى (1754 - 1822). فى زمن الحمله الفرنساويه و محمد على باشا ، عشان كده فيه حاجات كتيره مش معروفه عن احوال مصر و المصريين فى العصر المظلم ده.
نعى المؤرخ ابن إياس اللى عاصر الأحداث سقوط مصر فى ايد العثمانيين بقوله :
نوحوا على مصر لأمر قد جرى .:. من حادث عمت مصيبته الورى