Zurich Insurance Group

D Zurich Insurance Group isch en internazionali Finanzgselschaft. Si hät dr Hauptsitz z Züri.

s Huus vo dr Züri-Versicherig 1905

Es isch dr grööscht Versicherigskonzärn vo dr Schwiiz. In meh weder zwöihundert Länder und Regioone vo dr Wält isch er aktyv, und er het meh weder füfzgtuusig Aagstellti.

D Firma isch ane 1872 mit em Name Versicherungs-Verein gründet worde. Si het vo Aafang aa als Rückversicherer und gly au als Unfallversicherig gschaffet. 1875 het si sech dr nöi Naame Transport- und Unfall-Versicherungs-Actiengesellschaft «Zürich» ggää. Sit 1894 isch s d «Zürich» Allgemeine Unfall- und Haftpflicht-Versicherungs-Gesellschaft gsy. Und si isch denn au uf Amerika ggange.

Ane 1915 het d Zürcher Firma die spanischi Versicherig Hispania Compañia General de Seguros gchauft.

1922 isch d Dochterfirma Vita Lebensversicherungs-Gesellschaft entstande.

1955 het s Undernääme wider dr Naame ggänderet uf «Zürich» Versicherungs-Gesellschaft. Und i dr nöchschte Zyt het s wyters anderi Versicherigen im Ussland uufgchauft, bis sech d Zürcher Firma ane 1998 mit dr Finanzsparte vo dr Gselschaft British American Tobacco zämetoo het; ane 2000 isch do druus s nöie Undernääme Zurich Financial Services woorde. Sit 2012 heisst s Zurich Insurance Group.

Literatur

• Elena Folini: Zürich Versicherungen. In: Historisches Lexikon vo dr Schwiiz.

Weblink

 Commons: Zurich Financial Services – Sammlig vo Multimediadateie

• Website vo dr Zurich Insurance Group