Swissmill

D Swissmill isch die grööschti Müli vo dr Schwiiz.

d Swissmill-Hüüser näbe der Limet mit em hööche Silo ane 2016

D Firma het der Sitz z Züri. Hütt verarbeitet d Swissmill öppe 200'000 Donne Choorn pro Joor zu Määl und Griess.

S Undernääme goot zrugg uff e chlyni Müli, wo im 19. Joorhundert underhalb vo Züri a dr Limet gstanden isch. Das isch denn uf em Gebiet vo dr Gmeind Ussersyl gsi, wo am Ändi vom 19. Joorhundert zu Züri ygmeindet worden isch. Me het em Betriib mit dr Zyt eifach d Stadtmüli gseit. Ane 1913 het d Mülignosseschaft vo de Schwiizer Konsumveräin a däm Ort en induschtrielli Grossmüli bout. Spöter sind wyteri Hüüser drzue cho, so wie i de 1950er Joor s 40 Meter hööche Choornsilo.

Als Fabrigg vo de Konsumgnosseschafte isch d Stadtmüli e Deil vom Konzärn vo Coop worde. Ane 1998 het d Stadtmühle CMZ Zürich AG mit der Müli Minoterie Coop Rivaz, wo sid 1917 im wattländische Rivaz am Gämfersee gsi isch und au dr Mülignosseschaft vo de Schwiizer Konsumveräin ghört het, zäme d Swissmill gründet. Ane 2001 isch d Müli z Rivaz zuetoo worde und d Fabrigg het me apoche; hüüt isch dört im e modärne Huus s Vinorama vom Lavaux.^[1]

Zum mee Lagervoluume z gwünne, het d Swissmill s Choornsilo a dr Limet vo 2013 bis 2016 uff 118 Meter Höchi vegrösseret. Es isch schynts jetz s hööchschte Choornsilo vo dr Wält, und es isch s zweithööchschte Huus z Züri.^[2][3]

Weblink

 Commons: Swissmill Tower – Sammlig vo Multimediadateie

• Gschicht vo der Swissmill

Fuessnoote

1. Gschicht vo der Müli z Rivaz und vom Vinorama uf lavaux-vinorama.ch
2. BAUWELT – Swissmill-Silo in Zürich
3. Warum der Swissmill Tower schön ist: Der Campanile an der Limmat polarisiert – NZZ Feuilleton: Kunst und Architektur