Sherlock Holmes und die Kehrwoche des Todes
From Wikipedia, the free encyclopedia
From Wikipedia, the free encyclopedia
Sherlock Holmes und die Kehrwoche des Todes ischt a schwäbischa Kriminal-Komeede en zwoi Uffziig vom rheilendischa Autor ond Schornalischda Tobias Bungter, ens Schwäbische ibrsetzt vo dr Stuegerter Schauschbiilere, Reschisseurin ond Autorin Stefanie Stroebele. S erschde Môl uff d Bihne komma isch des Werk am 12. März 2015 en dr Komödie im Marquardt z Stuegert. Des Theaderstick schbiilt em Jôhr 1890, zom weitaus greeschda Doil en dr wirdabergischa Hauptstadt ond am Ôfang zo-ma kloina Doil z London. A Uffihrong (d Paus et mitgrechnet) dauret ogfähr a Stond ond zwanzg Menudda.
| Date vom Drama | |
|---|---|
| Originalditel: | Sherlock Holmes und die Kehrwoche des Todes |
| Gattig: | Kriminal-Komeede |
| Originalsprooch: | Deitsch |
| Autor: | Tobias Bungter |
| Erschiinigsjoor: | 2015 |
| Uruffüerig: | 12. Merz 2015 |
| Ort vo dr Uruffüerig: | Stuegert en dr Komödie im Marquardt |
| Ort und Zit vo dr Handlig: | London ond Stuegert em Jôhr 1890 |
| Persone | |
| |
| Dialäkt: Schwäbisch |
Dui Stuegerter Hausbesitzere Eberle ischt ganz vorzweiflet: Jeda Woch wuud oiner vo ihre Mieder ens Jenseits beferdret, ond zwar emmer dr sell, wo grad drbei ischt, de schwäbisch Kehrwoch zo macha. Om dean vorzwickda Fall uffklära zo kenna, siht-se bloß noh oin Ausweag: Se reist nôch London ond suacht deet en dr Baker Street 221 b da berihmdeschda Dedektiv vo dr Welt auf – da Sherlock Holmes. Dr sell helt des Weible zerscht fir a irischa Terrorischdin, fendet aber so nôch ond nôch Gfalla an dera ihre Schilderonga. Drom fehrt’r au glei mit-ra zruck nôch Stuegert. Selbvorstendlich ischt au em Holmes sei beschder Freind mit vo dr Partii – dr Dr. Watson.
Z Stuegert en dr Bäckerstrôß ôôkomma, gôht s Morda grad weider: Dr Miader Beblenger haglet d Trepp naa, dr Herr Preiss, wo emmer an graußa Wert druff legt, mit Herr Professor ôôgredet zo werra, wuud mit Putzwasser vorgifdet, dr Koch Schubert stirbt a-ma Kuglfisch, dui vorkrachda Diva Olga Eck[1] mit-em Kinschtlernama Olga Corner beißt e-na vorgifdada Roos ond oiner segnet s Zeitliche, wia-nr grad drbei ischt, s Glocka-Schildle zo poliira ond dô drbei an elektrischa Schlag kriagt. Zwischadurre stirmt emmer môl wiider a Zeidongsvorkaifer durchs Bild ond liist d Schlagzeila us dr «Schwäbischa Poscht» vor, wo vom Kehrwochaskandal handlet ond d Leit ôômacha sollet, so a Bläddle om sechs Pfennich zo kaufa.[2] S dauret a scheena Weile, bis em Sherlock Holmes a Liachdle uffgôht. Dr Merder hendrlôôt bei jedem vo seine Opfer an Buachstaba: M – O – R … Dô drhender vorbirgt sich koi andrer als em Dedektiv sei greeschder Widersacher, nemlich der geniale Vorbrecher Professor Moriarty. Jetzt muaß’r bloß noh druffkomma, ondr welchra Gschdalt sich dr sell vorberga duat. Da Dr. Watson entressiirt der Fall et so arg, der bandlet lieber mit dera scheena Mietere Frailein Knöpfle ôô, wo bei dr Stadtbiacherei schaffet ond drom au so gscheit schwätza kôô, ond s Frailein Knöpfle ischt ibrhaupt et abgneigt, sich vo deam Kerle scheene Auga macha zo lassa.
Nôchdem fascht jeder vo de Hausbewohner amôl vordächdigt wôrra ischt, dr Merder zo sei, wuud dr Fall schließlich gleest: dr Professor Moriarty vorbirgt sich en dr Mask vom Zeidongsvorkaifer. Mit dr Hilf vom Sherlock Holmes schafft’s dr Polizeikommissar Holzapfel, wo en dr Zwischazeit em Trebbahaus vom Mietshaus eitroffa ischt, dean Kerle zo vorhafda ond feschtzonemma. Aber em ledschda Moment glengt’s em Moriarty, selle zwoi zo entkomma. Dr Holmes abr jagt-em glei hendrher ond vorfolgt-en durch da ondrirdischa Stuegerter Hauptbôhof[3], wo der Vorbrecher mit-ra Lokomodiv fliha kôô.
Kaum hôt dr Sherlock Holmes d Frau Eberle uffgfordret, ehn selber als nächschda Putzer en da Kehrwochaplôô uffzonemma, dô kriegt’r au scho zor Antwort: „Wisset Se, was des bedeidet, an Kehrwochaplôô omzostella? Was kommt nôh als nächschdes? Mädla, wo Hosa traget? S Wahlrecht fir Fraua? A Minischderpräsident grääa wia a Laubfrosch? Noi, Mischder Holmes, a Kehrwochaplôô ischt ebbes, wo mr sich druff vorlassa kôô. Dô wird nix gendret oder gschdricha. Dr Kehrwochaplôô isch’s, wo Stuegert em Ennerschda zammahelt!”
