From Wikipedia, the free encyclopedia
Dr Josef «Sepp» Blatter (är nännt si sälber Joseph S. Blatter;[1] * 10. Merz 1936 z Vischp as Josef Blatter;[2] haimetbrächtigt z Obergoms, friener Üerliche) isch e Schwyzer Fueßballfunktionär un vu 1998 bis 2016 residänt vum Wältfueßballverband FIFA gsii.[3] Ab em 8. Oktober 2015 isch dr Blatter vu allne Funktione suschpendiert gsii und am 21. Dezämber 2015 het en d FIFA für acht Joor gspeert. E Beruefigsgricht vu dr FIFA het d Speeri am 24. Februar 2016 uf sechs Johr verchirzt
Dr Blatter isch z Vischp uf d Primarschuel gange un uf d Sekundarschuel un s Gymnasium z Sittu un z Saint-Maurice. Derno het er an dr HEC Lausanne Volkswirtschaftslehr studiert un het 1958 mit em Diplom abgschlosse.[4] Dr Blatter isch Alte Herr vu dr Schwyzerische Studänteverbidnig Helvetia, wun er uf dr Vulgo Mi-temps (alem. Halbzyt) daift woren isch.
Dr Blatter isch dreimol ghyrote gsi un het e großi Dochter us dr erschte Eh.
Dr Blatter het vu 1948 bis 1971 aktiv Fueßball gspiilt, au in dr hegschte schwyzerische Amateurliga. Vu 1959 bis 1964 isch er Sekretär vum Walliser Verchehrsverband gsii, vu 1964 bis 1966 Zentralsekretär vum Schwyzerische Yyshockeyverband un vu 1966 bis 1968 Prässeschef vu dr Dachorganisation vu dr Schwyzer Sportverbänd. Anne 1968 isch er in d Privatwirtschaft gangen un het bis 1975 as Diräkter fir Effetligkaitsarbet vum Schwyzer Uhrehärsteller Longines gschafft. Vu 1970 bis 1975 isch er im Vorstand vum Fueßballverain Neuchâtel Xamax gsii.[4]
Im Summer 1975 isch dr Blatter uf Initiativ vum spetere Adidas-Vorstandsvorsitzer Horst Dassler Diräkter fir Entwickligsprogramm bi dr FIFA wore. Als FIFA-Direktor het er sy Biro e baar Johr lang in dr franzesische Niderlossig vu Adidas ghaa un isch au zytwys vu Adidas zahlt wore.[5] Vu 1981 bis 1998 het er as Generalsekretär vu dr FIFA gschafft. Anne 1990 isch er derzue au Exekutivdiräktor wore. Am 8. Juni 1998 isch er as Noofolger vum João Havelange zum achte Bresidänt vu dr FIFA gwehlt wore. Är het si geg dr UEFA-Bresidänt Lennart Johansson mit 111 zue 80 Stimme duregsetzt.[6] Bi syre Widerwahl 2002 het er si mit 139 zue 56 Stimmen geg Issa Hayatou duregsetzt.[7]
Syter anne 1999 isch dr Blatter au Mitglid im Internationale Olympische Komitee.
Uf em 57. FIFA-Kongräss 2007 z Züri isch dr Blatter per Akklamation bis 2011 in sym Amt bstetigt wore.[8] Am 1. Juni 2011 isch er uf em 61. FIFA-Kongräss mit 186 vu 203 Stimme fir e vierti Amtszyt bis 2015 als FIFA-Bresidänt widergwehlt wore. Sy Gegekandidat Mohamed bin Hammam het sy Kandidatur am 29. Mai 2011 zruggzoge.[9]
Am 29. Mai 2015 isch dr 79-jehrig Blatter drotz massive Vorwirf gege d FIFA wäge Korruption im Zämmehang mit dr Vergab vu dr letschte un chimftige Wältmaischterschafte nomol fir e Amtsperiod as Bresidänt bstetigt wore. Sy Gegekandidat het sy Kandidatur noch em erschte Wahlgang zruggzoge.[10] Churz no syre Widerwahl, am 2. Juni 2015, het er sy Ruggdritt as FIFA-Bresidänt bekannt gee. Bis zue dr Wahl vun eme Noofolger blybt er im Amt.[11] Am 8. Oktober isch dr Blatter zämme mit em Michel Platini vu dr FIFA-Ethikkommission fir 90 Däg vu allne Funktione suschpendiert wore.
Am 26. Februar 2016 isch dr Gianni Infantino zue sym Noofolger as FIFA-Bresidänt gwehlt wore.