Rosentalkapelle

47.5639157.603124

D Roosedaalkapälle

Dialäkt: Baseldütsch

D Inschrift über em Iigang

D Roosedaalkapälle isch en ehemooligi Abdankigskapälle und befindet sich an dr Roosedaalstrooss 10 im Roosedaalpark im Chläibaasel. Si isch äins vo de Baasler Kulturgüeter, wo für d Region vo Bedütig si.

Gschicht

Wil im 19. Joorhundert Baasel stargg het afo waggse, het mä au nöiji Friidhööf brucht. 1832/33 het mä im Chläibaasler Roosedaal dr Friidhoof St. Theodor ufdoo, wo men em au dr "Gottesacker vor em Riechedoor" gsäit het oder dr "Gottesacker jensits".

D Abdankigskapälle isch as e schlichte, aber würdevolle Rundbau vom Baasler Archidekt Melchior Berri blaant worde und dr Stäimetzmäister Jakob Christoph Pack (1768-1841) het en baut. D Muure bestoot us unregelmäässige Bruchstäi, het drei Fänster im romanische Stil und oobe druf het s e Kupple us Holz, wo mit Schiifer deggt isch. Zooberst isch e so genannti Ladärne mit em Krüz drufkho. Dr Iigang isch dur e Portalvorbau mit römisch-dorische Süüle. Hinden an dr Muure het s ä chliine Brunne, dr Roosedaal-Brunne.

Am 31. August 1890 isch dr Gottesacker ufghoobe worde, d Greeber mit de Graabstäi si bis zum 15. Juni 1914 gruumt worde und nume no e chliine Park mit dr ehemoolige Abdankigskapälle erinneret an dr Friidhoof.

Wo mä 1992 e Häizig in dr Roosedaalkapälle het welle iibaue,^[1] het mä bim Graabe no Räst vo Greeber gfunde.^[2] Noch dr Sanierig isch d Kapälle en Üebigslokal vo dr Fäldmuusig Baasel / Big Band worde.

Kwelle

• Der Gottesacker St. Theodor im Rosental uf altbasel.ch, abgrüeft am 16. April 2015
• Rosentalgottesacker uf basler-bauten.ch

Fuessnoote

1. Aus dem Tätigkeitsbericht des Kantonsarchäologen für das Jahr 1992 S. 229
2. Aus dem Tätigkeitsbericht des Kantonsarchäologen für das Jahr 1993, 1994, S. 301