René Zeller
From Wikipedia, the free encyclopedia
From Wikipedia, the free encyclopedia
Dr René Zeller (* 26. Juli 1962 z Brüssel[1]; † 17. Mai 2018)[2] isch e Schwyzer Schurnalischt un Hischtoriker gsii.
Dr Zeller het an dr Universitet Züri Gschicht, Staatsräächt un Publizischtikwisseschaft studiert un isch dert 1989 bim Walter Schaufelberger mit dr Dissertation Ruhe und Ordnung in der Schweiz. Die Organisation des militärischen Ordnungsdienstes von 1848 bis 1939 zum Dr. phil. promoviert wore.[3]
Anne 1988 isch er in d Redaktion vu dr Züri-Zytig (NZZ) yydrätte. Är het fir s Ressort Züri gschafft, ab 1994 fir s Ressort Inland un isch 1999 Laiter vu dr Bundeshuusredaktion wore. Wu d NZZ am Sonntag lanciert wore isch, isch dr Zeller as Inlandschef zue dr neie Redaktion gwächslet. Derno het er as Laiter vu dr Bundeshuusredaktion fir d Schwyzer Färnsee gschafft. Noch ere Zwischenetappe in Public Relations bi dr Farner Consulting AG het er si wider em Schurnalismus zuegwändet. 2008 isch er Nochriichteschef vu dr NZZ wore, 2009 Laiter vum Inlandressort un anfangs 2010 derzue stellverdrättende Schefredaktor vu dr NZZ. Vu Jänner bis zum Aadritt vum Eric Gujer as Schefredaktor im Merz 2015 het er noch em Ruggdritt vum Schefredaktor Markus Spillmann interimistisch mit em Luzi Bernet un dr Colette Gradwohl zäme d Schefredaktion vu dr NZZ glaitet.[4][5] Ab Oktober 2016 isch er Laiter Bundesbolitik un Mitgliid vu dr Schefredaktion bim Wuchemagazin Weltwoche wore.[6]
Dr Zeller isch Autor vu dr eerschte Biografy iber dr Schwyzer Militeer, Oberscht un Frontischt Emil Sonderegger gsii.[7]
Är isch im Mai 2018 im Alter vu 55 Johr an dr Folge vun ere Chräbschranket gstoorbe. Är isch ghyrote gsii, het drei Chinder ghaa un het z Hedige gläbt.[6]