From Wikipedia, the free encyclopedia
Dr Peter Arens (* 18. Februar 1928 z Friburg; † 25. Augschte 2015 z Stäfa) isch e Schwyzer Schauspiiler un Theaterreschisseer gsii.
Dr Suhn vu dr Schauspiileri Charlotte Arens isch z Bärn uf d Schuel gange. Bim Wucheblatt «Die Nation» het er ab 1945 ne chaufmännischi Lehr gmacht. Derzue isch er uf Schauspiilschuel z Bärn gange, wun er 1947 abgschlosse het. Im däm Johr het er au sy Debüt am Stadttheater Bärn gee. Anne 1950 isch er an s Dytsch Theater z Göttingen gange un 1953 an s Dytsch Schauspiilhuus z Hamburg. 1958 isch er an dr Münchner Chammerspiil engaschiert wore, speter het er Residenztheater z München, am Wiener Burgtheater, am Berliner Schillertheater un am Düsseldorfer Schauspiilhuus gspiilt.
Syter anne 1963 het er am Schauspiilhuus Züri gspiilt, wun er nit nume ne Huffe Rolle ibernuu het, sunder au zum erschte Mol Reschy gfiert het. Bis 2000 isch er fescht Mitgliid vum Ensemble gsii. An verschidene andere Bihne isch er as Gascht ufdrätte. Är het au wyter Stuck inszeniert, unter anderem Der zerbrochne Krug am Ernst-Deutsch-Theater z Hamburg.
Syt dr 1950er Johr het au in Spiilfilm mitgwirkt un het unter anderem dr Kumpenischt Carl Maria von Weber in dr Romanze Durch die Wälder, durch die Auen gspiilt. Im Färnseh het mer e 1960 in Ein Weihnachtslied in Prosa oder Eine Geistergeschichte zum Christfest as Schriftsteller Charles Dickens gsäh. In dr Schwyz isch er vor allem bekannt us dr Gotthelf-Verfilmige Uli der Pächter (1955) un Anne Bäbi Jowäger (1960/62). Z Dytschland chännt mer e vor allem as Vater vum Gaylord in dr erfolgryche Malpass-Verfilmig Morgens um sieben ist die Welt noch in Ordnung vu anne 1968.
Dr Arens, wu 1989 bim Film Dr. M uusnahmswys d Ufnahmelaitig ibernuu het, het au Heerspiil gschribe un si inszeniert.
Är isch au bi Lääsige un Rezitationsoobe ufdrätte. Unter anderem isch er dur d Schwyz tourt mit Lääsige us dr bärndytsche Ibersetzig vu dr Odysse, wu 2003 au ne kompletti Ufnahm dervu as CD uusechuu isch.
Dr Peter Arens isch mit dr Schauspiileri Margrit Ensinger ghyrote gsii. Sy Chinder sin dr Chunschtmoler Valentin Arens un d Schauspiileri Babett Arens (* 1959). Är het zletscht z Stäfa gläbt.
|
|