Mitra Devi
From Wikipedia, the free encyclopedia
D Mitra Devi (* 30. Oktober 1963 as Beatrice Hänseler z Züri; † 22. Septämber 2018[1] z Züri) isch e Schwyzer Schriftstelleri, Filmmacheri, Schurnalischti un bildendi Chinschtleri.
D Mitra Devi isch z Züri as elteri vu zwoo Schweschtere uf d Wält chuu. Sch as Chind het si gschribe un gmolt. No dr Primar- un Sekundarschuel isch si mit 16 Johr uf Israel graist, wu si zwai Johr lang gläbt het. No andere Raise un eme halbjehrige Ufenthalt z Indie isch si uf d F+F Schule für Kunst und Design z Züri gange un het derno en Uusbildig zur Sozialbeglaiteri gmacht. Si het e baar Johr lang in ere Bio-Gärtnerei gschafft, as Marionetteböueri, Edelschtaischlyferi, Kurslaiteri in kreative Medie un as freii Chinschtleri, voreb si mit Mitti 20 ihri Bilder zum erschte Mol in ere Galery uusgstellt het.
Anne 2001 si ihri erschte Churzgschichte in verschidene Anthologie vereffetligt wore. 2003 isch ihre Kurzkrimi-Band Die Bienenzüchterin uusechuu. Derno het si iber e Dutzed Roman un anderi Wärch publiziert, dodrunter schwarzhumorigi Lyrik, vyl Short Stories, wu ne Dail vum Schwyzer Radio SRF as Heerspiil gsändet wore sin, un di fimfdailig Raie mit dr Zürcher Privatdetektivi Nora Tabani. Im Johr 2007 het d Mitra Devi e halbjehrig Ufenthaltsstipendium as Leipziger Stadtschryberi iberchuu. 2009 isch si zäme mit dr dytsche Krimiautore Tatjana Kruse un Michael Kibler Stipendiati vum Literaturhuus Wiesbaden gsii. Chorz vorhär isch Stumme Schuld erschine, dr erscht Fall fir d Nora Tabani. Dewrno sin Filmriss, Seelensplitter, Das Kainszeichen un 2012 Der Blutsfeind chuu. E baar vu s Mitra Devis Biecher sin mit Literaturbydreg gferderet, fir Bryys nominiert un uuszaichnet wore. Mit irer Partneri Petra Ivanov het si d Krimi-Anthologie Mord in Switzerland, Band 1 un 2, uusegee, 2017 isch dr gmainsam Thriller Schockfrost erschine.
Näb dr Arbet as Schriftstelleri het d Mitra Devi e baar Johr lang as Kolumnischti bim Tagi gschafft un as freii Schurnalischti fir verschideni Zytige un Zytschrifte. Ihri Molereie het mer syt 1987 in diverse Ainzel- un Gruppenuusstellige chenne bschaue. 2011 het si ne Filmuusbildig absolviert un in Aigeproduktion e baar Dokumentarfilm realisiert, wu in Schwyzer Kino un an internationale Filmfeschtival zaigt wore sin. Derzue het si Ultrachurzfilm produziert, wu an Shortfilm-Feschtival ufgnuu wore sin.
D Mitra Devi het ab 2002 bi iber 600 Lääsige un Literaturfeschtival in dr Schwyz, z Dytschland, z Eschtrych un uf dr Kanarische Insle dailgnuu, isch unter anderem an dr Frankfurter Buechmäss] ufdrätte, an dr Leipziger Buechmäss, em Literaturfeschtival «Zürich liest», dr Burdlefer Krimitäg, dr Stuegerter Buechwuche, bi «Mord am Hellweg», dr[Criminale, dr «Schwyzer Mordstäg», d Soledurner Literaturtäg, bi Buech Basel, «Zürich Littéraire» un andere. Ab 2003 isch si mit ihre Schweschter, dr Schauspiileri Barblin Leggio, mit szenische Lääsige us ihre Churzkrimisammlige unterwägs gsii.
D Mitra Devi isch im Septämber 2018 im Alter vu 54 Jahren noch ere schwäre Chranket gstorbe.[2]
Kriminalroman mit dr Privatdetektivi Nora Tabani
- Stumme Schuld. Appenzeller, Herisau 2009, ISBN 978-3-85882-504-9.
- Filmriss. Appenzeller, Herisau 2009, ISBN 978-3-85882-500-1.
- Seelensplitter. Appenzeller, Herisau 2010, ISBN 978-3-85882-518-6.
- Das Kainszeichen. Appenzeller, Herisau 2011, ISBN 978-3-85882-564-3.
- Der Blutsfeind. Appenzeller, Herisau 2012, ISBN 978-3-85882-636-7.
Churzgschichte
- Die Bienenzüchterin. Mörderische Geschichten. Appenzeller, Herisau 2009, ISBN 978-3-85882-505-6.
- Giftige Genossen. Mörderische Geschichten. Appenzeller, Herisau 2010, ISBN 978-3-85882-519-3.
- mit Petra Ivanov (Hrsg.): Mord in Switzerland. 18 Kriminalgeschichten. Appenzeller, Herisau 2013, ISBN 978-3-85882-653-4.
- Der Teufelsangler. Mörderische Geschichten. Appenzeller, Herisau 2014, ISBN 978-3-85882-684-8.
- Mörderische Geschichten. Hörbuch. Appenzeller, Herisau 2010, ISBN 978-3-85882-531-5.
- mit Petra Ivanov (Hrsg.): Mord in Switzerland. Band 2: 18 Kriminalgeschichten. Appenzeller, Schwellbrunn 2016, ISBN 978-3-85882-736-4.
- Kleiner Mord zwischendurch. Unionsverlag, Zürich 2016, ISBN 978-3-293-00504-4.
Lyrik
- Galgenvögel. Schräge Gedichte. Appenzeller, Schwellbrunn 2015, ISBN 978-3-85882-726-5.
- Schattentanz. Schräge Gedichte. Appenzeller, Schwellbrunn 2015, ISBN 978-3-85882-725-8.
- Henkersmahl. Schräge Gedichte. Appenzeller, Schwellbrunn 2017, ISBN 978-3-85882-727-2.
Verschideni Biecher
- Blütenweiss und Rabenschwarz. BOD, Hamburg 2003, ISBN 3-0344-0097-7.
- Das Buch Antares. Edition Spuren, Winterthur 2005, ISBN 3-033-00039-8.
- mit dr Bea Huwiler: Der Spinner von Leipzig. Ein illustrierter Krimi. Edition PaperOne, Leipzig 2007, ISBN 978-3-939398-58-5.
- mit dr Petra Ivanov: Schockfrost. Thriller. Unionsverlag, Zürich 2017. ISBN 978-3-293-00523-5.
Dokumentarfilm
- Crime. Auf Spurensuche mit Krimiautorin Mitra Devi. Regie & Kamera: Bea Huwiler, Regieassistenz: Mitra Devi. Aigeproduktion 2012, Bea Huwiler, 50 Min.
- Vier Frauen und der Tod. Konzept, Regie & Kamera: Mitra Devi. Aigeproduktion 2013, Mitra Devi, 63 Min.
- Long Time Love. Konzept & Regie: Mitra Devi, Kamera: Bea Huwiler. Aigeproduktion 2014, Mitra Devi, 50 Min.
- Gothic. Konzept & Regie: Mitra Devi, Kamera: Bea Huwiler, Lia de Luca, Harald Vigano. Aigeproduktion 2014, Mitra Devi, 89 Min.
- 2003: Wilhelm-Busch-Bryys
- 2006: Wärchbydrag vu dr Stadt Uschter fir Filmriss
- 2007: Halbjehrige Ufenthalt as Krimi-Stadtschryberi vu Leipzig
- 2008: Wärchbydrag vu dr Stadt Uschter
- 2009: Krimi-Stipendium vum Literaturhuus Wiesbaden
- 2009: Nomination fir dr Zürcher Krimibryys, mit Filmriss
- 2010: Nomination fir dr Zürcher Krimibryys, mit Das Kainszeichen
- 2012: Wärchbydrag Pro Helvetia
- 2013: Literaturferderig Fondation Jan Michalski
- 2013: Zürcher Krimibryys, fir Der Blutsfeind
- 2014: Publikumsuuszaichnigf vum Pink Apple-Filmfeschtival Frauefeld, fir Long Time Love
- 2015: Literaturferderig Oertli-Stiftig
- 2015: Literaturferderig Ernst Göhner-Stiftig
- 2015: Literaturferderig Bündner Kulturamt
- 2016: Literaturferderig Fondation Jan Michalski
- 2017: sechswichig Chinschtlerufenthaltsstipendium in dr Kartause Ittinge
D Mitra Devi isch Mitglid in däne Schrifstellerverbänd un Urheberrächtsgsellschafte gsii:
- Schriftstellerverband Autorinnen und Autoren der Schweiz
- Syndikat, Autoregruppe vu dytschsprochige KrimiautorNe
- International Thriller Writers, Verainigung vu internationale Thriller- un Krimiautore
- Mörderische Schwestern, Verainung vu internationale Krimiautorne
- Pro Litteris, Schwyzerischi Urheberrächtsgsellschaft fir Literatur un bildendi Chunscht
- Suissimage, Schwyzerischi Gnossenchaft fir Urheberrächt an audiovisuelle Wärch
- Swiss Perform, Gsellschaft fir Laischtigsschutzrächt
- Femscript, Schwyzerisch Netzwärch vu Fraue, wu schrybe
- Websyte vu dr Mitra Devi
- Yytrag über Mitra Devi im Lexikon vom Verein Autorinnen und Autoren der Schweiz
- Mitra Devi im Unionsverlag
- d Mitra Devi bi Swissfilms
