From Wikipedia, the free encyclopedia
Dr Maurus Wilibald Gerner-Beuerle (* 28. Jänner 1903 z Huuse; † 10. Augschte 1982 z Bremen[1]) isch e dytsche evangelische Theolog, Bfaarer un langjehrige Domprediger am Bremer Dom gsii. Är het as wichtige Verdrätter vu dr Volkschilche noch em Zweete Wältchrieg gulte. Derzue het as Autor un Dichter Biecher gschribe, zum Dail au uf Alemannisch.
Dr Maurus Wilibald Beuerle isch z Huuse im Wiisedal as Suhn vum evangelische Ortsbfaarer Oskar Beuerle un däm syre Frau Ella geboreni Kupfer, uf d Wält chuu. Ärisch z Huuse ufgwachse un no dr Volksschuel uf Oberrealschuel z Schopfe (hite Theodor-Heuss-Gimnasium) gange. Anne 1921 isch er vun ere Verwandte vu dr Mueter, dr Sophie Christina, geboreni Gerner un Witfrau vum Maurus Betz, adoptiert un het ab do dr Doppelname Gerner-Beuerle gfiert.[2]
Noch em Abitur het er e Zyt lang as Muurer un Zimmermann gschafft. Ab 1923 het er an dr Universitete Heidelberg, Kiel, Dibenga un Marburg Theology studiert. Ai Semschter isch er as Uusduschstudänt z Finnland gsii. Noch em Abschluss vu sym Studiums isch er wäge ere Chranket im Sanatorium uf Tafaas in dr Schwyz gsii un het derno as Huuslehrer uf Schloss Elmau z Oberbayern gschafft. Dert het er sy speteri Erna Moritz (1905–2004) us em oldeburgische Nordenham chänneglehrt. Si het uf Schloss Elmau as Huusdochter gschafft.[2][3][4]
Syni Kandidatezyt het er z Haidelberch un sy Vikariat z Wertheim un z Charlsrue gmacht. Anne 1931 isch er in syre Haimetchilche – dr evangelische Chilche z Huuse, wu sy Vater dodmol no as Ortsbfaarer amtiert gaa het – ordiniert wore. Är het verschideni Bfaarstelle z Bade ibernuu un het vor allem as Diasporabfaarer z St. Bläsi gwirkt. Anne 1938 isch er mit syre Familie d Hansestadt Bremen zoge. Do isch er zerscht Pastor an dr Hohentorsgmai in dr Bremer Neustadt gsii. Anne 1946 isch er as Domprediger an dr Bremer Dom St. Petri gruefe wore un het des Amt bis zue syre Pänsionierig 1971 ghaa.[2][3][5]
Näbe sym Beruef as Seelsorger un speter im Ruestand het dr Gerner-Beuerle Gedicht gschribe, näbe hochdytsche vor allem au Gedicht im alemannische Dialäkt vum Wiisedal. Derzue het er e baar Prosawäärch gschribe un het au religiees-wältaaschauligi Schrifte un Breedige uusegee. Är het si vor allem mit em „Verhältnis vu Naturwisseschaft un Religion“ ussenandergsetzt, e Hauptthema vu syne Breedige un Schrifte.[2][6]
Dr Maurus Gerner-Beuerle het z Bremen „als Mitglied eines vielfarbigen Dompredigerkollegiums die Möglichkeit zu eigener theologischer Ausrichtung“ im Sinn vun ere „freiheitlichen kulturprotestantischen Theologie“ gnutzt. Är het as „bedeutender Bremer Domprediger“ gulte un ain vu dr „maßgeblichen Vertreter jener Volkskirche, die sich nach 1945 wieder etablierte“.[3]
Dr Gerner-Beuerle isch ghyrote gsii mit dr Erna Moritz un het mit ihre mehreri Chinder ghaa. Är isch im e Familiegrab uf Riensberger Friidhof vergrabe.[4][5]
Fir sy dichterisch Werk sich dr Gerner-Beuerle 1971 mit dr Johann-Peter-Hebel-Plakette uuszaichnet wore.[2]
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.