From Wikipedia, the free encyclopedia
D Mariella Mehr (* 27. Dezämber 1947 z Züri; † 5. Septämber 2022) isch e Schwyzer Schriftstelleri gsi.
D Mariella Mehr isch as Aagherigi vu dr Minderhait vu dr Jenische anne 1947 z Züri uf d Wält chuu. Si isch e Opfer vum Hilfswärch fir d Chinder vu dr Landstroß gsii, wu Chinder vu ire «fahrenden» Eltere zwangswys drännt ghaa het. Si isch in 16 Chinderhaim un drei Erzieigsaaschtalte ufgwagse. Viermol isch si in e psichiatrischi Aaschtalt yygwise wore, 19 Monet het si in dr Frauestrofaaschtalt Hindelbank verbrocht.
Ab 1975 het si, zerscht schurnalistisch, no schriftstellerisch publiziert. Si het e Hufe literarischi Uuszaichnige iberchuu. 1981 isch ire erscht Roman (Steinzeit) uusechuu.
Ab dr 1970er-Johr het si d Mehr fir d Inträsse vu dr Roma engaschiert, wu si au di Jenische derzue zellt het. In eme Interview het si anne 1982 gsait: «Das Roma-Volk setzt sich aus 29 Stämmen zusammen. Darunter sind die Jenischen ein relativ kleiner Stamm.» Im nämlige Interview het si erklert, ass si us dr jenische Gmainschaft «hinausgeschmissen» wore sei, wel si Widerstand dergege glaischtet heeb, ass d Fraue, wu d Organisatione vu dr Roma bzw. vu dr Jenische grindet hätte, dodin zruggdrängt wore seie.[1]
D Mehr isch anne 1975 Grindigsmitglid vu dr Radgnosseschaft vu dr Landstroß gsii, wu si, zerscht as Kassieri, vu 1976 bis 1982 as Sekreteri gwirkt het. Si het in d erschte Johr au as Redaktori vu dr Gnosseschaftszytschrift «Scharotl» gschafft, wu ne jenische Uusdruck fir e Wohnwage isch. In irem Buech «Kinder der Landstrasse» het si d Zyl vu dr Jenische uf brogrammatischi Wys formuliert un het d «die Versuche der Jenischen, ihre soziale und kulturelle Identität wiederzufinden» betont.[2] Bi dr Generalversammlig vum 5. Merz 1983 isch si njit derby gsii un isch vu dr Versammlig nimi as Mitglid vum Verwaltigsrot widergwehlt wore.[3]
D Mehr het si sälber weniger as Schwyzer, derfir as Roma-Schriftstelleri gsää.[4] Dodurs hän Lyt szum Dail gschlosse, ass si uf Romanes deet schrybe.[5] Die -jenische hän aber ne aigeni Sproch, s Jenisch. D Mariella Mehr het no sällem Interview aber Romanes verstande, si het uf Dytsch gschribe, Täxt vun ere sin uf Italienisch ibersetzt wore; Gedicht au ins Romanes, ibersetzt vum Rajko Đurić.[6]
Fir iri schriftstellerisch Laischtig un au fir ire minderhaitsbolitisch Engaschmänt het d Mehr 1998 d Ehredoktorwird vu dr Uniwersitet Basel iberchuu.
No zwanzg Johr in dr Toskana het d Mehr syt 2015 wider in dr Schwyz gläbt.[7]
Anne 2000 isch d Mehr us dr Autoreverainigung Gruppe Olten uusdrätte, wel die s Zyl, «eine demokratische sozialistische Gesellschaft» z verwirklige, us em Zwäckartikel vu ire Statute gstriche het. Si isch Mitglid vu dr International Romani Writers (IRWA) gsii un zytwys au d Vizebresidänti vu däre.[8]
D Mehr sich am 5. Septämber 2022 gstorbe.[9]
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.