From Wikipedia, the free encyclopedia
D Hannelore „Loki“ Schmidt, geb. Glaser, (* 3. März 1919 z Hamburg, † 21. Oktober 2010 z Hamburg-Langenhorn) isch d Ehfrau vum Altbundeskanzler Helmut Schmidt un e international bekannti Botanikeri un Naturschitzeri gsi.
D Loki Schmidt isch us ere Hamburger Arbeitfamilie chuu. Ihre Vater isch dr Bedriibselektriker Hermann Glaser gsi, wu in ere Werft gschafft het, ihri Mueter d Gertrud Glaser, si het no zwei Gschwischter gha. Wu dr Vater arbetslos woren isch, het d Mueter as Najeri gschafft[1]. Dr Spitzname Loki het si sich as Chind sälber gee.[2] Wel ihri Eltere sich s Schuelgäld fir s Gymnasium nit hän chenne leischte, hän si ihri Dochter uf di reformpädagogisch Lichtwarkschuel z Hamburg gschickt. Noch em Abitur 1937 het d Loki nit chenne Biologi studiere, wel d Studiegebühre z dyyr gsi sin fir si. Si het derno Pädagogik uf Lehramt fir Volksschuele studiert, wel des nume vier Semeschter gangen isch. Vu 1940 bis 1974 het si an Hamburger Volks- bzw. Hauptschuele as Lehreri gschafft.
Mit zeh Johrhet si uf dr Schuel ihre spere Mann Helmut Schmidt chänne glehrt. Am 27. Juni 1942 hän si im nidersächsische Hambergen ghyrote. Us däre Eh sin zwei Chinder firigange. Dr Suhn Walter (* 26. Juni 1944) isch no vor syym erschte Geburtstag am 19. Februar 1945 z Bernau gstorbe, wahrschyns an Meningitis. Dochter Susanne isch im Mai 1947 uf d Wält chuu[3]; si schafft hite as Journalischti fir dr Wirtschaftsfärnsehsänder Bloomberg TV z London[4]. Zue dr zwei Chinder sin no fimf Fählgeburte chuu[5], wu uf di dertemol nonig bekannti Infektionschranket Toxoplasmose zruckzfiere gsi sin.
Vu 1945 bis 1949 het dr Helmut Schmidt z Hamburg Staatswisseschafte un Volkswirtschaft studiert, in däre Zyt het d Loki fir dr Unterhalt vu dr Familie gsorgt. Är isch 1953 Bundesdagsabgordnete wore, 1961 Senator z Hamburg, 1966 SPD-Franktionsvorsitzer im Bundesdag, 1969 Bundesverdeidigungsminischter, 1972 Bundesfinanz- un wirtschaftsminischter un 1974 Bundeskanzler. D Loki Schmidt het schließli anne 1972 ihri Stell as Lehreri ufgee un het protokollarischi Ufgabe as Frau vum Bundesminischter un ab 1974 as Frau vum Bundeskanzler ibernuu. Anne 1976 het d Loki Schmidt d Stiftung zum Schutze gefährdeter Pflanzen grindet. Die Stiftung isch speter mit dr Stiftung Naturschutz Hamburg (grindet 1985/1986 unter anderem vum domolige Präses vu dr Hamburger Umwältbehörde un hitige Stiftigsrotsvorsitzer Senator a. D. Wolfgang Curilla) zue dr Stiftung Naturschutz Hamburg und Stiftung Loki Schmidt fusioniert wore. Syt 1977 vergit die Stiftig d Uuszeichnig „Loki-Schmidt-Silberpflanze“, e Umwältbryys, wu an Lyt vergee wird, wu sich fir dr Naturschutz yysetze[6].
Zue ihrem 80. Geburtstag het si fir ihri Verdienscht um dr Pflanze- un Naturschutz vu dr Universität Hamburg dr Professoretitel iberchuu. Derzue isch si Ehredoktor vu dr Akademi vu dr Wisseschafte z Sankt Petersburg un vu dr Universität Hamburg. Zue ihrem 90. Geburtstag sin 90 „Loki-Schmidt-Beet“ in ganz Dytschland aagleit wore.[7].
No ihre gnännt sin d Bromelie Puya lokischmidtiae R.Vásquez & Ibisch un Pitcairnia loki-schmidtii Barthlott & Rauh, s Balsaminegwägs Impatiens loki-schmidtiae Eb.Fisch. & Raheliv. [8], s Rosegwägs Lachemilla loki-schmidtiae J.Gaviria [9] un dr Skorpion Tityus lokiae[10]
D Loki Schmidt isch im Alter vu 91 Johr in dr frieje Morgestund vum 21. Oktober 2010 in ihrem Huus im Hamburger Stadtdeil Langenhorn gstorbe.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.