From Wikipedia, the free encyclopedia
Dr Jens Rommel (* 13. Septämber 1972 z Ellwãng) isch e dytsche Jurischt. Är isch syte Meerz 2024 Generaalbundesaawalt bim Bundesgriichtshoof. Vorhär isch er vu Februar 2020 bis Meerz 2024 Riichter am Bundesgriichtshoof gsii.
Dr Rommel isch z Raveschburg ufgwagse. Är het Räächtswisseschafte an dr Uniwersiteete Augschburg, Lund, Würzburg un Lyon studiert. Noch em eerschte Staatsexaame het er sy Referändariaat z Augschburg gmacht.
Är isch 2003 in Juschtizdienscht vum Land Baade-Wiirtebäärg yydrätte. No Stazioone as Amtsriichter z Bibra un z Riadlenga isch er Staatsaawalt z Raveschburg woore. In dr Joor druf het er as wisseschaftlige Mitarbaiter bim Generaalbundesaawalt bim Bundesgriichtshoof un bim Juschtizminischterium Baade-Wiirtebäärg gschafft un isch in däre Funkzioon unter anderem vu Mai 2010 bis Jänner 2013 Ressortbeobachter bi dr Europäische Unioon gsii. Derno isch err Ooberstaatsaawalt z Raveschburg gsii un deert zeerscht Abdailigslaiter un schließli Stellverdrätter vum Laitende Oberstaatsanwalt gsii. Vu Oktoober 2015 bis aafangs 2020 het er di Zäntraal Stell vu dr Landesjuschtizverwaltige fir d Ufkleerig vu nazionaalsozialistische Verbräche z Ludwigsburg glaitet.[1][2]
Im Februar 2020 isch dr Rommel zum Bundesriichter am Bundesgriichtshoof z Chaarlsrue ernännt woore.[3][4] Deert het er syterhäär em 4. Stroofsenaat aagheert. Dr Rommel isch aafangs Jänner 2024 dur dr Bundesminischter vu dr Juschtiz, Marco Buschmann as Generaalbundesaawalt bim Bundesgriichtshoof voorgschlaa woore.[5] D Bundesregierig het däm Voorschlaag am 10. Jänner 2024 zuegstimmt;[6] dr Bundesroot het am 2. Februar 2024 zuegstimmt.[7] D Ernännig as Noofolger vum Peter Frank dur dr Bundesbresidänt Frank-Walter Steinmeier isch er 4. Meerz 2024 gsii.[8]