D Hulda Autenrieth-Gander (* 13. Augschte 1913 z Baasel; † 24. Juuni 2006 z Rüeschlike; haimetberäächftigt z Züri) isch e Schwyzer Fraueräächtspionieri un 20 Joor lang Bresidänti vu dr Zürcher Frauezäntraal gsii. Si het um die Zyt di bolitisch Glyychberäächtigung vu dr Fraue im Kantoon Züri breegt. D Autenrieth-Gander het si fir e Schangseglyychhait im Bildigswääse un fir d ZGB-Rewisioon yygsetzt. Derzue het si aktiiv mitgmacht an Abstimmigskampanje fir s Frauestimmräächt un isch Mitgliid vum Konsumäntenefoorum gsii. Si isch as eerschti Frau in Chilcheroot vum Kantoon Züri gweelt woore.[1][2]
D Hulda Gander isch e Doochter vum Adolf Gander gsii un het ase chlai uf Tavaas gläbt. As eerscht Maidli isch si uf s Buebegimnaasoium z Schiers gange.[3] Si het z Bärn un z Züri Jura studiert un s Stuudium anne 1937 mit ere Promozioon zum Teema «Das System der wohnörtlichen Armenpflege in der Schweiz» abgschlosse.[4] Si het s Aawaltsbadänt erwoorbe un as Auditoori am Beziirksgriicht Horge gschafft. Si isch ghyroote gsii mit em Fritz Edward Autenrieth, eme Aawalt, un het drei Chinder ghaa.[1]
Vu 1944 bis 1953 isch si Voorstandsmitgliid un Aktuaari un druf vu 1954 bis 1974 Bresidänti vu dr Zürcher Frauezäntraal gsii, in dr eerschte Joor as Co-Bresidänti mit dr Margrit Bosch-Peter. In ire Zyt Co-Bresidänti sin d Blaanig un d Organisazioon fir s «Huus vu dr Kantoon» zue dr Schwyzerische Uusstellig fir Frauenaarbet (SAFFA) anne 1958 un e baar Joor speeter d Voorberaitige fir dr zweet Frauekungräss gsii, wu 1975 im internazionaale Joor vu dr Frau z Bärn stattgfunde het. Syni wiichtigschte bolitische Ergeebnis sin di aidgnessich Verfassigsinitziatiiv fir di uudricklig Gweerlaischtig vu glyyche Räächt fir Manne un Fraue in Staat un Gsellschaft un d Schaffig vun ere aidgnessische Kummissioon fir Frauefrooge gsii.[1] Im Stimmräächt het d Autenrieth-Gander s Wäärchzyyg gsää, go ändli «die ebenbürtige Partnerschaft von Mann und Frau in Familie und Beruf, in Gesellschaft und Staat» verwiirklige chenne.[5]
Im Joor 1954 het d Autenrieth-Gander d Aktionsgmainschaft fir Konsumänteschutz grindet, 1961 het si d Grindig vum Konsumäntenefoorum vu dr Dytschschewyz un em Kantoon Tessin aagregt. Vu 1960 bis 1974 het si dr Bund vu Schwyzerische Fraueverasin in dr Ständige Strooßevercheerkummisioon verdrätte.
D Autenrieth-Gander isch anne 1967 as eerschti Frau in Chilcheroot vum Kantoon Züri gweelt woore.[2] Si isch anne 1974 zum Eeremitgliid vu dr Zürcher Frauezäntraal ernännt woore un isch ere bis zue iirem Dood äng verbunde bliibe.[1]
- Literatur vu un iber Hulda Autenrieth-Gander im Katalog vu dr Dütsche Nazionalbibliothek
- Regula Ludi: Autenrieth [-Gander, Hulda.] In: Historisches Lexikon vo dr Schwiiz.
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
