en Schwizer Fotograaf From Wikipedia, the free encyclopedia
Der Hugo Josef Jaeggi[1] (* 15. Mai 1936 z Solothurn; † 23. August 2018 z Burg im Leimental) isch e Schwizer Fotograf gsi.
Der Hugo Jaeggi het sini Bruefslehr as Fotograf bim Ernst Räss vo 1953 bis 1956 z Solothurn absolviert, nachdäm er 1953 s Gymnasium abgschlosse het. Nochär isch er vo 1958 bis 1959 Kameramaa für s Schwizer Färnseh gsi. D Meisterprüefig het der Hugo Jaeggi 1960 abglegt. Vo denn a het er z Basel es eignigs Fotigschäft as freischaffende Fotograf bis 1974 gha. Ab 1983 het er z Burg im Leimental (Kanton Basel-Landschaft) gläbt ud gschaffet. Der Jaeggi het sich konstant eigene Fotiprojäkt mit höchem künschtlerischem Aspruch gwidmet, bsunders im Berich vom Porträt. Gmeinsami Reisene hei ne – oft mit em befründete Journalist Peter Jaeggi[2] – unter anderem nach Guatemala, Indie, Wissrussland und in afrikanischi Länder gfüert. Die Ufträg het er derzue brucht, um näbe em farbige „Pflichtteil“ für d Medie eigeni, ganz persönlechi und meistens schwarz-wissi Bilder z mache. Während d Reportagefotis in vilne verschidene Printmedie erschine sind, zum Bispil im Magazin vo der Basler Zitig, het der Künschtler kontinuierlech sis persönliche fotografische Wärch vervollständigt.
Der Jaeggi het versuecht, sini Erläbnis und Tröim in immer wieder neu komponierte Bilder z fasse, wo in bsundrigs Liecht taucht sind. Die klassische Parameter vo der Gstaltig, e duredänkti Komposition und Narration in mehrere Erzählebene, si für ihn wesentlichi Kriterie gsi. Drbi het er über sächs Johrzähnt lang sini bewährti Chlibild-Kamera Leica mit eme 35-mm-Objektiv brucht.
„Hugo Jaeggi ist auch ein virtuoser Erzähler. Vor allem die Begegnung mit Menschen inspiriert ihn dazu, Lebensgeschichten und Schicksale aufzuzeichnen, Entwicklungen zu begleiten, Veränderungen zu beobachten und über diese Veränderungen nachzudenken,“ het der Peter Pfrunder, der Diräkter vo der Fotistiftig Schwiz, gschribe[3] über e Hugo Jaeggi.[4] D Fotistiftig Schwiz z Winterthur archiviert über 600 Silbergelatineprints vom Künstler (Stand 2017[5]).
D Bildtheme vom Hugo Jaeggi umfasse: Porträt, Landschaft, Stillläbe, Alltag, Industrie (Von Roll), Arbet, mehreri Langzitprojäkt, humanitäri Theme u. a. in der Schwiz und in Europa: Belarus, Tschechie, Afrika: Tansania, Asie: Indie, Südamerika: Guatemala u. v. a.
Bis 2016 het är anere Rudolf-Steiner-Schuel unterrichtet. Ab 2006 het sich der Hugo Jaeggi mit der Digitalkamera Veränderige in der nöchschte Umgäbig zuegwändet, won er d Ussergwöhnlechkeit vo natürleche Verfallsprozäss um sis Huus ume entdeckt het.
Der Jaeggi isch 2018 im Alter vo 82 Jahre a Chräbs gstorbe.[6] Der Dokumentarfilm vom Matthias Leupold und em Jérôme Depierre übers Läbe und Wärch vom Hugo Jaeggi (Zudem ist der Traum oft Realität genug, 2019) het grad no chönne fertiggstellt wärde.