D Helene «Helli» Louise Stehle (* 6. Dezämber 1907 z Basel; † 27. Augschte 2017 ebe dert[1]) isch e Schwyzer Schauspiileri un Radiomoderatori gsii. Si isch ab 1939 di erscht wybli Nochrichtesprächeri vu dr Schwyz gsii.[2]
D Stehle isch z Basel ufgwachse un het in dr 1920er-Johr am Konservatorium Basel bim Oskar Wälterlin, dr Lucie Lissl un dr Rosalia Chladek en Uusbildig as Schauspiileri gmacht.[2] Derno het si 1929 bis 1932 am Stadttheater Basel gspiilt. Ab dr spote 1920er-Johr, het si bim Radiostudio Basel vum Schwyzer Landessänder Beromünschter gschafft.[2] Zerscht isch d Stehle bi dr Heerspiielgruppe vum Studio Basel gsii, wu si Gedicht rezitiert oder bi Heerspiil mitwirkt het. Dernäbe het d Stehle versuecht, as Schauspiileri au an dytsche Bihnine Fueß z fasse.[3]
Noch em Uusbruch vum Zweete Wältchrieg isch d Stehle fescht bim Radiostudio Basel engaschiert wore un het in dr Chriegsjohr as erschi wybligi Aasageri un Nochrichtesprächeri gwirkt, wel ihri männlige Kollegen in dr Aktivdienscht yyzoge wore sin.[4] Noch em Chrieg isch d Stehle as Aasageri bim Radio bliben un isch schließli zue dr Schefsprächeri beferderet wore.[5] In däre Funktion het d Stehle au jungi Nochrichtesprächer uusbildet.[4] Derzue het si bi verschidene Radioheerspiil mitgwirkt un het bi ne Dail au Reschy gfiert. Dernäbe het mer d Stehle au als as Schauspiileri chenne sää, zem Byschpel anne 1966 mit em Heinrich Gretler in De Tod uf em Oepfelbaum.[6] 1967 isch si pänsioniert wore.[3]
D Stehle het si e Lääbe lang fir s Baseldytsch un s Schwyzerdytsch im Allgmaine engaschiert.[4] Vor ihrem Dod im Alter vu 109 Johr isch si di letscht läbig Schwyzeri gsii.[7][8]
- Thomas Blubacher: Helli Stehle. In: Andreas Kotte (Hrsg.): Theaterlexikon der Schweiz. Band 3. Chronos, Zürich 2005, ISBN 3-0340-0715-9, S. 1738 f.
- Helli Stehle in dr Internet Movie Database
- Reportasch iber d Helli Stehle (2008)
- Bricht zue s Stehles 103. Geburtstag mit Radiosändig vu 1997
- Bricht iber s Stehles 108. Geburtstag 2015
- Färnsehbricht iber s Stehles 109. Geburtstag 2016
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
