Gerd Witte
From Wikipedia, the free encyclopedia
From Wikipedia, the free encyclopedia
Dr Gerd Witte (* 14. Juni 1927 z Berlin, † 7. Dezember 2015 z Trossenga[1]) ischt a deitscher Kirchamusiker, Kombonischt ond Hochschuellehrer gwäa.
| Dialäkt: Schwäbisch |
Dr Gerd Witte kommt em Johr 1927 z Berlin uff d Welt, wo-nr au uffwechst. Wia der Bua 15 Johr alt ischt, wuud’r vo de Nazionalsozialischda zom Ernde-Eisatz nôch Pommern vorpflichdet. Hendrher kommt’r zom Reichsarbeitsdenscht, ond dô drnôch wuud’r zor Wehrmacht eizoga. Au d Kriagsgfangaschaft bleibt-em et erspart. Wiider zruck en dr Hoimet, vorschlegt’s dean jonga Môô nôch Geddenga, wo-nr sich vom Ludwig Doormann zom Organischda ausbilda lôôt. Neabaher ondrnemmt’r noh musikgschichtliche Studia beim Professor Rudolf Gerber (1899–1957) vo dr dordiga Universideet. Hendrher fangt’r en seira Hoimetstadt a Studiom vo dr Kirchamusik an dr Kirchamusikschuel Spandau ôô. Sei wichdigschder Lehrer isch deet dr Ernst Pepping (1901–1981). Späder setzt dr Gerd Witte sei Studiom an dr Musikhochschuel Stuegert fort, wo weage de Kriagsschäda grad nôch Trossenga ausglagret wôrra ischt. Oiner vo seine Lehrer an sellra Schuel isch dr Herbert Liedecke (1912–1998).
Em Witte seine weidre beruafliche Stazioona send: Vo 1950 bis 1985 Organischt ond Kantor an dr Martin-Luther-Kirch z Trossenga ond hendrher a Zeitlang an dr Stadtkirch St. Georg z Stein am Rhein em Kandon Schaffhausa. Neabaher lehrt’r vo 1958 bis 1971 s Orgelspiila an dr Kirchamusikschuel Esslenga. Dô drnôch wudd’r vo dr Staatlicha Hochschuel fir Musik en Trossenga – enzwischa a selbstendiga Eirichdong – zom Professor ernannt. Des Amt iabt’r zwanz Jôhr lang – bis zo seira Vrsetzong en da Ruhestand em Johr 1991 – aus.
Am 7. Dezember 2015 duet dr Gerd Witte en seira Wahlhoimetstadt Trossenga da ledschda Schnaufer. 88 Jôhr alt isch der Môô worra.
Beim Gerd Witte seim Studiom an der Spandauer Musikhochschuel hôt der Môô d Studentin Ursula Hornickel kennaglernt, wo-nr em Februar 1952 zom Traualtar gfihrt hôt. Zamma hend se drei Dechderla ghet, ond späder send elf Enkela drzuakomma.
Instrumental
Chormusik
Viirstemmige Sätz fir en gmischda Chor[3]
De meischde Chorsätz send bloß gemäßigt modern ond au guat vo Laiacheer zo senga.
