From Wikipedia, the free encyclopedia
Dr Georg Beis (* 13. Septämber 1923 z Bad Heilbrunn; † 5. Oktober 2022 z Augschburg)[1] isch e dytsche remisch-kadolische Gaischtlig un Domdekan gsii. In dr Zyt vu dr Sedisvakanz zwisch em Erzbischof Josef Stimpfle un em Bischof Viktor Josef Dammertz OSB het er as Diezesanadminischtrator vu dr Diezese Augschburg gamtet.
Dr Beis isch zäme mit syne drei Gschwischtrig z Bad Heilbrunn ufgwagse. Anne 1942 het er s Abitur gmacht un isch derno zue dr Wehrmacht yyzoge wore.[1] Noch em Chrieg het er Kadolischi Theology studiert un het s Studium am 21. Mai 1950 zäme mit em spetere Weihbischof un Dompropscht Max Ziegelbauer mit dr Prieschterweih abgschlosse. No ne baa Johr as Kaplan z Geäschdhoofe un as Stadtprediger z Genzburg isch er anne 1958 Bfaarer z Thinga un 1961 z Geggenga wore. Anne 1968 isch er Dombfaarer un Stadtdekan z Augschburg wore. Im Johr 1970 isch er zum Domkapitular[1] ufgschwore un 1985 zum Domdekan ernännt wore.
In dr Zyt vu dr Sedisvakanz zwisch em Bischof Josef Stimpfle un em Bischof Viktor Josef Dammertz OSB het er vum 1. April 1992 bis zum 31. Jännr 1993 s Bischtum Augschburg as Diezesanadminischtrator glaitet. Dr Papscht Johannes Paul II. het en am 25. Mai 1983 zum Päpschtlige Ehrebrelat ernännt. Am 22. Juli 1993 het er dr Titel Aposchtolische Protonotar iberchuu, wu sälte vergee wird, Anne 1993 isch dr Beis emeritiert wore. As Seelsorger im Ruestand het er in dr Bfarrei St. Ulrich un Afra z Augschburg gwirkt. Langi Johr het er bis ins 93. Lääbesjohr all Sunntigemorge di Hailig Mässe in dr Chilche St. Margaret in dr Augschburger Innestadt gfyrt. In syne Bredige isch dytli wore, ass er dr Bschliss vum II. Vatikanische Konzil verbunde gsii isch.
Dr Beis het zletscht im Sparkassealtehim z Augschburg gläbt un isch am 5. Oktober 2022 im Alter vu 99 Johr gstorbe.
Am 16. Novämber 1993 het er s Bundesverdienschtchryz am Band iberchuu.[1] No ihm isch s Georg-Beis-Wohnhuus fir obdachlosi Manne z Lechhausa gnännt, wu 2020 ufgmacht woren isch.