Gent

lblelslhla

Dialäkt: Züritüütsch

Gent
Gent (Provinz Ostflandern) Gent Gent
Staat	Belgie
Region	Flandern
Browinz	Ostflandern
Bezirk	Gent
Koordinate	51° 3′ N, 3° 42′ O51.053.7
Flechi	157,74 km²
Iiwooner (Stand)	262.219 Iiw. (1. Jan. 2019)
Bevölkerigsdichdi	1662 Iiw./km²
Bostläitzaal	9000–9052
Vorwaal	09
Bürgermäister	Mathias De Clercq (Open Vld)
Website	www.stad.gent/de

Gent (niderländisch [ɣɛnt], [ʝɛnt], französisch Gand [gɑ̃]) isch e Stadt i de Regioon Flandere z Belgie und isch d Hauptstadt vo de Provinz Oschtflandere. Wä-mer e Stadt as Verwaltigsäinhäit gseet (was ja gwöndli de Fall isch), isch Gent nach Antwèrpe di zwäitgrööscht Stadt im Land, wil Brüssel us ere ganze Räie Gmäinde zämegsetzt isch.

Gschicht

D Aafäng vo Gent sind keltischi und früegermaanischi Sidligen am Zämefluss vo de Schelde und de Leie gsy. Im Mittelalter isch das Oort tank em Tuechhandel und em Flachs- und Lynegwäärb zu äinere vo de grööschten und wichtigschte Stedt vo Europa woorde. Wil di niderländisch Reformazioon vo de Spanier zämetätscht woorden isch, isch es dänn lengeri Zyt wirtschaftlich bäärgab ggange, bis Gent uusgänds 18. Jaarhundert as e früe-induschtrialisierti Stadt wider wichtig woorden isch.

Wiirtschaft

De Hafe vo Gent isch über de Zeekanal Gent–Terneuzen mit de Nordsee verbunde; 2015 sind deet Güeter umgschlage woorde, wo 46,5 Millioone Tone schwäär sind. Wichtig isch au d Bluemezucht rund um d Stadt ume. Und wil s e Stadt mit vil Gschicht und vilen alte Hüüser isch, läbt si au starch vom Turismus. En groosse Täil vo de mittelalterlichen und früenöizytliche Boute stönd au hüt na – Gent hät über 9800 hischtoorischi, zmäischt tänkmaalgschützti Boute, und de Belfried ghöört – zäme mit andere Türm z Belgien und z Nordfrankrych – zum UNESCO-Wälteerb. S isch daademit e groossi Konkuränz für d Naachberstadt Brügge, wo aber na bikannter isch für syni guet erhalten Altstadt.

Bilder

de Blick vom Belfried uf d Katedrale

d Graslei mit Zoufthüüser

• 
  d Türm vo Gent
• 
  de Belfried, s Simbool vo de stedtische Macht
• 
  de Turm vo de Sint-Niklaaskerk, de Belfried und de Turm vo de St.-Bavo-Katedraale
• 
  Gravensteen, d Burg vo de Graafe vo Flandere
• 
  de St.-Joris-Hof oder Cour St-Georges, s eltischt Hotel vo Europa
• 
  äine vo de Genter Kanääl mit eme Sightseeing-Schiff – rächts de Nöibou vom alte Fischmäärt
• 
  de Frytigsmäärt mit em Standbild vom Jacob van Artevelde
• 
  de Genter Altaar vom Jan van Eyck i de Katedraale St. Bavo