Fritz Keller (Winzer)

Dr Friedrich „Fritz“ Walter Keller (* 2. April 1957 z Fryburg) isch e dytsche Räbbuur, Wyyhändler, Gaschtronom, Hotelier un Fueßballfunktioneer. Vu 2019 bis 2021 isch er dr 13. Bresidänt vum Dytsche Fueßball-Bund gsi. Dervor isch er vu 2010 bis 2019 Bresidänt vum Sportclub Fryburg gsii.

Fritz Keller, 2019

Stäärn-Reschtaurant Schwarze Adler z Oberbäärge

Nei böue Wyyguet Franz Keller mit Chällerwiirtschaft

Lääbe

Dr Fritz Keller isch e Suhn vum Franz Keller Senior un syre Frau Irma us ere Räbbuure- un Gaschtronomefamilie z Oberbäärge am Chaiserstuel. Sy eltere Brueder isch dr Choch Franz Keller. Sy Getti isch dr Fritz Walter, wun er au noch em gnännt woren isch.^[1]

D Räbbuure- un Gaschtronomefamilie het näb em Reschtaurant „Schwarze Adler“, wu scho syter anne 1969 unter syre Mueter Irma un bis hite ununterbroche mit eme Michelin-Stäärn uuszaichnet woren isch, au no Rääbe. Syter 1990 fiert Fritz Keller mit syre Frau Bettina in dr dritte Generation s Wyyguet Franz Keller.^[2] Derno het er dr Wyyimport fir exklusivi Wyy vor allem vu Bordeaux un em Burgund ibernuu. Derzue isch s Hotäll chuu, wu Mitgliid bi L’Art de Vivre Residenzen isch,^[3] un s „Winzerhuus Räbstock“, e typisch badischi Gaschtwiirtschaft. Anne 2013 isch mit em Böu vum neie Wyyguet au no s Reschtaurant „Kellerwirtschaft“ derzue chuu.^[4]

As „Botschafter vu dr Wyykultuur vu Baade“ het er mit syne Wyy internationali Anerkännig gwunne. Dr Keller isch zwanzg Johr lang Vizebresidänt vu dr Sommelier-Union Dytschland gsii un het d Grindig vu dr Sommelier Colleges iniziiert.^[5]

Fueßballfunktioneer

Ab 2010 isch dr Fritz Keller Erschte Vorsitzer vum Fueßballbundesligischt Sportclub Fryburg gsii, ab em Oktober 2014 – noch ere Satzigsänderig – dr Bresidänt.

E Findigskummission het im Augschte 2019 dr Fritz Keller zur Wahl as neie Bresidänt vum Dytsche Fueßball-Bund vorgschlaa.^[6] Am 27. Septämber 2019 isch er vum DFB-Bundesdag aistimmig zum Bresidänt gwehlt wore, as Bresidänt vum Sportclub isch er vorhär zruggdrätte.^[7]

Am 17. Mai 2021 isch dr Keller noch eme Stryt im DFB-Bresidum zruggdrätte.^[8][9] Är het uf ere Sitzig vum DFB-Bresidum am 23. April 2021 dr DFB-Vizebresidänt Rainer Koch, wu friejer Richter am OLG Minche gsii isch, mit em NS-Richter Roland Freisler vergliche ghaa.^[10][11]

Uuszaichnige

• Aral Schlemmer Atlas 2010: „Weingut des Jahres“
• Diners Club 2010: „Winzer des Jahres“
• Eichelmann 2010: Beste Rotweinkollektion
• Gault Millau 2011: „Restaurateur des Jahres“
• 2012 Brillat-Savarin-Plakette „Persönlichkeiten mit prägendem Einfluss auf die Branche und mit besonderen Verdiensten um Gastlichkeit und Tafelkultur“^[12]
• Falstaff 2014: Falstaff Wein Trophy – Lebenswerk als Winzer
• Falstaff 2019: „Kollektion des Jahres“
• Gault Millau 2019: „Winzer des Jahres“ Friedrich und Fritz Keller^[13]

Weblink

• Franz Keller – Weine • Restaurants • Hotel, aigeni Websyte