From Wikipedia, the free encyclopedia
S Drama (vo griechisch dráma (δράμα) „Handlig“) isch näbe dr Epik und dr Lyrik eini vo de drei grundlegende literarische Gattige (analog wird au vo Dramatik gredet), aber au einzelni dramatischi Wärk wärde as Drama bezeichnet. Drama isch Theater mit Teggschtgrundlag, im Unterschied zum improvisierte Schdägriftheater.
S Hauptkennzeiche vom Drama noch em Aristoteles isch d Darschdellig vo dr Handlig dur Dialog. Äso unterscheidet es sich in dr Antike vom Epos, wo verzelt, – sit der Neuziit unterscheidet es sich äso hauptsächlig vom Roman. Noch em modärne Verschdändnis si d Drame gschriibe, für dass si vo Schauschbiiler im Theater ufgfüehrt wärde. Dorum enthalte si hüfig näbe de Dialogteggscht au Awiisige für d Schauschbiiler, und sit em 19. Johrhundert au für ä Regisseur. S Lesedrama isch ä schbezielli Form vom Drama, wo nit in erschder Linie ufgfüehrt, sondern wien ä Roman söt gläse wärde.
D Handlig vom enä Drama isch hüfig in Akt und die sälber si in Szene oder Uftrit iideilt. S klassische französische Drama (Racine, Corneille, Molière) deilt sich in fünf Akt und d Handlig findet an eim einzige Dag schdatt. Die italienische Dradition, wo schdark mit der Opere verbunde isch (vgl. Metaschdasio) het drei Akt lieber. D Form vom Eiakter isch us de Zwüscheschbiil zwüsche de Akt vo de drei- bis fünfaktige Drame entwigglet worde.
S europäische Drama isch zur Ziit vo der griechische Antike im 5. Johrhundert vor dr Ziitwändi z Athen entschdande: dr Aischylos, dr Sophokles und dr Euripides si die wichtigschde Dichter vo dr Dragödie gsi. Dr Aristoteles het im Johrhundert druf in siinere Poetik s Drama in Dragödie und die schbööter entschdandeni Komödie iideilt.
Erschd sit der Renaissance git s ä Wiiterentwicklig vom antike Drama. Älter Drame sind meischdens in Värs abgfasst; in dr neuere Ziit wird in de Sprächschdück die freji Prosa vorzoge. Ass mä im Drama redet, isch nit sälbschdverschdändlig. Mä het d Opere vo öbbe 1600 aa as Wiidergeburt vom des klassische griechische Drama agluegt.
Sit em 18. Johrhundert wärde Bezeichnige wie Schauschbiil, Luschdschbiil, Dragikomödie, Bürgerligs Druurschbiil, Charakterschdück bruucht, wobi die verschiidene Arte nit genau von enander abgränzt si. Sit em 19. Johrhundert wird s Melodrama, wo bsundrigs gfüehlsbetonti oder schbannendi Handlige het, hüfig zum Begriff Drama abkürzt.
![]() |
Dä Artikel basiert uff ere fräie Übersetzig vum Artikel „Drama“ vu de dütsche Wikipedia. E Liste vu de Autore un Versione isch do z finde. |