Dr Benedikt VI. (* z Rom; † Juli 974 ebedert) isch vum 19. Jänner 973 bis Juni oder Juli 974 Papscht gsii.
Vor sym Pontifikat isch dr Benedikt Kardinaldiakon vu San Teodoro gsii. Är isch en Aahänger vum Chaiser Otto I. un isch gege d Hoffnige vu dr Crescentier us em Huus Tusculum, ere remische Adelsfamilie, wu unter em Johannes XIII. uffechuu isch, no däm sym Dod im Spotjohr 972 zum Papscht gwehlt wore. Wel d Wahlbstetigung vum Chaiser het mießen abgwartet wäre, isch er erscht im Jänner 973 gweit wore. Noch em Dod vum Otto im Mai 973 isch er z Rom d Unterstitzig verlore un im Johr druf het en e Gruppe vu remische Adlige unter dr Fierig vum Crescentius de Theodora, eme Suhn vum Johannes Crescentius un dr Theodora dr Jingere, un dodermit Brueder vum Papscht Johannes XIII., abgsetzt un het en in dr Ängelsburg yygspeert. Dr Crescentius de Theodora het derno dr Bonifatius VII. zum Gegepapscht glupft, wu dr Benedikt VI. im Juli 974 het verworgse loo. Wu dr Suhn vum verstorbene Chaiser Otto I., dr Chaiser Otto II., aagruckt isch, isch dr Gegepapscht uf Byzanz gflichtet.
E Papscht „Damasus II.“, wu in e Dail Papschtlischte zwisch em Benedikt VI. un em Benedikt VII. stoht, het s nie gee.
Us sym Pontifikat isch wenig bekannt, nume d Bstetigung vu dr Grindig vum Erzbischtum Prag isch no wichtig.
Uf em Campo Santo Teutonico isch bi Böuarbete anne 1885 e Grabstaifragmänt entdeckt wore, wu vu dr Grabplatte vum Benedikt chennt stamme.[1]
Literatur
- Rudolf Schieffer: Benedikt VI. In: Lexikon des Mittelalters (LexMA). Band 1, Artemis & Winkler, Münche/Züri 1980, ISBN 3-7608-8901-8, Sp. 1858–1859.
- Friedrich Wilhelm Bautz: Benedikt VI.. In: Biographisch-Bibliographisches Kirchenlexikon (BBKL). Band 1, Hamm 1975, Sp. 483.
- Horace Mann: Pope Benedict VI. In: Catholic Encyclopedia, Band 2, Robert Appleton Company, New York 1907 (änglisch)
Weblink
Fueßnote
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
