Alexander Van der Bellen
From Wikipedia, the free encyclopedia
From Wikipedia, the free encyclopedia
Dr Alexander Van der Bellen (* 18. Jänner 1944 z Wien) isch e eschtrychische Wirtschaftswisseschaftler un Bolitiker (Grieni) un syt em 26. Jänner 2017 Bundesbresidänt vu dr Republik Eschtrych.
Dr Finanzwisseschaftler het in dr 1970er bis 1990er Johr as Profässer fir Volkswirtschaftslehr an dr Universitet z Innschbruck un z Wien glehrt. Vu 1997 bis 2008 isch er Bundessprächer vu syre Bartei gsii un vu 1999 bis 2008 Klubobmann vum Griene Klub im Eschtrychische Nationalrot, wun er ab 1994 aaghert het. Vu 2012 bis 2015 isch er Mitglid vum Wiener Gmaindsrot un Landdag gsii.
Dr Van der Bellen isch bi dr Bundesbresidäntewahl 2016 as offiziäll unabhängige Kandidat aadrätte.[1][2] As ain vu sechs Bewärber isch er im erschte Wahlgang am 24. April Zweete wore. Im zweete Wahlgang am 22. Mai 2016 het er gege dr FPÖ ufgstellte Kandidat Norbert Hofer gwunne.[3] Am 1. Juli het s eschtrychisch Verfassigsgricht die Stichwahl wäge Uuregelmäßigkaite fir uugiltig erklert. D Widerholig vo dr Stichwahl isch uf dr 2. Oktober aagsetzt wore. Am 12. September isch bekannt wore, as dr Wahltermin uf dr 4. Dezember verschobe wäre mues, wil de Liim bi gwüssne Briefumschleg, wo d Wahlunderlage drmit verschickt wore sin, nöd guet gsi isch und drum d Guwer nöd richtig kläbt heted.[4] Bi dr Widerholig vo dr Stichwahl am 4. Dezember isch dr Norbert Hofer em Alexander Van der Bellen wider unterläge. Am 26. Jänner 2017 isch dr Van der Bellen aaglobt wore.
Bi dr Bundesbresidäntewahl am 9. Oktober 2022 isch er drotz verschidene Konkurränte im erschte Wahlgang mit ere absolute Meehait im Amt bstetigt wore. Am 26. Jänner 2023 isch dr Van der Bellen fir e zwooto Amtszyt aaglobt wore.[5]