ditsche Bolitiker From Wikipedia, the free encyclopedia
Dr Nils Schmid (* 11. Juli 1973 z Trier) isch e dytsche Bolitiker (SPD). Vu 2009 bis 2016 isch er Landesvorsitzende vu dr SPD z Bade-Wirttebärg gsii.
Dialäkt: Undermarkgreflerisch |
Fir d Landdagswahl am 27. Merz 2011 isch er as SPD-Spitzekandidat aadrätte. Im Kabinett Kretschmann I isch er vu Mai 2011 bis Mai 2016 Landesminischter fir Finanzen un Wirtschaft un Stellverdrätter vum Minischterbresidänt Winfried Kretschmann gsii. 2017 isch er in Bundesdag gwehlt wore.
Noch em Abitur 1993 am Eduard-Spranger-Gymnasium z Filderstadt un syym Zivildienscht in eme Altehaim het dr Schmid e Studium vu dr Rächtswissehschaf an dr Eberhard-Karls-Universitet Dibenga absolviert, wun er anne 1999 mit em Erschten juristische Staatsexame abgschlosse het. S Rererendariat, wun er zytwyys bim Energiversorgigsunternämme Energiedienst gschafft het[1], het er 2001 mit em Zwaite juristische Staatsexame abgschlosse. Zyterhär isch er as Rächtsaawalt zuegloo. 2006 het er am Lehrstuehl vum Ferdinand Kirchhof promoviert.
Syt 1991 isch dr Schmid Mitglid vu dr SPD. Är het sich zerscht bi dr Jusos engaschiert un isch vu 1993 bis 1997 Juso-Chraisvorsitzende z Esslenge gsii. Dernäbe isch er vu 1996 bis 1998 stellverdrättende Landesvorsitzende vu dr Jusos z Bade-Wirttebärg gsii. Syt 1993 ghert er em SPD-Chraisvorstand Esslenge aa un isch syt 1999 Vorsitzende vum SPD-Ortsverain Nirtenge.
Syt 1997 ghert dr Schmid em Landdag vu Bade-Wirttebärg aa. Dert isch er syt Juni 2001 finanzbolitische Sprächer vu dr SPD-Landdagsfraktion. Wun er 2006 wider in dr Landdag gwehlt woren isch, isch er zum stellverdrättende Vorsitzende vu dr SPD-Landdagsfraktion ufgruckt.
Dr Nils Schmid isch iber s Zwaitmandat vum Wahlchrais Nirtenge in dr Landdag yywoge. Bi dr Landdagswahl 2001 het er do 32,0 % vu dr Stimme iberchuu, 2006 sin s 23 % gsii. Bi dr Landdagswahl 2011 isch dr Nils Schmid as Wahlchraiskandidat z Reitlenge aadrätte.
Wi d Landesvorsitzendi vu dr SPD Bade-Wirttebärg, d Ute Vogt, vu ihrem Amt as Vorsitzendi vu dr SPD-Landdagsfraktion zruckdrätten isch, isch dr Nils Schmid am 10. Jänner 2008 in ere Kampfabstimmig um ihri Noofolg in däm Amt mit 20 zue 18 Stimme nume knapp em Claus Schmiedel unterläge.
Dr Nils Schmid isch näb em Claus Schmiedel un dr Hilde Mattheis ain vu drei Kandidate fir d Noofolg vu dr Ute Vogt as Vorsitzender vum SPD-Landesverband gsii. Doderzue het s am 21. Novämber 2009 e Mitgliderbefrogig in dr SPD Bade-Wirttebärg gee. Bin ere Wahlbedailigung vu 47,35 % het er in dr Zwootuuszellig unter Berucksichtigung vu dr Zwootstimme 56 % iberchuu gegeniber 37 % fir d Hilde Mattheis. Bi dr Erschtstimme sin s 46,2 % vu dr Stimme fir ihn gsii, 29,1 % fir d Hilde Mattheis un 22,8 % fir dr Claus Schmiedel.[2] Dr Nils Schmid isch derno uf Landesbarteidag vu dr SPD z Charlsrue am 27. Novämber 2009 mit 265 vu 299 Stimme vu dr Delegierte (88,63%) zum Landesvorsitzende gwehlt wore.[3] Am 16. Oktober 2010 isch dr Nils Schmid uf em Landesbarteidag vu dr SPD z Ulm mit iber 92 % vu dr Stimme zum Spitzekandidat vu dr SPD fir d Landdagswahl 2011 un dodermit zum Rusforderer vum Stefan Mappus gwehlt wore.
No dr Wahlniderlag vu dr SPD bi dr Landdagswahl 2016 het dr Schmid am 4. Juni 2016 aagchindet, ass er bi dr negschte Vorstandswahl nimi aadritt.[4] Am 22. Oktober isch d Leni Breymaier zue syre Noofolgeri gwehlt wore.
Zue dr Bundesdagswahl 2017 isch dr Schmid as Kandidat vu dr SPD im Wahlchrais Nirdenga aadrätte. Uf ere Mitgliderversammlig am 6. Dezämber 2016 isch er vu 92,6 % vu dr Mitglider nominiert wore. In Bundesdag isch er iber d Landeslischt vu dr SPD gwehlt wore.[5]
Anne 2003 isch er Grindigsmitglid vum Stiftigsrot vu dr Werner-Weinmann-Stiftig gsii, wu vor allem Yyrichtige vu dr Alte-, derzue Chinder- un Jugendhilf im Ruum Nirtenge un Filder ferderet. 2003 het er dr Vorsitz vum Kuratorium vu dr Chunschtstiftig Bade-Wirttebärg ibernuu. 2004 isch er in dr Verwaltigsrot vu dr Landesbank Bade-Wirttebärg beruefe wore. 2006 hän e d Mitgliider vum Wilhelma-Ferderverain in dr Vorstand gwehlt. 2007 isch er Mitgliid vum Kuratorium vu dr Akademie Schloss Solitude wore, 2008 Mitgliid vum Kuratorium vum Dytsch-Tirkische Forum Stuegert.
Dr Nils Schmid het mit syyre tirkischstämmige Frau e Dochter, derzue het sy Frau Tylay no ne Suhn in d Eh mitbrocht. Si wohne z Nirtenge. Dr Schmid isch evangelisch.