From Wikipedia, the free encyclopedia
Dr Hansruedi Giger (* 5. Februar 1940 z Kuur; † 12. Mai 2014 z Züri), aigetli Hans Rudolf Giger un besser bekannt as HR Giger, isch e Schwyzer bildende Chinschtler, Moler un Oscarprysdreger gsii.
Dr H. R. Giger isch as Suhn vum Apedeker Hans Richard Giger un syre Frau Melly Giger z Kuur im Bindnerland uf d Wält chuu. Ase Chind isch er seli schych gsii. Är isch katholisch erzoge wore, was speter Yyfliss ghaa het uf sy Chunscht. No dr Matura het er ab 1962 Innenarchitäktur un Induschtrydesign an dr Chunschtgwärbschuel z Züri studiert. In dr Zyt vu syre Uusbildig sin syni erschte Tuschefäderezaichnige entstande („Atomkinder“), sonigi frieje Wärch het er in dr Untergrundzytige „Hotcha!“, „Clou“ un „Agitation“ vereffetligt. Bekannt wore isch er no 1966, wun er sy Studium erfolgrych abgschlosse un sich as Innenarchitäkt etabliert het. Är het as Designer an ame Biroomeebelprogramm vu dr Firma Knoll Inational gschafft, doderdur ischer as Innenarchitäkt bekannt wore, was e weng speter derno schließli zue dr erschte Uusstellig vu syne Wärch gfiert het. Är het sy Brotberuef zerscht nit ufgee un het wyter as Designer un Innenarchitäkt gschafft. In dr negschte zwai Johr het er e Huffe Skulpturen un Bilder gschaffe wie zum Byschpel „Gebärmaschine“, „Astreunuchen“ oder „Koffer-Baby“, wun er noch ere wyter Uusstellig z Züri kommerziäll dermit bekannt un erfolgrych woren isch. Scho anne 1968 het er nume no as Chinschtler un Filmmacher gschafft. As Szene- un Koschtimbildner het er mit sym Stil bekannti Film breegt wie Alien (1979) oder Species (1995). Fir syni Mitwirkig an Alien het dr Giger anne 1980 en Oscar in dr Kategory Beschti visuälli Effäkt iberchu un sy Stil isch eme braitere Publikum bekannt wore.
Dr Giger isch e baar Johr lang mit dr Schwyzer Schauspileri Li Tobler liiert gsii, wu sich am Pfingschtmentig 1975 umbrocht het. Anne 1979 het dr Giger dr Mia Bonzanigo ghyrote; d Eh isch no anderthalb Johr uusenandergange. D Mia Bonzanigo het dr Giger unter anderem zue dr Bildserie Erotomechanics inschpiriert. Frynd vum Giger sin unter anderem dr Chinschtler Friedrich Kuhn un dr Timothy Leary gsi.
Em Giger sy Wärch cha em Surrealismus zuegrächnet wäre. Im Verglych zum beriemteschte Verdrätter vu däre Stilrichtig, em Salvador Dalí, wird dytli, wie andersch dr Blickwinkel vum Giger uf d Wält isch. Yyfliss vum Phantastische Realismus cheme au dur d Fryndschaft mit Verdrätter vu dr Wiener Schuel vum Phantastische Realismus wie em Ernst Fuchs. E Thema, wu in syne Wärch alsfurt erschynt, isch dr vu ihm breegt Uusdruck vu dr Biomechanoide, e Verschmilzig vu Tächnik un Mechanik mit em Kreatyrlige, im e versterende bis morbide Zämmespil mit sexuällen Aadytige. Näbe sym wichtige molerische Wärch het dr Chinschtler au Grafike, Skulpturen un Mebel gstaltet
Dr H. R. Giger het z Züri-Seebach gläbt un gschafft. Am 12. Mai 2014 isch er in eme Zürcher Chrankehuus an dr Verletzige gstorbe, wun er si zuezoge gha het bi me Sturz..[1]
Ab 1960 het dr Giger Tuschezaichnige in Schuelerzytige un Untergrundzytschrifte vereffetligt, zem Byschpel d Serie Atomkinder (1963–64).
Ab 1966 sin di erschte Bilder entstande, di amischte dervu in El. Wu dr Giger anne 1972 d Spritzpischtol (Airbrush) entdeckt gha het, isch des sy bevorzugt Molwys wore. In dr negschte 20 Johr sin rund 600 Bilder mit Tusche und Acrylfarben enstande, e baar dervu iber vier Meter brait. Aafangs 1990er Johr het dr Giger d Molerei ufgee un het nume no dreidimensional gschafft.
Di erschte plastische Arbeite sin Mitti 1960er Johr entstande. Um die Zyt het dr Giger gärn mit Polyeschter gschafft, z. B. 1968, wun er Koschtim fir dr Schwyzer Film Swissmade vum Fredi M. Murer gschaffe het. Speter het er au Objäkt us Bronze, Aluminium un andere Materialie gmacht. In dr 1990er Johr het dr Giger fir sy Zodiacbrunne di zwelf Dierkraiszaiche as Biomechanoide gschaffe. Um des Zyt, wu dr Giger mit em Molen ufghert het, het er au aagfange, e Dail vu syne friejere Bilder in s Dreidimensional umzsetze, unter anderem Gebärmaschine un Passagen.
Di bekannteschte Meebelstuck vum Giger sin di fir dr Film Dune entworfene Harkonnen-Stiel. Dernäbe het dr Giger au Disch, Spiegel, Lampen un anderi Objäkt entworfe, wie z. B. e Mikrofonständer fir dr Jonathan Davis vu dr amerikanische Nu-Metal-Band Korn.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
