Flughafen Moskau-Domadedowo
en Flughafe z Russland From Wikipedia, the free encyclopedia
Der Flughafe Domodedowo (russisch Домодедово) isch der zwöitgröschti Flughafe vo der russische Houptstadt Moskau. Är lyt südlech vo der Metropole, 35 Kilometer vom Stadtzäntrum u 22 Kilometer vo der Moskauer Ringoutobahn MKAD ewäg, ganz y der Neechi vo der Stadt Domodedowo. Der Flughafe lyt 181 Meter über em Meeresspiegel.
| Dialäkt: Bärndütsch |
| Flughafe Moskau-Domadedowo Домодедово | |
|---|---|
 | |
 | |
| Känndate | |
| ICAO-Code | UUDD |
| IATA-Code | DME |
| Koordinate | |
| Höchi über MSL | 181 m (594 ft) |
| Verchehrsaabindig | |
| Entfärnig vom Stadtzäntrum | 35 km südlich von Moskau |
| Bahn | Aeroexpress zur Metro u zum Nahverchehrszug (Elektritschka) |
| Nohverchehr | Expressbös |
| Basisdate | |
| Ufgmacht am | März 1964 |
| Betriiber | East Line Group |
| Flechi | 1280 ha |
| Terminal | 2 (+1 i Planig) mit 22 Fluggaschtbrügge |
| Passagier | 28.200.000 (2012) |
| Luftfracht | 196.984 t (2012) |
| Flug- bewegige | 253.500 (2012) |
| Kapazitet (PAX pro Johr) | 21 Mio, nach 2012: 35 Mio. |
| Start- un Landebahne | |
| 14L/32R | 3793 m × 53 m Stahlbeto |
| 14R/32L | 3500 m × 60 m Zementbeto |
Ursprünglech isch der Flughafe houptsächlech für e Inlandsverchehr bestimmt gsi, zahlrychi Fluggsellschafte hei aber, wäge zuenähmende Problem uf em grössere Flughafe z Moskau-Scheremetjewo, ihri Flüg nach Domodedowo verleit. Di privati Betribergsellschaft het ds Konzept vo meine Moderne Flughafe mit weschtlechem Standart verfolgt.
Am 24. Jänner 2011 isch der Flughafe Ziil vo mene terrorischtische Aschlag gsi.[1]
Im Jahr 2017 sy über 30 Millione Passagier über Domodedowo gfloge.[2] Somit isch Domodedowo der zwöitpopulärschti Moskauer Flughafe, grad nach em Flughafe Moskau-Scheremetjewo u vor em Flughafe Moskau-Wnukowo. Betriibe wird der Flughafe vo der Firma East Line, die hei der Flughafe für 75 Jahr gmietet. D East Line ghöre di zwöi Terminals u diversi anderi Alage. Nur ds Flugfäld befindet sech under staatlecher Kontrolle.
Im Jahr 2006 isch ds Terminal in es nationals u nes internationals Terminal ufteilt u grosszügig usboue worde. Dür das isch d Kapazität vo 14 Millione Passagier uf 21 Millione Passagier gstyge. Näbe de beide Terminals git’s no Vorfäldstellplätz für d Flugzüüg. Zu dene wird me mit Neoplan- oder Cobus-3000 Flughafetransportbösse gfahre.
Es git zwöi Parallel azflüügendi Start- u Landebahne, 3000 u 3800 m läng. U i de Flächenutzigsplän isch Ruum für sächs wyteri Landebahne yplanet. Pro Stund chöi insgesamt bis zu 70 Starts u Landige abgwicklet wärde.
Am 24. Jänner 2011 isch es um 16:32 Uhr[3] Ortszyt im Bereich vom Flughafeterminal zu nere Explosion cho. Da derby sy 35 Persone töt u 170 Persone verletzt worde.[4] Es het sech offesichtlech um ene Sälbstmordaschlag ghandlet.
.jpg)
- Di schnällsti Verbindig isch der Aeroexpress-Zug, dä fahrt im 30 oder 60-Minute-Takt ohni halt zum Pawelezer Bahnhof u drümal am Tag zum Kursker Bahnhof sowi zum Bahnhof Kalantschowskaja. D Fahrzyt betreit öppe 45 Minute u e Einzelfahrt chöschtet um di 470 Rubel i der 2. Klass (“Standard”) u öppe 1000 Rubel i der 1. Klass (“Business Class”).[5] Zytewys git’s d Müglechkeit, a 10% bilegeri Onlinebilett sowi a nes “Metro+”-Bilett, wo ou für ne Fahrt mit der Metro gültig isch, z cho. Der vorhär aboteni Check-in am Pawelezer Bahnhof isch am 1. Jänner 2011 ygstellt worde.
- D Fahrt mit em normale Vorortszug choschtet nur 84 Rubel, allerdings betreit d Fahrzyt öppe 80 Minute, u es exischtiert kei Taktfahrplan.
- Bösse u Sammeltaxis fahre vo der Metrostation Domodedowskaja der “grüene” Samoskworezkaja-Linie zum Flughafe.
- Der Flughafe isch über ne Näbezweig vo der russische Fernstrass M4, wo zu nere Outobahn usboue isch wirde, z erreiche.
Umstyg mit Flughafewächsel
D Aeroexpress-Züg sy mittlerwyle in ere Gsellschaft zämegfasst. Si git es Informationsblatt mit allne drei Linie use u het ou e Homepage. E schnälle Flughafewächsel isch dür d Benützig vo der Metro zwüsche zwöine Zylbahnhöf müglech:
- D Linie Scheremetjewo – Wyssrussische Bahnhof: Umstyge mit der grüene oder der bruune Metro-Linie
- D Linie Domodedowo – Pawelezer Bahnhof: Umstyge mit der grüene oder der bruune Metro-Linie
- D Linie Wnukowo – Kiewer Bahnhof: Umstyge mit der bruune Metro-Linie
D Metro-Fahrt zwüsche zweene Bahnhöf duuret öppe 30 Minute. Für e Flughafewächsel zwüsche zweene Moskauer Flughäfe sy öppe 3 Stund nötig. Das isch wäsendlech schneller als mit em Taxi.
Zwüsche de beide Rollfäldbahne i südöschtlecher Richtig vom Abfertigungsgeböide sy sehr vil russischi Verchersflugzüüg elterer Bouart, teilwys scho usgschlachtet (Triibwärch, Türen u verschiideni widerverwändbari Ersatzteili usboue), abgstellt. Vili vo ihne stamme vo nümm exischtierende Fluggsellschafte wi zum Byspiil d Domodedovo Airlines oder der AiRUnion.
Aber ou hüt no existierendi russischi Airlines stelle usgmuschtereti Luftfahrzüüg dert ab. Di russischi Fluggsellschaft Transaero het 2013 alli Flugzüüg vom Typ Boeing 747-200/-300 usgmuschteret. Einigi vo dene Maschine sy dert abgstellt worde.
Einigi Flugzüüg wo dert sy abgstellt worde:
- Iljuschin Il-18D (ohni Kennzeiche)
- Antonow An-10 (ehemals Aeroflot)
- Boeing 757-200 (AiRUnion, VIM)
- Boeing 747-200/-300 (Transaero Airlines)
- Iljuschin Il-62 (vo verschidene Airlines)
- Iljuschin Il-86/Il-96 (Domodedovo Airlines)
- Tupolew Tu-154 (vo verschidene Airlines)
Wyter isch e Boeing 737-200 südlech vo der Pischte 14L abgstellt. Am Pischtenändi vo der Pischte 14L lyt bis hüt ds Frack von ere Tu-154 wo 2010 agstürzt isch.
Als erschti internationali Fluggsellschaft isch di damaligi Swissair im Jahr 2001 der Flughafe agfloge.[6] 2006 het British Airways ds Glyche gmacht. Insgesamt biete inzwüsche über 80 verschideni Fluggsellschafte Flüg nach Domodedowo a. Ou di dütschi Lufthansa het ihre ganz Flugbetriib mit em Summerflugplan 2008 nach Domodedowo verleit.
Di meischte Flüg bietet d S7 Airlines (di früechrigi Sibir) a. S7 het uf däm Flughafe ihres Dräjchrüz.
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
