Assur

Assur isch die eltischti Hauptschdadt vo Assyrie gsi, es isch uf em rächte Ufer vom Tigris gläge, und het nochwiislig scho in dr Middi vom dritte Johrduusig exischdiert. Es isch bis ins 9. Johrhundert vor dr Ziitwändi die wichtigschti Schdadt vo de Assyrer gsi. Im Neuassyrische Riich hai Kalach (Nimrud), Dur Scharrukin und denn Ninive si hischdorischi Rolle übernoh. Assur het aber si Wichtikeit nid ganz verlore, wil s Zäntrum vom Assurkult in dr Schdadt bliiben isch und au d König wiiterhii dört begrabe worde si. Im Johr 614 BCE isch d Schdadt vo de Meder under em Kyaxares II. zerschdört worde.^[1]

Absoluti Johreszahle us em früeie Alterdum si notorisch ungenau. Johreszahle in däm Artikel si Richtlinie und sötte nid z ärnscht gnoh wärde: Für s dritte und zweite Johrduusig vor dr Ziitwändi gits verschideni Standard-Chronologie, wo aber um Johrzähnt von enander abwiiche.

Charte vo Mesopotamie.

Im 1. Johrhundert vor dr Ziitwändi isch Assur widr ufbaut worde und isch es Verwältigszäntrum vo de Parther gsi. Aber scho drei Johrhundert schböter isch d Schdadt vom Sassanidekönig Schapur I. widr zerschdört worde.

Es letschts Mol isch dr Ort im 12. und 13. Johrhundert under de Zangide vo Mossul bewohnt gsi, und het au ä ziitlang zum mongolische Riich vo de Ilchane ghört. Denn isch s aber verfalle und nüm besiidlet worde.

Dr Schdadtgott vo Assur und Nationalgott vo de alte Assyrier isch dr Gott Assur gsi. Under de Parther het er Assor gheisse.

D Ruine si in de Johr vor em erschte Wältchrieg (1904-1913) zum Deil uusgrabt worde^[1] vo de dütsche Archäologe Robert Koldewey (1855-1925), Walter Andrae (1875-1956) und andere. Erscht in de Johr 2001 und 2002 het mä widr afo Uusgrabige mache.

Assur ghört siit 2003 zum Wältkulturerb vo dr UNESCO.

Quelle

1. dtv-Lexikon, Deutscher Taschenbuch Verlag, München 1970, Band 1, S.228