Alexej von Jawlensky
From Wikipedia, the free encyclopedia
Dr Alexej vo Jawlensky (ursprünglig Alexei Georgijewitsch Jawlenski; russisch Алексей Георгиевич Явленский, wüss. Transliteration Alexej Georgievič Javlenskij; * 13. Merz (jul.)/ 25. Merz 1865 (greg.)[1][2] in dr Nöchi vo Torschok (Russland); † 15. Merz 1941 z Wiisbade) isch e russisch-dütsche Mooler gsi. Vo 1892 bis 1921 isch er dr Läbenspartner vo dr Marianne von Werefkin gsi. Wo dr Erst Wältchrieg aagfange het, hai si as Russe Dütschland müesse verloo und si in d Schwiiz go läbe. Won er sich noch em Chrieg vo dr Werefkin drennt het, isch er uf Wiisbade züglet. 1930 het er die dütschi Staatsbürgerschaft beaadragt und sä 1934 au übercho.
Dr Jawlensky zelt as Mooler vom Expressionismus zum Umfäld vo dr Redaktionsgemeinschaft Der Blaue Reiter, wo vom Wassily Kandinsky und vom Franz Marc gründet worden isch.
Öb dr Jawlensky adlig gsi isch, isch nid bewiise. Scho dr Kandinsky het gmeint, ass sich dr Jawlensky zu Unrächt mit eme Adelsditel wurd schmücke.[3] Offiziell het er s Adelsprädikat offebar nit bruucht. So stoht uf em Emaille-Schild vo siiner „Zeichen und Malschule“ nume „A. Jawlensky“.[4] Au het er sich z Münche mit ere Visitecharte ohni „von“ siine Zitgenosse vorgstellt.[5]
Dr Jawlensky het es vilsitigs Œuvre hinderlo, wo im ene vierbändige Catalogue Raisonné[6] (CR) dokumentiert isch. Es het aber din Zueschriibige, wo von e baar Spezialiste nit deilt wärde. Vile Felschige, wo ins Wärkverzeichnis ufgnoh worde si, het mä in der Jawlensky-Usstellig chönne gseh, wo s Essener Museum Folkwang 1998 organisiert het.[7] Zur gliiche Zit isch dr vierti Band vom CR uusechoo.[8] Die offizielli Abschriibig und neuste Forschigsresultat zum Œuvre findet mä in dr Reihje "Bild und Wissenschaft".[9]