Stephane Kirkland

Stephane Kirkland (binne 'n Franse konteks gespel as Stéphane Kirkland) is 'n Frans-Amerikaanse wetenskaplike en argitek met gevorderde akademiese grade in kunsgeskiedenis, argitektuur, stedelike reg en ekonomie.

Kirkland, 'n boorling van Parys van Frans-Amerikaanse afkoms met woonplekke in die Franse hoofstad en Brooklyn, New York, het bekendheid verwerf met sy werke oor stadsbeplanning, argitektuur en geskiedenis, waaronder Paris Reborn, 'n gesaghebbende monografie oor die grootskaalse modernisering van Parys deur Baron Haussmann onder die bewind van keiser Napoléon III wat in 2013 gepubliseer is.^[1][2]

Biografie

Stephane Kirkland is in 1969 in Parys gebore. Hy het sy hoërskoolopleiding aan die befaamde Phillips Academy in Andover, Massachusetts ontvang en vervolgens aan die Paryse École d’Architecture Paris-Villemin (tans ENSA Paris-Malaquais) - een van die tersiêre instellings wat gestig is om die École des Beaux-Arts te vervang - in argitektuur gestudeer. In 1994 het hy sy graad as argitek ontvang (die Franse staatsdiploma waarvolgens hy sy kwalifikasie as Diplômé par le gouvernement, kort DPLG, mag beskryf).

Hy het sy nagraadse studies in argitektuurgeskiedenis aan die Université Paris I Panthéon-Sorbonne voortgesit waar hy die graad Diplôme d’études approfondies (DEA) behaal het. Verdere nagraadse studies in stedelike reg en ekonomie het hy aan die Université Paris II Panthéon-Assas voltooi.

Nadat hy vier jaar lank, tussen 1994 en 1998, as argitek in Toulouse werksaam was, het hy in 2000 'n Meestersgraad in Besigheidsadministrasie (MBA) aan die New York University se Stern School of Business verwerf.

Vervolgens was hy as stategiekonsultant vir die konsultasiemaatskappy Marakon Associates in Londen en Amsterdam werksaam. In 2002 is hy deur die onderneming Centrica plc aangestel, 'n internasionale rolspeler in die energiebedryf, waar hy tot 2011 betrokke was by die ontwikkeling van sakestrategieë, samesmeltings en oornames asook algemene bestuursake in kantore in Londen, Parys, New York en Pittsburgh. Ná sy terugkeer na Parys was hy tussen 2012 en 2015 in die argitekte-ateljee Caméléon3 werksaam.

Tot en met Februarie 2019 het Stephane Kirkland die pos van City Executive Paris (hoof uitvoerende beampte vir Parys) vir die onderneming Arcadis beklee, 'n internasionale rolspeler in argitektuur, ontwerp en konsultasiedienste vir eiendomme, grondbesit en natuurlike hulpbronne. Tans is hy as Arcadis se direkteur in die afdeling geboue (Director of the Buildings Business Line) werksaam.^[3]

Doseer- en skryfwerk

Stephane Kirkland is as dosent verbonde aan die Institut d’Études Politiques (“Sciences Po”) in Parys waar hy op stedelike studies fokus. As outeur publiseer hy werke oor die geskiedenis van Parys en stedelike aangeleenthede. Hy is 'n genoot van die Project for Public Spaces in New York.

Verwysings

1. Stephane Kirkland: Paris Reborn. New York: St. Martin's Press 2013
2. "stephanekirkland.com: Paris Reborn. Besoek op 5 September 2019". Geargiveer vanaf die oorspronklike op 3 September 2019. Besoek op 5 September 2019.
3. fr.linkedin.com: Stephane Kirkland. Besoek op 5 September 2019^{[dooie skakel]}

Eksterne skakels

Essays en artikels

• arcadis.com: Reinventing Paris