Sechemchet

Sechemchet (ook Sekhemkhet of Djoserteti en bekend onder die Hellenistiese naam Tyreis volgens Manetho) was ’n Egiptiese farao van die 3de Dinastie van die Ou Ryk. Hy het vermoedelik van omstreeks 2648 tot 2640 v.C. regeer. Hy was moontlik die broer of oudste seun van farao Djoser.

Sechemchet
Tyreis, Sekhemkhet, Djoserteti
Reliëfwerk van Sechemchet van Wadi Maghareh.
Farao van die 3de Dinastie
Periode	6 of 7 jaar, omstreeks 2650 v.C.
Voorganger	Djoser
Opvolger	Sanacht (waarskynlik) of Chaba
Monumente	Piramide van Sechemchet
Sechemchet in Egiptiese hiërogliewe
Serech of Horusnaam Nomen of geboortenaam
Portaal    Antieke Egipte

Bewind

’n Kleiseel van die eiland Elephantine wys Sechemchet se Horus- en Nebtyname.

Min is oor Sechemchet bekend, want sy bewind was kort: net ses of sewe jaar. Hy het egter in dié tyd ’n trappiramide by Saqqara laat bou en twee bekende rotsinskripsies by Wadi Maghareh in Sinai agtergelaat. Op die eerste een word hy twee keer uitgebeeld, met verskillende krone op. Op die tweede gryp Sechemchet ’n vyand aan sy hare en lig sy arm in ’n poging om hom met sy seremoniële septer dood te slaan.

Die teenwoordigheid van dié inskripsies dui daarop dat turkoois en koper in Sechemchet se tyd in Sinai gemyn is.^[1][2] Die myne was waarskynlik deur die hele 3de Dinastie aktief, want inskripsies van Djoser en Sanacht is ook daar ontdek.

Familie

Sechemchet se vrou kon Djeseretnebti gewees het, maar dié naam verskyn sonder die titel van ’n koningin en Egiptoloë twyfel oor die ware betekenis en lees van die naam.^[3] Dit is ook al gelees as "Djeser-Ti" en geïdentifiseer met die cartouchenaam "Djeser-Teti" wat aangedui word as die direkte opvolger van Djoser.^[4] Sechemchet het vir seker kinders gehad, maar geen name is dusver gevind nie.

Piramide

Sechemchet is onder sy piramide by Saqqara begrawe, naby dié van Djoser. Die piramide is van die begin af as ’n trappiramide beplan. As dit voltooi was, sou dit ses of sewe trappe gehad het. Nes Djoser s’n is Sechemchet se piramide van kalksteenblokke gebou.

Dit is nie voltooi nie, waarskynlik weens die koning se skielike dood. Net die eerste trap is voltooi en die monument het dus eerder die vorm van ’n groot mastaba.

Verwysings

1. Morsi Saad El-Din u. a.: Sinai. The site & the history. Essays. Photographs by Ayman Taher. New York University Press, New York NY 1998, ISBN 0-8147-2203-2, page 30.
2. Jean-Pierre Pätznick: Die Abfolge der Horusnamen der 3. Dynastie. In: Jean-Pierre Pätznick: Die Siegelabrollungen und Rollsiegel der Stadt Elephantine im 3. Jahrtausend v.Chr. Spurensicherung eines archäologischen Artefaktes (= BAR. International Series. Vol. 1339). Archaeopress, Oxford 2005, ISBN 1-84171-685-5, page 76–79.
3. Wolfgang Helck: Untersuchungen zur Thinitenzeit. Harrassowitz, Wiesbaden 1987, ISBN 3-447-02677-4, pp 108, 117.
4. Toby A. H. Wilkinson: Early Dynastic Egypt. Routledge, London/New York 1999, ISBN 0-415-18633-1, page 98.

Eksterne skakels

• Hierdie artikel is vertaal uit die Engelse Wikipedia