Die Laerskool Tafelberg was 'n Afrikaansmedium-laerskool in die Kaapstadse voorstad Woodstock en een van die eerste skole in die Skiereiland wat onderrig in Afrikaans aangebied het.
Min is oor die skool se ontstaan of uiteindelike sluiting bekend. Die skool is wel voor 1936 gestig, want in daardie jaar meld 'n verslag van die Kaaplandse onderwysdepartement dat die skool 250 leerders het wat onderrig gekry het by twee onderwysers en vyf onderwyseresse. Naas die Laerskool Groote Schuur, wat in Januarie daardie jaar gestig is en teen die einde van die jaar reeds 94 leerders en drie onderwysers gehad het, was daar in die skoolraaddistrik nr. 2 van Kaapstad ook nog die Afrikaanse Laerskool Nassau op die grens van Observatory en Soutrivier, wat toe reeds 509 leerders gehad het. Dit was 'n voortsetting van die Rochester Road Public School, wat van 1916 dubbelmedium was, maar in Januarie 1934 slegs Afrikaans geword het.
Soos die geval met die Nassau-skole, het Laerskool Tafelberg voorsien in die behoeftes van meesal verarmde Afrikaners wat na Kaapstad gekom het in die hoop om werk in die ontluikende fabrieke van die voorstede naasaan die middestad te kry. Mettertyd het die inwoners se ekonomiese posisie egter verbeter en meer en meer het uit Observatory, Woodstock en Maitland na veral die noordelike stadsgebiede verhuis. So het die behoefte aan Afrikaansmedium-skole in die gebied algaande gekwyn tot al die skole uiteindelik gesluit het en Maitland se Laerskool Oranje in 1995 met die Engelsmedium Maitland Public School as die dubbelmedium Laerskool Koeberg saamgesmelt het.
Jare na sy sluiting was Laerskool Tafelberg in die nuus toe die destydse regering in Oktober 1991 besluit het om 12 ongebruikte blanke skole aan die Huis van Verteenwoordigers (vir gebruik as kleurlingskole) en die departement van onderwys en opleiding (vir gebruik deur swart leerders of as tegniese kolleges) oor te dra. In Augustus 1992 het 'n afvaardiging van ouers, onderwysers en leerders uit Khayelitsha met die Kaaplandse onderwysdepartement en die departement van onderwys en opleiding ontmoet ná talle skole, waaronder die Laerskool Tafelberg, beset is deur leerders van die township wat in skofte moes skoolgaan omdat hulle skole oorvol was. Tafelberg is beset deur duisend leerders van die Thandokulu High School, wat vandag gehuisves word in die gebou wat van 1962 dié van die Laerskool Nassau was.
- Nog twaalf leë blanke skole vir gebruik van gekleurdes KP dreig met uitbarsting wat tragiese gevolge sal hê[dooie skakel] Die Burger berig oor die oordrag van die skool.
- Leë blanke skole vandag bespreek Die Burger berig oor die skoolbesetting.
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
