Jonathan Ive

Sir Jonathan Paul (Jony) Ive, KBE (* 27 Februarie 1967 in Chingford, Londen) is 'n Britse ontwerper wat 'n beslissende bydrae gelewer het tot die ontwerp van baie produkte van die Amerikaanse rekenaar- en tegnologiereus Apple, Inc.

Jonathan Ive

As Apple se hoofontwerper was hy ook betrokke by die ontwerp van die grafiese koppelvlak van sagteware, die verpakking van produkte, groter argitektoniese Projekte soos die hoofkwartier Apple Park en Apple-winkels dwarsoor die wêreld. Meer as 5 000 patente is aan Ive toegeken, net soos pryse in die ontwerpbedryf. So is Jonathan Ive aangewys as die Londense Ontwerpmuseum (London Design Museum) se eerste Ontwerper van die Jaar (in 2003). Daarnaas is die Design and Art Direction (D&AD) President’s Award (in 2005) en die Cooper-Hewitt National Design Museum’s Product Design Award (in 2007) aan hom toegeken.^[1]

Op 27 Junie 2019 het hy aangekondig dat hy na byna dertig jaar uit sy pos sal bedank om sy eie kreatiewe besigheid, LoveFrom, te vestig - met Apple, Inc. as een van sy vernaamste klante. Ive sal opgevolg word deur Evans Hankey (ontwerp van hardeware) en Alan Dye (sagteware).^[2]

Biografie

Jonathan Ive is in 'n familie van ingenieurs en ambagslui gebore. Sy grootvader was 'n ingenieur, terwyl sy pa, 'n silwersmid, as dosent aan die Middlesex Polytechnic (tans Middlesex University) verbonde was. Een van die kersgeskenke, wat Jonahan van sy pa ontvang het, was 'n dag in sy ateljee waar hy iets volgens sy eie wens kon vervaardig - mits hy die projek vooraf sorgvuldig beplan en gedetailleerde tekeninge daarvan gemaak het.^[3] Toe hy 13 of 14 jaar oud was, het Jonathan besluit om self 'n beroepsloopbaan in 'n kreatiewe veld te volg - iets «met die tekenpen in die hand».

Hy het sy skoolopleiding aan die Chingford Foundation School en Walton High School in Staffordshire, Engeland gevolg en vervolgens in industriële produkontwerp aan die Northumbria University se Newcastle Polytechnic Art School gestudeer. Hier het hy in 1989 sy BA-graad behaal. Ives het sy loopbaan in die ontwerpateljee Tangerine te Londen begin waar hy onder meer die produkontwerp vir internasionale ondernemings soos Nokia en Samsung Electronics behartig het.

Verwysings

1. Apple.com: Apple Leadership - Jonathan Ive, Chief Design Officer. Besoek op 8 September 2019
2. The Guardian, 27 Junie 2019: Jony Ive, Apple designer behind iPhone and iMac, to exit company after 30 years. Besoek op 8 September 2019
3. "Designlovr.de, 17 Maart 2019: Jonathan Ive - Designer. Besoek op 8 September 2019". Geargiveer vanaf die oorspronklike op 18 Mei 2020. Besoek op 8 September 2019.