Vale S.A.

Vale S.A. (Portugese uitspraak: [ˈvali]) is 'n multinasionale onderneming en aandelemaatskappy in die metaal- en mynboubedryf wat sy setel in Rio de Janeiro, Brasilië het. Dit is daarnaas een van die grootste logistiekondernemings op sy Brasiliaanse tuismark. Die onderneming het sowat 237 000 aandeelhouers op alle vastelande. Sy aandele, wat op die New Yorkse Effektebeurs (NYSE), die B3-effektebeurs in São Paulo (Brasil, Bolsa, Balcão) en Euronext in Parys verhandel word, was in 2014 die tweede mees verhandelde aandele op die NYSE.^[2] Die onderneming het 'n markkapitalisasie van VSA-$67 miljard.

Vale S.A.
Tipe	Brasiliaanse aandelemaatskappy met beperkte aanspreeklikheid (Sociedade Anônima)
Gestig	1 Junie 1942 (as Companhia Vale do Rio Doce / CVRD)
Hoofkantoor	Rio de Janeiro, RJ,  Brasilië
Sleutelpersone	Fabio Schvartsman (hoof uitvoerende beampte) Luciano Siani (hoof finansiële beampte)
Gebied bedien	Wêreldwyd
Industrie	Metaal- en mynboubedryf
Produkte	Ystererts Mangaanerts Ferroallooie Koper Nikkel Steenkool Kunsmis Staal
Inkomste	VSA-$34,0 miljard (2017)
Netto inkomste	VSA-$5,5 miljard (2017)
Werknemers	76 531 (2014)
Dogter- maatskappye	Estrada de Ferro Carajás
Webwerf	vale.com

NASA-satellietfoto van Vale se Carajás-ysterertsmyn - die grootste ter wêreld - in die Noord-Brasiliaanse deelstaat Pará^[1]

Diesellokomotiewe, wat deur General Electric in die VSA vir Vale S.A. vervaardig is, op pad na die uitvoerhawe

'n Vragtrein van Vale se dogteronderneming Estrada de Ferro Carajás vervoer mynbouprodukte

Die Vale Rio de Janeiro, een van Vale S.A. se Valemax-reusevragskepe, bereik Rotterdam-hawe

Vale S.A. is die wêreld se grootste produsent van ystererts en nikkel. Ander belangrike mynbouprodukte, wat deur die onderneming ontgin word, sluit mangaan, ferroallooie, koper, bauxiet, potas, kaolien en kobalt in. Vale S.A. bedryf tans ook nege waterkragsentrales en 'n uitgebreide netwerk van spoorweë en hawens om mynbouprodukte met sy eie skepe na oorsese bestemmings te vervoer.

Vale S.A. bedryf daarnaas een van die wêreld se grootste en modernste staalfabrieke as 'n gemeenskaplike onderneming met 'n Duitse staalvervaardiger, die ThyssenKrupp Companhia Siderúrgica do Atlântico (TKCSA)-aanleg in Rio de Janeiro.^[3]

Verwysings

1. mining-technology.com: Carajás Iron Ore Mine. Besoek op 11 Julie 2018
2. "vale.com: Fasctsheet. Besoek op 11 Julie 2018". Geargiveer vanaf die oorspronklike op 27 Julie 2018. Besoek op 11 Julie 2018.
3. vale.com: Steelmaking. Besoek op 11 Julie 2018