Polymestor

In die Griekse mitologie was Polymestor of Polymnestor (Grieks: Πολυμ(ν)ήστωρ) 'n koning van die Bistoniërs in Thracië. Polymestor verskyn in Euripides se toneelstuk Hekabe en in die Ovidiese mite "Hekabe, Polyxena en Polydoros". Polymestor was ook die naam van 'n Griekse koning van die antieke streek Arkadië.^[1]

Hekabe verblind Polymestor (Giuseppe Maria Crespi, eerste helfte v/d 18de eeu, Koninklike Museums vir die Skone Kunste van België.)

Polymestor dood vir Polydoros. Gravure deur Bauer vir Ovidius se Metamorfoses

Familie

Polymestor was die man van Ilione,^[2] die oudste dogter van Koning Priamos en Koningin Hekabe van Troje. Die paartjie het slegs een seun gehad, Deipylos.^[3]

Mitologie

Gedurende die Trojaanse Oorlog was Koning Priamos bang vir sy jongste seun Polydoros se veiligheid, aangesien Polydoros nie self kon veg nie. Priamos het die kind, saam met geskenke van juweliersware en goud, na die hof van koning Polymestor gestuur om hom van die gevegte weg te hou. Nadat Troje geval het, het Polymestor egter vir Priamos verraai en Polydoros in die see gegooi om die skatte vir homself te hou.

Hekabe, Polydoros se moeder, het sy lyk gevind en die verraad ontdek. Sy het vir Agamemnon gevra om Polymestor na haar toe te bring. Agamemnon het gehoor gegee aan die versoek, gemotiveer deur sy liefde vir Cassandra, ook een van Hekabe se kinders. Hekabe het Polymestor gelok deur te belowe dat sy vir hom 'n skat gaan gee. Hierna het Hekabe die ander Trojaanse vroue toegelaat om Polymestor se seuns dood te maak. Sy het self vir Polymestor verblind deur sy oë uit te krap. Polymestor is verneder omdat hy verblind en kinderloos gemaak is deur slawevroue. Agamemnon het 'n verhoor laat hou, sodat Polymestor sy saak teen Hekabe kon bewys. Polymestor het beweer dat hy die Grieke se belange gedien het deur Polydoros dood te maak voordat hy sy broers en vader kon wreek. Hekabe het hierdie bewering weerlê deur te verklaar dat die Grieke geen belang daarin het om bondgenote met barbare te wees nie. Agamemnon het hom by Hekabe geskaar en Polymestor se optrede as moord verklaar. Agamemnon het hierop sy soldate opdrag gegee om Polymestor gevange te neem. Terwyl hy weggeneem word, profeteer Polymestor die dood van Cassandra, die dogter van Hekabe en Agamemnon.

Verwysings

1. Polymestor, Polymestor 2, seun van Aeginetes 2, was koning van Arkadië na sy vader. Gedurende sy heerskappy het die Lakedemoniërs vir die eerste keer Tegea binnegeval, gelei deur Charillus. Polymestor 2 was kinderloos [Pau.8.5.9].
2. Gaius Julius Hyginus, Verhale 240
3. Hyginus, Verhale 109

Bronne

• Gaius Julius Hyginus, Verhale uit die Mites van Hyginus, vertaal in die Engels en geredigeer deur Mary Grant. Universiteit van Kansas Publikasies in Geesteswetenskaplike Studies. Aanlyn weergawe beskikbaar by die
• Meridor, Ra’anana. “Hecuba’s Revenge Some Observations on Euripides’ Hecuba.” The American Journal of Philology, vol. 99, no. 1, 1978, pp. 28–35. JSTOR, https://doi.org/10.2307/293863. Besoek op 27 Apr. 2023. Topos Text Project.

Eksterne skakels

• Wikimedia Commons het meer media in die kategorie Polymestor.