Henog (Hebreeus: חֲנוֹךְ, H̱anōḵ; Grieks: Ἑνώχ, Henṓkh) is ’n figuur uit die Hebreeuse Bybel van voor die Sondvloed. Hy was die seun van Jered en die pa van Metusalag.
![Thumb](http://upload.wikimedia.org/wikipedia/commons/thumb/3/33/Figures_God_took_Enoch.jpg/320px-Figures_God_took_Enoch.jpg)
Volgens Genesis het Henog 365 jaar oud geword voordat hy deur God weggeneem is: "Hy het naby God geleef en toe was hy nie meer daar nie, want God het hom na Hom toe weggeneem." (Genesis 5:24.) Sommige Christene vertolk dit as dat Henog lewend opgevaar het na die hemel.
Henog is die onderwerp van baie Joodse en Christelike tradisies en word beskou as die skrywer van die Boek van Henog.[1]
Die Nuwe Testament het drie verwysings na Henog uit die afstammelinge van Set (Lukas 3:37, Hebreërs 11:5 en Judas 1:14-15).
Henog in Genesis
Henog verskyn in Genesis as die sewende van die 10 aartsvaders van voor die sondvloed. Volgens Genesis het al die aartsvaders van voor die vloed verskeie eeue gelewe. In Genesis 5 word ’n stamboom van dié 10 figure (van Adam tot Noag) aangegee, met die ouderdom waarop elkeen was toe sy seun gebore is, asook die ouderdom van almal toe hulle dood is.
Henog word deur baie as die uitsondering beskou, want God het hom weggeneem "sonder dat hy gesterf het" (Hebreërs 11:5). Verder was hy volgens Genesis 5:22-29 toe 365 jaar oud, wat baie jonger as die ander is – hulle het almal ouer as 700 jaar geword. Die kort deel van Henog in Genesis 5 eindig met die kriptiese opmerking "toe was hy nie meer daar nie, want God het hom na Hom toe weggeneem". (Genesis 5:24.)
Apokriewe boeke van Henog
Drie omvattende apokriewe boeke word dikwels aan Henog toegeskryf:
- Boek van Henog, wat net in Ge'ez bewaar gebly het, moontlik uit tussen die 3de eeu v.C. en die 1ste eeu n.C.
- Tweede Boek van Henog, wat net in Oudslawies volledig bewaar gebly het, moontlik uit die 1ste eeu n.C.
- 3 Henog, ’n geskrif deur ’n rabbi uit omstreeks die 5de eeu n.C.
Hierdie boeke vertel hoe Henog opgevaar het na die hemel en as bewaker van al die hemelse skatte aangestel is, asook as hoof van die aartsengele en die uitvoerder van God se opdragte. Al die geheime en misterieë is ook aan hom geleer. In 3 Henog word hy geïdentifiseer as die Metatron, die engel wat God se woord oordra. Hy word beskou as die een wat God se openbaring aan Moses oorgedra het en as die dikteerder van die Boek van Jubileë.
Verwysings
Skakels
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.