From Wikipedia, the free encyclopedia
Civil Twilight is 'n Suid-Afrikaanse musiekgroep wat in die vroeë 1990's deur die broers Steven McKellar en Andrew McKellar, en hul skoolmaat Richard Wouters, in Kaapstad in die lewe geroep is. Die drie lede het in hoërskool vanweë hul liefde vir Britse en Amerikaanse rockmusiek bymekaar uitgekom. Al drie is van vroeg af aan musiek blootgestel: Die McKellar-broers se moeder is 'n klassieke pianis, terwyl Richard se ouers, wat in hul jeug saam getoer het en volksmusiek gemaak het, beide die kitaar en die klavier goed kan speel. Steven McKellar is die voorsanger en baskitaarspeler, Andrew McKellar die elektriese kitaarspeler, en Richard Wouters die tromspeler.
Civil Twilight | |
---|---|
Oorsprong | Kaapstad (Suid-Afrika) |
Genres | Indie |
Jare aktief | 1996 — hede |
Etikette | Wind-Up, One October |
Webwerf | civiltwilightband.com |
Lede | Richard Wouters Steven McKellar Andrew McKellar |
![]() |
Van my vroegste herinneringe is van aan die slaap raak tot die klanke van Beethoven of Bach, of van my moeder en vader wat in hul kamer sing. — Richard Wouters[1] |
![]() |
Die drie vriende is deur beroemde musiekgroepe soos Oasis, Led Zeppelin en Nirvana geinspireer en het in November 1996 besluit dat hulle 'n musiekgroep wou vorm sodat hulle self kon deel wees van daardie musiek. Andrew en Richard, wat toe beide vyftien jaar oud was, het van kleins af al saam kitaar gespeel. Hulle was derhalwe verseker van 'n kitaarspeler vir hierdie nuwe groep. 'n Tromspeler het egter geskort, en ná 'n loottrekking beslis het dat Richard die tromspeler sou wees, het hy binne drie dae sy eerste tromles by die bekende Kaapstadse tromsepeler Anthony Cawood geneem. Op hierdie stadium het die groep 'n elektriese kitaarspeler en tromspeler gehad en was op soek na 'n baskitaarspeler.
In Desember 1996, twee weke nadat die idee van 'n nuwe musiekgroep ontstaan het, het Civil Twilight hul eerste repitisie gehou. Richard het eerste saam met sy beste vriend Kevin Mitchell opgedaag met sy nuutverkrygde goedkoop en stokoue tromstel. Andrew het laaste opgedaag, saam met sy broer, Steven (wat twee jaar jonger as hy is) — hulle het saam 'n snit geskryf en aan Richard voorgedra. Hierna is Steven as voorsanger in die groep opgeneem. Aangesien die groep nog sonder 'n baskitaarspeler was, en hulle ook hul eerste gig daarsonder opgevoer het, moes Steven die baskitaar aanleer en die taak van baskitaarspeler sedertdien behartig.
Gedurende die eerste jare van hul bestaan het die groep nie veel regstreekse opvoerings uigevoer nie. Die rede hiervoor was, volgens hulle, nog nie goed genoeg was nie. Hulle hou vol dat hul selfbeeld egter immer gesond was. Ná 'n paar jare van saamoefen het hulle egter meer op gigs in die stad gespeel en het gehore van hulle begin hou. Sedert die eerste snit wat Andrew en Steven vir die eerste repitise geskryf het, het die groep aangehou skryf teen 'n vinnige tempo en vir omtrent elke gig 'n nuwe snit geskryf. Hul skryfproses het hoofsaaklik daaruit bestaan om saam te speel en nuwe riwwe en melodieë soos wat hulle aangaan, te ontdek. Hulle het daarna die snit wat hulle geskep het, gerangskik en Steve het lirieke daarvoor geskryf. Steve het ook die akoestiese kitaar en klavier begin speel en daarvoor snitte geskryf.
![]() |
Daardie twee jare voordat ons na Amerika vertrek het, was die jare wat ons werklik gevorm het. Ons het veel meer deur Suid-Afrika getoer en opgetree en ons het 'n klank van ons eie ontwikkel. Steve se stem het in daardie tydperk ook meer volwasse geraak. Dalk omdat hy toe eers sy puberteit voltooi het! Mense sê altyd dat hy 'n unieke stem het. Ons het dit eers 'n paar jaar gelede werklik agtergekom. — Civil Twilight[1] |
![]() |
Hulle het besluit dat hulle alles bereik het wat hulle ooit in Suid-Afrika sou kon bereik, en het in 2005 na Amerika vertrek om hul drome daar na te strewe. In Augustus 2005 het hulle in Los Angeles, Kalifornië aangekom, waar hulle heelwat gigs uitgevoer het en snel in gewildheid toegeneem het. Hulle het baie industrieblootstelling gekry voordat hulle in laat 2006 'n platekontrak met die indie-vermaaksmaatskappy One October gesluit het. Hulle wou 'n plaat skep waaroor hulle groot kreatiewe en artistieke beheer gehad het, en One October het hulle daardie vryheid gegun.
In Maart 2007 het Civil Twilight ateljee toe gegaan met die platevervaardigers Michael Carney en Noel Golden om hul eerste vollengteateljeealbum te kovervaardig. Tydens opnames in die ateljee het hulle bykans die helfte van hul oorspronklike materiaal geskrap en met nuwe materiaal vorendag gekom soos wat hulle aangegaan het met opneem. Die albums is bykans geheel regstreeks opgeneem, afgesien van 'n paar stem- en kitaardubbelinspelings.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.