From Wikipedia, the free encyclopedia
Amelia Earhart (Atchison, Kansas, 24 Julie 1897 – Stille Oseaan, 2 Julie 1937) was 'n Amerikaanse vlieënier en lugvaartpionier.
Sy het in 1928 bekendheid verwerf toe sy die eerste vrou geword het wat oor die Atlantiese Oseaan gevlieg het. In Mei 1932 het sy haar eerste solovlug oor die Atlantiese Oseaan onderneem. Met hierdie vlug het sy 'n nuwe transatlantiese rekord van 13 ure en 30 minute opgestel. Vir hierdie besonderse prestasie het sy 'n medalje van die Amerikaanse president van dié tyd, Herbert Hoover, ontvang.
Earhart het as 'n offisier op die Luddington-lyn, die eerste passasiersdiens wat tussen New York en Washington DC gevlieg het, gevlieg. In Januarie 1935 het sy 'n solovlug van Hawaii tot in Kalifornië gedoen.
In Junie 1937 het sy haar begin voorberei vir haar "om die wêreldvlug" saam met Fred Noonam. Met die voltooiing van hierdie vlug sou sy die eerste vrou wees wat hierdie ontsaglike afstand met 'n vliegtuig afgelê het.
Op 1 Julie 1937 het hierdie geskiedkundige vlug in Miami begin. Vandaar het hulle na Suid-Amerika gevlieg. Hier het hulle oor die Suid-Atlantiese Oseaan na Dakar in Afrika gevlieg. Nadat hulle oor die Sahara-woestyn is, het hulle na Singapoer gevlieg en vandaar na Australië. Nadat hulle egter van Lae in Nieu-Guinee opgestyg het, het die Amerikaanse Kuswag kontak met die vliegtuig verloor. Die laaste boodskap wat hulle van Earhart ontvang het, was op 2 Julie om 8:45 vm. Daarna het hulle heeltemal kontak verloor en tot vandag toe weet niemand wat gebeur het nie.
Die Amerikaanse Vloot het uitgebreide soektogte geloods, maar daar is nooit enige spoor van die vlieëniers of die vliegtuig gevind nie. Op 18 Julie 1937 het president Roosevelt al die soektogte afgelas en is daar aangeneem dat die vliegtuig in die see neergestort het.
Die geheimsinnige verdwyning van Amelia Earhart en haar medevlieënier het baie spekulasie tot gevolg gehad. Party mense beweer dat hulle deur die Japanners afgeskiet is en gevange geneem is; ander glo dat president Roosevelt hulle op 'n geheime spioenasiesending gestuur het. Nie een van hierdie teorieë kon egter ooit gestaaf word nie.
Amelia Earhart is op 24 Julie 1897 in Atchison, Kansas, in die VSA gebore. Sy was die eerste kind van Edwin Stanton en Amy Otis Earhart. Amelia en haar suster, Muriel, se kinderjare was baie ongelukkig omrede hul pa 'n alkoholverslaafde was. Alhoewel hulle baie rondgetrek het en in baie verskillende skole was, het albei van hulle nog steeds baie goed op akademiese gebied presteer.
Nadat Amelia haar hoërskoolloopbaan voltooi het, het sy beplan om na 'n kollege te gaan vir verdere onderrig. Sy het egter haar planne verander nadat sy met soldate wat in die Eerste Wêreldoorlog beseer is, gepraat het, en het besluit om eerder te gaan verpleeg. Sy het as 'n militêre verpleegster in Kanada begin werk. Toe die oorlog verby is, het sy as 'n maatskaplike werker by Deniston House in Boston gewerk, waar sy Engelse immigrante se kinders in Engels onderrig het.
Amelia het dit altyd geniet om lugskoue by te woon – 'n sport wat baie gewild was gedurende die 1920's. By een van hierdie lugvertonings, waar sy 'n vliegrit van tien minute geneem het, het sy besluit om 'n vlieënier te word. In 1921 het Amelia haar eerste solovlug onderneem en – afgesien van 'n swak landing – het die vlug baie goed afgeloop. Teen 1922 het sy genoeg geld gespaar en kon sy haar eie vliegtuig koop.
Hierna het sy gereeld deelgeneem aan pogings om vliegrekords te verbeter en in Oktober 1922 het sy 'n vliegrekord vir vroue opgestel met 'n hoogte van 14 000 voet, wat 'n paar weke later deur Ruth Nichols gebreek is. In 1925 het sy haar by die Boston-tak van die National Aeronautic Association aangesluit. Gedurende hierdie tydperk het sy baie aandag getrek as vrouevlieënier en die onderwerp van besprekings in koerante en tydskrifte geword. Die Boston Globe het haar as "een van die beste vrouevlieëniers in die VSA" beskryf.
In 1928 het sy saam met die vlieënier Wilmer Stultz en Louis Gordon 'n vlug oor die Atlantiese Oseaan onderneem. Alhoewel sy net as passasier saamgegaan het, was sy die eerste vrou wat die Atlantiese Oseaan in 'n vliegtuig oorgesteek het. In 1931 is sy met die uitgewer George Putnam getroud. In 1937 het sy 'n vlug rondom die wêreld onderneem, wat egter haar laaste sou wees. Nadat sy meer as twee-derdes van die afstand voltooi het, het die Amerikaanse Kuswag kontak met haar verloor bokant die Stille Oseaan. Daar word algemeen aanvaar dat haar vliegtuig êrens in die see neergestort het.
Wikimedia Commons het meer media in die kategorie Amelia Earhart.Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
