Keurajeuën Acèh Darussalam (lam haraih jawoë: كاورجاون اچيه دارالسلام) nakeuh saböh keurajeuën Islam rayeuk bak masa nyan nyang na di Aceh, Asia Teunggara nyang geu peuga lee Sôleutan Ali Mughayat Syah. Keurajeuën nyoë bak masa neumat le Sôleutlan Éseukanda Muda nakeuh salah saböh nibak 5 böh keurajeuën rayeuk lam dônya Islam. Di wilayah pulo-pulo nusantara bak abad 17-18 keurajeuën nyoë nakeuh neumat kuwasa ngon meudèelat seureuta bibeuëh nibak kolonialisme bansa kulét putéh.
Bak puncak jaya keurajeuën nyan nakeuh jeuet keu musôh rayeuek bansa Portugéh nyang meukeurija saban ngon Keurajeuën Joho di Seumeunanjông Meulayu. Keurajeuën Acèh bak masajih neukuwasa punoh ateuëh Seulat Malaka ngon neuatô cara meuniaga lada ngon timah. La'én nibak bideuëng militè nyang cukôp hayeuë bak masa nyan, di Banda Acèh nakeuh jeuët keu pusat meurunoë agama Islam ngon pusat niaga dônya Islam
'Alam neugara Keurajeuën Acèh Darussalam
Hana ceunatat nyang meuhat keu pajan phôn taréh awai ureuëng Acèh, na saboh peuneugah nyang geukheun nanggroë nyoe geupuëga lé bansa Champa, bahsa Acèh nakeuh saboh nibak 10 bahsa lam kawan bahsa Acèh-Chamic.
Raja-raja Acèh geutamong Islam bak teungoh abad keu 15[1]. Keurajeuën Acèh Darussalam geupuga lé Sôleutan Ali Mughayat Syah, nyang geupeuluwah kuwasa gobnyan ateuëh wilayah ujông barôh Pulo Ruja bak thôn 1520. Bak masa gobnyan geupeutalô padum-padum boh keurajeuën lam neugara Keurajeuën Acèh Darussalam lagèe Keurajeuën Deli, Pidië ngon Samudra Pasè ngon lheuh nyan geukuwasa lom keurajeuën Aru. Aneuk gobnyan Alauddin al-Kahar thôn 1571 geupeuluwah lom wilayah sampoe jeu'ôh u tunong pulo Ruja, menan pih gobnyan kureuëng meu hasé bak neucuba kuwasa tanoh di seubrang seulat Malaka. Na meupadum go Keurajeuën Acèh geucuba kuwasa ateuëh Johor ngon Malaka[2], ngon aseuka teuntra nyang that rayeuek seureuta beunantu seunjata nibak Keurajeuën Utsmani[3].
